قاراۋسىز جۇرگەن مالدار ايىپ تۇراعىنا قامالادى

ەلوردادا قاراۋسىز قالعان مالدار ءۇشىن ايىپ تۇراعى اشىلدى

نۇر-سۇلتان قالاسىندا كوشەدە بەي-بەرەكەت جۇرگەن مالدار ايىپ تۇراعىنا جەتكىزىلەتىن بولادى، دەپ حابارلايدى almaty-akshamy.kz  قازاقپاراتقا سىلتەمە جاساپ.

«جەرگىلىكتى پوليسيا قىزمەتى باسقارماسى ق ر اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ نۇر-سۇلتان قالاسى بويىنشا اۋماقتىق ينسپەكسياسىمەن جانە ەلوردانىڭ اۋداندىق اكىمدىكتەرىمەن بىرلەسىپ، ق ر اكىمشىلىك قۇقىق بۇزۋشىلىق تۋرالى كودەكسىنىڭ 406، 408-باپتارى بويىنشا جانۋاردىڭ مەنشىك يەسىن اكىمشىلىك جاۋاپكەرشىلىككە تارتۋ جونىندە كوميسسيالىق شەشىم قابىلدايدى. اتالعان باپتار ەلوردا اۋماعىندا مالدى بەي-بەرەكەت جايۋ فاكتىسىن انىقتاۋ جاعدايلارىنا قاتىستى»، - دەلىنگەن قالا اكىمدىگىنىڭ رەسمي سايتىندا.

ءمالىم بولعانداي، جانۋار يەسىنىڭ جەكە باسى جانە ءمان-جاي انىقتالعانعا دەيىن قاراۋسىز قالعان اۋىل شارۋاشىلىعى جانۋارلارى نۇر-سۇلتان قالاسى، الاش تاسجولى، 72 مەكەنجايىندا ۇستالاتىن بولادى.

«جانۋارلاردى يەسىنە قايتارعان كەزدە، يەسى سول ارالىققا دەيىنگى شىعىندى وتەۋى ءتيىس. بۇل شارالار قاراۋسىز قالعان جانۋارلاردىڭ سالدارىنان بولاتىن جول-كولىك وقيعالارىنىڭ، سونداي-اق مالدى ۇرلاۋ مەن زاڭسىز وتكىزۋ فاكتىلەرىنىڭ الدىن الۋعا مۇمكىندىك بەرەدى»، - دەدى اكىمدىكتەن.

تولىق اقپارات الۋ ءۇشىن مىنا تەلەفوندارعا حابارلاسۋعا بولادى: 8(7172)55-68-96، 8(7172)28-59-70.