قاربىز – ءتاتتى، ءدامدى جانە كوپشىلىكتىڭ سۇيىكتى جەمىسى، ونى تۇتىنۋ دەنساۋلىققا ۇلكەن پايدا اكەلەدى. كوپتەگەن ادامدار ونى جەمىس نەمەسە كوكونىس دەپ سانايدى، شىن مانىندە، بۇل – جيدەك.
قاربىز – ۆيتاميندەر كوزى جانە ونىڭ پايدالى قاسيەتتەرى كوپ:
- ءشولدى جانە اشتىقتى باسادى؛
- جۇيكە جانە جۇرەك-قان تامىرلارى جۇيەلەرىنىڭ جۇمىسىنا وڭ اسەر ەتەدى؛
- ءزار ايدايتىن جانە ءوت ايدايتىن قاسيەتتەرى بار؛
- ىشەك موتوريكاسىن قالىپقا كەلتىرەدى.
قاربىزدىڭ قۇرامىندا ۆ توبىنىڭ ۆيتاميندەرى، اسكوربين قىشقىلى، كومىرسۋلار، تەمىر، ماگنيي جانە وسىمدىك تالشىقتارى بار. جەمىستىڭ 90%-ى سۋدان تۇرادى جانە ول تاماشا ءزار ايدايتىن قۇرال بولىپ تابىلادى.
پەكتين مەن تالشىقتاردىڭ بولۋى ىشەك موتوريكاسىن جاقسارتادى. قاربىزدىڭ پايدالى قاسيەتتەرى اعزاداعى بيوحيميالىق پروسەستەردى رەتتەۋگە جاقسى اسەر ەتەدى، ارتريت پەن پوداگرا اۋرۋلارىن ەمدەۋگە كومەكتەسەدى.
قاربىز جەمىستەرىن حيرۋرگيالىق وپەراسيالاردان كەيىنگى قالپىنا كەلۋ كەزەڭىندە راسيونعا ەنگىزۋگە بولادى. قاربىزدىڭ جۇمساعى – تاماشا ءوت ايدايتىن قۇرال.
وڭتۇستىك جەمىسىن كالورياسى از ديەتا ۇستاناتىن ادامدارعا تۇتىنۋ پايدالى، سەبەبى 100 گ قاربىزدا بار بولعانى 30 ككال بار.
قاربىزدى قالاي تاڭداۋ كەرەك؟
جارىلعان جانە الدىن الا كەسىلگەن قاربىزداردى ساتىپ الماعان ءجون، ويتكەنى ىشىنە ءقاۋىپتى ميكروبتار مەن باكتەريالار وڭاي ءتۇسىپ، ادام اعزاسىنا زيان كەلتىرۋى مۇمكىن.
وڭتۇستىك جەمىستى دۇرىس تاڭداۋدى ۇيرەنۋ ماڭىزدى. ىشىندەگى سارى تالشىقتار، وتە اشىق قىزىل ءتۇس جانە جەمىستىڭ جىلتىر بەتى ونىڭ قۇرامىندا نيتراتتاردىڭ كوپ ەكەنىن كورسەتەدى. مۇنداي قاربىزدان پايدا جوق، كەرىسىنشە ول اعزاعا ۇلكەن زيان تيگىزەدى.
نيتراتتارمەن ۋلانۋ السىزدىك، جۇرەك اينۋى، ۇيقىسىزدىق جانە قىزبا تۋدىرادى. باس اينالۋ، قۇسۋ جانە اسقازاننىڭ بۇزىلۋى سياقتى ۋلانۋ بەلگىلەرى پايدا بولعان جاعدايدا دەرەۋ مەديسينالىق كومەككە جۇگىنۋ قاجەت.
تامىز – ەڭ «قاربىزدىڭ» ۋاقىتى، وسى تاماشا جيدەكتەن ءدام تاتىپ، اعزاڭىزدى نىعايتىپ ۇلگەرىڭىز!