1259 ادامدى الداعان
قىزىلوردادا تۇرعىنداردى ءبىر جارىم ميلليارد تەڭگەگە الداعان قارجى پيراميداسىن ۇيىمداستىرۋشىلار سوتتالدى، دەپ حابارلايدى Almaty-akshamy.kz.
قىزىلوردا قالاسىنىڭ №2 سوتىنىڭ باسپا ءسوز قىزمەتىنىڭ مالىمەتىنشە، 1259 ادامدى الداعان قارجى پيراميداسىنىڭ ءتورت ۇيىمداستىرۋشىسى سوتتالدى. ولار اقشا تارتۋدىڭ الاياقتىق سحەماسىن قىزىلوردا، اقتوبە، پاۆلودار، شىمكەنت جانە باسقا دا قالالاردا ۇيىمداستىرعان.
"ۇيىمداسقان قىلمىستىق توپتىڭ باسشىسى س. مەن ونىڭ سىبايلاستارى پ.، ن.، ا. 2019 جىلدىڭ تامىزىنان 2020 جىلدىڭ اقپانىنا دەيىنگى ارالىقتا ەكونوميكالىق قىزمەت سالاسىندا اۋىر قىلمىستىق قۇقىق بۇزۋشىلىق جاساعان. قىزىلوردا قالاسىندا "ۆىگودنىي زايم" ج ش س جانە "گارانت 24 لومبارد" ج ش س فيليالدارى تۇرعىنداردان اقشا تارتۋعا باعىتتالعان زاڭسىز قىزمەت كورسەتكەن"، - دەلىنگەن حابارلامادا.
سوتتالعاندار قىلمىستىق ارەكەتتەرىمەن 1259 جابىرلەنۋشىگە 1 561 218 377 تەڭگە مۇلىكتىك زالال كەلتىرگەن.
"ءىستى قاراۋ بارىسىندا مۇلىكتىك زالالدى ءوندىرۋ تۋرالى تالاپ ارىزدان باس تارتىپ، قاراۋسىز قالدىرۋدى سۇراعان جابىرلەنۋشىلەر بولدى. سوتتا سوتتالۋشىلار ايىپتاۋ اكتىسى مەن تالاپتى مويىندامايتىنىن كورسەتتى. ق. سوتتالۋشىلار ءىس قۇجاتتارىنداعى ايعاقتارمەن، ساراپتاما قورىتىندىسىمەن جانە جابىرلەنۋشىلەردىڭ، كۋالاردىڭ ايعاقتارىمەن راستالدى"، - دەدى سوتتىڭ باسپا ءسوز قىزمەتى.
ءىس بويىنشا ءتورت ايىپتالۋشىنىڭ بارلىعى كىنالى دەپ تانىلدى - ولار 7 جىلدان 8 جىلعا دەيىن تۇرمەگە قامالدى.