وڭ جاقتى ءرولدى اۆتوكولىكتەرگە جولاۋشى تاسىمالداۋعا تىيىم سالىناتىن بولدى
قازاقستان رەسپۋبليكاسىنىڭ كولىك ءمينيسترى مارات قارابايەۆ 1 قاڭتاردان باستاپ تاكسي سالاسىنا ەنگىزىلەتىن جاڭا وزگەرىستەر تۋرالى مالىمدەدى، دەپ حابارلايدى aqshamnews.kz
ءمينيستردىڭ ايتۋىنشا، تاكسي قىزمەتىن كورسەتەتىن كومپانيالارمەن جاسالعان مەموراندۋمعا سايكەس، وڭ جاقتى ءرولدى اۆتوكولىكتەردى پايدالاناتىن جۇرگىزۋشىلەردى جولاۋشى تاسىمالداۋ قىزمەتتەرىنەن شەتتەتىلەدى.
«وڭ جاقتى ءرولدى اۆتوكولىكتەردى تاكسي قىزمەتىندە پايدالانۋ زاڭعا قايشى، سوندىقتان InDrive جانە Yandex سەكىلدى كومپانيالار ءوز جۇيەلەرىندە مۇنداي كولىكتەردى تىركەمەيدى. 1 قاڭتارعا دەيىن Yandex جانە InDrive ءوز پلاتفورمالارىندا ينۆەنتاريزاسيا جۇرگىزىپ، وڭ جاقتى ءرولدى كولىكتەردى انىقتاپ، ولاردىڭ قىزمەتىن شەكتەيتىن بولادى»، – دەدى مارات قارابايەۆ ۇكىمەتتەگى باسپا ءسوز كونفەرەنسياسىندا.
ءمينيستردىڭ ايتۋىنشا، بۇرىن وڭ جاقتى ءرولدى بولىپ، كەيىن سول جاقتى رولگە قايتا جاسالعان كولىكتەر دە ءقاۋىپسىز ەمەس، سوندىقتان ولار دا قىزمەتتەردەن شەتتەتىلەدى.
«اگرەگاتورلار مۇنداي كولىكتەردى دە انىقتاپ، 1 قاڭتاردان باستاپ ولاردى قىزمەتتەرىنەن شەتتەتەدى»، – دەپ تولىقتىردى مينيستر.
سونداي-اق، مينيسترلىك جول قوزعالىسى ەرەجەلەرىن ۇنەمى بۇزاتىن جۇرگىزۋشىلەردىڭ ءتىزىمىن اگرەگاتورلارعا بەرەتىن بولادى، بۇل جۇرگىزۋشىلەر دە جۇيەدەن اجىراتىلادى.
ال، سەرىكتەرمەن بىرگە جۇرگەن جۇرگىزۋشىلەر ءۇشىن قالاارالىق قاشىقتىقتى 50 كم-گە دەيىن شەكتەۋ تۋرالى ۇسىنىس تەك جۇمىس توبىنداعى ءبىر مۇشە تاراپىنان جاسالعان ۇسىنىس ەكەنىن مينيستر اتاپ ءوتتى.
«بۇل تۇزەتۋ تالقىلانىپ جاتقان جوق جانە تالقىلانبايدى دا. قازىرگى تالقىلاۋ كەزەڭىندە مۇنداي شەكتەۋلەر قاراستىرىلماعان. قاشىقتىققا قاتىستى ناقتى ءبىر شەكتەۋ ەنگىزۋ جوسپارلانباعان، جانە بۇل ماسەلە بويىنشا قوعامدىق تىڭداۋلار وتكىزۋ دە قاراستىرىلماعان. ايتا كەتەرلىگى، ەكى اپتا بۇرىن Indrive كومپانياسىنىڭ قۇرىلتايشىسىمەن كەزدەسۋ ءوتتى، جانە مەنىڭ ويىمشا، كومپانيا باسشىلىعىنىڭ ەڭ باستى ماقساتى — قوزعالىس قاۋىپسىزدىگىن قامتاماسىز ەتۋ»، – دەدى مارات قارابايەۆ.