قارۋلى كۇشتەردىڭ جاۋىنگەرلىك دايىندىق باعدارلاماسى شەڭبەرىندە 11-19 ناۋرىز ارالىعىندا قاراعاندى وبلىسىنىڭ اۋماعىندا ەكى جاقتى كوماندالىق-شتابتىق وقۋ-جاتتىعۋ وتەدى.
جاۋىنگەرلىك دايىندىق ءىس-شارالارى كەزىندە قاراعاندى، الماتى، جەتىسۋ وبلىستارىنىڭ اۋماعىندا كۇشتەر مەن قۇرالداردىڭ قوزعالىسى جۇزەگە اسادى. وقۋ-جاۋىنگەرلىك مىندەتتەردى پىسىقتاۋ ماقساتىندا بولىمشەلەر پوليگوندارعا تەمىر جول، اۋە جانە اۆتوموبيل كولىگى ارقىلى ارالاس تاسىلمەن مارش جاسايدى. كەيىن تۇراقتى ورنالاسۋ پۋنكتتەرىنە ورالادى.
قورعانىس مينيسترلىگى اتالعان كەزەڭدە ءوڭىردىڭ جەكەلەگەن اۋداندارىندا شەكتەۋ شارالارى ەنگىزىلۋى مۇمكىن ەكەنىن حابارلايدى.
وسىعان بايلانىستى ازاماتتاردان ءوتىپ جاتقان وقۋ-جاتتىعۋلارعا تۇسىنىستىكپەن قاراۋدى جانە تىنىشتىق ساقتاۋدى سۇرايمىز. سونىمەن قاتار الەۋمەتتىك جەلىلەردى پايدالانۋشىلاردان اسكەري تەحنيكانىڭ قوزعالىسى تۋرالى جالعان حابارلامالار مەن بەينەماتەريالدار تاراتپاۋدى جانە تەك رەسمي اقپارات كوزدەرىنە سەنۋدى سۇرايمىز.
ەستەرىڭىزگە سالا كەتەيىك، قولدانىستاعى زاڭنامادا جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعان.