كەپتەلىس كوپ بولعاندىقتان جول اپاتى دا ءجيى بولادى.
قاراساي اۋدانىنداعى كولىك كەپتەلىسى حالىقتىڭ نارازىلىعىن تۋدىردى، دەپ حابارلايدى Almaty-akshamy.kz
قاراساي اۋدانىنداعى 7 شاقىرىم جولدى حالىق ەكى ساعاتتاپ جۇرۋگە ءماجبۇر.
"كوپ جىل التىن وردا بازارىندا كولىك كەپتەلىسى بولدى. ول جەردىڭ جولىن جاساپ، كەپتەلىستى قالانىڭ سىرتىنا عانا ىسىرىپ قويدى، سونىمەن ءىس ءبىتتى قىلدى. مىنا 7-8 شاقىرىمدى تاڭەرتەڭ 2 ساعات، كەشكە ەكى ساعات جۇرەمىز"، - دەيدى اۋدان تۇرعىنى عۇبايدوللا تۇراپوۆ.
كەپتەلىس كوپ بولعاندىقتان جول اپاتى دا ءجيى بولادى.
"كەپتەلىس ازايادى دەپ الماتىنىڭ ۇلكەن اينالما جولىن سالدى. ودان قايىر جوق. ەلدىڭ ءبارى قالاعا قاتىناپ جۇمىس ىستەيدى. جارتى ءومىرىمىز جولدىڭ كەپتەلىسىمەن كەتەدى. اۋىلدا جۇمىس جوق. ءبىر كولىك سوقتىعىسسا بىرنەشە شاقىرىم كولىك كەپتەلىسى بولادى. سوعىلماعاننىڭ وزىندە ءبىر اتتام جەردى ساعاتتاپ جۇرەمىز"، - دەيدى جۇرگىزۋشى تالعات سمايىلوۆ.
"الماتى - بىشكەك" دەپ اتالاتىن بۇل اۆتوجولدا كۇنىنە 70 مىڭنان استام كولىك جۇرەدى. دەگەنمەن تاس جول نەگىزى 40 مىڭ كولىككە ارنالعان. بۇل جولدىڭ پروبلەمالى ەكەنىن وبلىستىق "قازاۆتوجول" ماماندارى دا مويىنداپ وتىر.
"الماتى-بىشكەك" اۆتوجولىنىڭ 20-31 كم بويىنشا حالىق كوپ شاعىمدانادى. كولىك اپاتى دا ءجيى بولادى. بۇل پروبلەمانى شەشۋ ءۇشىن ەكى كەزەڭدى جۇمىستىڭ سىزباسى ازىرلەندى. 6-8 جولاقتى جول ەتىپ جاساۋ قاراستىرىلعان. 4 بۇرىلما، 12 جەراستى وتكەلى سالىنىپ، 1 كوپىر كەڭەيتىلەدى. سۋ جىبەرەتىن 12 قۇبىر سالىنادى"، - دەيدى "قازاۆتوجول" ۇلتتىق كومپانياسىنىڭ الماتى وبلىستىق فيليالىنىڭ وكىلدەرى.
ۆەدومستۆونىڭ مالىمەتىنشە، جول قۇرىلىسى جاقىندا باستالادى. اۋقىمدى جۇمىس حالىقتى مەزى ەتكەن كولىك كەپتەلىسىن بۇدان دا كۇردەلەندىرە ءتۇسۋى مۇمكىن.