ە. ا. بوكەتوۆ اتىنداعى قاراعاندى ۇلتتىق ۋنيۆەرسيتەتىنىڭ جيىرما جاس عالىمى قىتايدىڭ شيحەسزى ۋنيۆەرسيتەتىندە تاعىلىمدامادان ءوتىپ جاتىر. بۇل ساپار – مەملەكەت باسشىسى قاسىم-جومارت توقايەۆتىڭ قحر-عا جاساعان رەسمي ساپارى كەزىندە قول جەتكىزىلگەن اكادەميالىق الماسۋدى دامىتۋ تۋرالى كەلىسىمدەردىڭ جالعاسى.
باعدارلاما اياسىندا عىلىمي زەرتتەۋلەردى ۇيىمداستىرۋدىڭ زاماناۋي تاسىلدەرىن مەڭگەرۋ جانە ءتۇرلى ەلدەردەن كەلگەن ارىپتەستەردىڭ تاجىريبەسىمەن تانىسۋ كوزدەلگەن.
سەرتيفيكات تاپسىرۋ راسىمىندە ۋنيۆەرسيتەت رەكتورى نۇرلان دۋلاتبەكوۆ بۇل ساپار جاس ماماندار ءۇشىن جاڭا مۇمكىندىكتەر اشاتىنىن اتاپ ءوتتى.
– قىتايمەن قارىم-قاتىناستا عىلىم مەن ءبىلىمنىڭ ماڭىزى زور. ازيا – ستۋدەنتتەر مەن عالىمدار الماسۋدى جولعا قويۋعا قولايلى باعىتقا اينالىپ كەلەدى. قازاقستان بۇل رەتتە ءتيىمدى جاعدايدا ورنالاسقان، سوندىقتان اكادەميالىق ىنتىماقتاستىقتى دامىتا الادى. بۇگىندە ءبىزدىڭ ۋنيۆەرسيتەتتەرگە شەتەلدىك ستۋدەنتتەر كەلىپ جاتىر، بۇل بىرلەسكەن جوبالارعا جول اشادى، – دەدى نۇرلان دۋلاتبەكوۆ.
تاعىلىمداما قاتىسۋشىلارىنىڭ ءبىرى – گۇلنۇر الپىcوۆا. ول قاتتى دەنە فيزيكاسىمەن اينالىسادى، كريستالدىق ماتەريالداردىڭ ليۋمينەسەنسياسىن زەرتتەيدى. قىتايدا ول «ءبىر بەلدەۋ، ءبىر جول» باستاماسىنا قاتىسۋشى ەلدەر ءۇشىن سۋ جۇيەلەرى مەن يرريگاسيا بويىنشا سەمينارعا قاتىسۋدا.
– بۇل تاعىلىمداما – زاماناۋي سۋمەن جابدىقتاۋ جانە يرريگاسيا جۇيەلەرى بويىنشا ءبىلىمدى تەرەڭدەتىپ، ءتۇرلى ەلدەردەن كەلگەن ارىپتەستەرمەن تاجىريبە الماسۋعا مۇمكىندىك بەرەدى. مەن تاجىريبەلىك تاسىلدەر مەن يننوۆاسيالىق شەشىمدەرگە ەرەكشە كوڭىل ءبولۋدى جوسپارلاپ وتىرمىن، ولاردى كەيىن قازاقستاندا بەيىمدەپ قولدانۋعا بولادى، – دەيدى جوباعا قاتىسۋشى.
قىتايعا ساپار كاسىبي بايلانىستار ورناتۋ جانە حالىقارالىق ارىپتەستىكتى دامىتۋ تۇرعىسىنان دا ماڭىزدى.
تاعىلىمداما قورىتىندىسى بويىنشا شەتەلدىك ۋنيۆەرسيتەتتەرمەن ىنتىماقتاستىقتىڭ جاڭا باعىتتارى دامىتىلادى دەپ جوسپارلانۋدا.