بازالىق مولشەرلەمە دەڭگەيىن قايتادان قاراۋ كەرەك.
بۇل تۋرالى ق ر پرەمەر-مينيسترىنىڭ ورىنباسارى – قارجى ءمينيسترى ەرۇلان جاماۋبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلتتىق بانك ۇكىمەتپەن بىرلەسىپ، بازالىق مولشەرلەمە دەڭگەيىن قايتا قاراۋى كەرەك»، - دەدى ە. جاماۋبايەۆ ءماجىلىستىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
وسى ورايدا ول بۇل ماسەلەنى دەپۋتاتتار دا كوتەرگەنىن اتاپ ءوتتى.
«بازالىق مولشەرلەمە ەكونوميكاداعى بارلىق ستاۆكاعا ىقپال ەتەدى، ونىڭ ىشىندە دەپوزيتتەر، نەسيەلەر، كۋپوندى باعالى قاعازدار مەن باسقالارى بويىنشا اسەرى بار. ءبىر جاعىنان، ۇلتتىق بانك ينفلياسيانى تەجەۋ ءۇشىن جوعارى دەڭگەيدە ۇستاپ تۇرۋ كەرەك ەكەنىن العا تارتسا، ءبىز ونىڭ دەڭگەيىن قايتا قاراۋ كەرەك ەكەنىن ايتىپ وتىرمىز. سەبەبى ءقازىر تەڭگەنىڭ دوللارعا قاتىستى باعامى تۇراقتانىپ، بۇرىنعى دەڭگەيىندە قالىپتاسا باستادى»، - دەدى مينيستر.
بۇل تۇرعىدا ول ەكونوميكانىڭ ءوسىمىن قامتاماسىز ەتۋ ءۇشىن ءتيىستى ترەندتى قۇرۋ قادامدارىنا كوشۋدىڭ ماڭىزدىلىعىن ايتتى.
«ءتيىستى پايىزدىق مولشەرلەمەسىز ەكونوميكانى نەسيەلەۋگە قاراجاتتى تارتا المايمىز. سوندىقتان اتالعان دەڭگەيدى تومەندەتكەن دۇرىس بولادى»، - دەدى ەرۇلان جاماۋبايەۆ.