«التىنكول» جانە «دوستىق» ستانسالارىنىڭ باسشىلارى مەن وبلىستىق مەملەكەتتىك كىرىستەر دەپارتامەنتىنىڭ ءتوراعاسى قىزمەتىنەن بوساتىلدى
قازاقستان-قىتاي شەكاراسىنداعى «التىنكول» جانە «دوستىق» ستانسالارىنىڭ باسشىلارىمەن قاتار، وبلىستىق مەملەكەتتىك كىرىستەر دەپارتامەنتىنىڭ ءتوراعاسى دا قىزمەتىنەن بوساتىلدى. بۇل تۋرالى ەلدىڭ قارجى ءمينيسترى ەرۇلان جاماۋبايەۆ شەكاراداعى كەدەن بەكەتتەرىن تەكسەرۋ بارىسىندا حابارلادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قۇرعاق پورت پەن «نۇرلى جول»، «التىنكول» وتكىزۋ بەكەتتەرىن باقىلاعان شەندىلەر ونداعى جۇك تاسىمالداۋشىلارمەن دە جەكە كەزدەستى.
«ارينە، پروبلەمالار بار. بىرىنشىدەن، بۇل ەلەكتروندىق كەزەككە بايلانىستى. اۆتوكولىكپەن جۇك تاسيتىنداردىڭ كۇندەلىكتى ايتىپ جۇرگەن ماسەلەسى. ودان كەيىن، ولاردىڭ قۇنى. الىپساتارلار الىپ كەلىپ جاتقان تاۋارلاردىڭ باعاسىن كوتەرىپ جىبەرگەن. سونىمەن قاتار وسى جەردىڭ ماسەلەسىن شەشۋ كەرەك»، - دەدى ق ر قارجى ءمينيسترى ەرۇلان جاماۋبايەۆ.
11 قاڭتاردا ەل پرەزيدەنتى كەدەندەگى بىلىقتاردى جويۋدى تاپسىرعان ەدى. اسىرەسە كولىكتەر تەكسەرىلمەيتىن، سالىق پەن باج تولەنبەيتىن قازاقستان-قىتاي شەكاراسىنا باسا نازار اۋدارۋعا شاقىرعان. ەندى مەملەكەتتىك كىرىستەر كوميتەتى تەكسەرىس ءۇشىن ارنايى توپ قۇرىلعانىن، ونىڭ قۇرامىنا پروكۋراتۋرا مەن قارجى مينيسترلىگى ماماندارىنىڭ كىرەتىنىن جەتكىزدى.
«ءبىز سول جۇمىستاردى ۇيلەستىرە بىلسەك، جاقىن ارادا تاۋار اينالىمىن جوعارىلاتىپ، ودان تۇسەتىن كەدەندىك باج سالىعىن بيۋدجەتكە كوبەيتە الامىز. وسىنداي ۇلكەن جوسپارلار قۇرىپ وتىرمىز»، - دەدى ەرۇلان جاماۋبايەۆ.