بۇل دا الاياقتىقتىڭ جاڭا ءتۇرى.
جەلىدە تاراعان اقپاراتتا تۇرعىن الماتىلىقتاردى كوشەدە قارا جاشىك ۇسىنعان قىزداردان ساق بولۋعا شاقىردى، دەپ حابارلايدى aqshamnews.kz
ونىڭ ايتۋىنشا وقيعا “اربات” جاقتا قىزى مەن قۇربىسى قىدىرىپ جۇرگەن كەزىندە بولعان.
“سول جەردە جانىمىزعا بىزگە جاسى 18-19 شاماسىندا قولىندا قارا جاشىگى بار ءبىر قىز كەلدى. قانداي دا ءبىر ەكسپەريمەنت تۋرالى ايتتى. ەگەر ءبىز وعان 40 مىڭ تەڭگە تولەسەك، وسى جاشىكتىڭ ءبارىن بىزگە بەرەتىنىن ايتتى. ول جاشىكتە “Apple” كومپانياسىنىڭ ونىمدەرى بار ەكەنىن ايتتى. قۇلاققاپ، ساعات، بولماسا پلانشەتتىڭ بولۋى مۇمكىن ەكەنىن جەتكىزدى. وسىلايشا بۇل 40 مىڭ تەڭگە تۇگەلدەي اقتالاتىنىن العا تارتتى. مەن بۇل كۇماندى ۇسىنىستان باس تارتتىم. الايدا قۇربىم تاۋەكەل ەتكىسى كەلەتىنىن ايتتى. وعان جاشىك ىشىندە نە بار ەكەنى قىزىق بولدى. ول 40 مىڭ تەڭگەنى جاڭاعى قىزعا اۋدارىپ جىبەردى”، – دەدى تۇرعىن.
وسىلايشا كەيىن جاشىكتى اشقانىندا ونىڭ ىشىنەن AirPods قۇلاققابىنىڭ 3 بۋىنى، ۆunker ويىنى، جالعاۋشى سىمدار مەن قىتايلىق قۋاتتاعىش قۇرىلعى بولعان.
“مەن AirPods-تى سايت ارقىلى تەكسەرۋ كەرەك ەكەنىن ايتتىم. قۇربىم سىرتىنداعى جاپسىرماسى ارقىلى قاراپ ەدى، سايت ءتۇپنۇسقا ەكەنىن كورسەتتى. كەيىن ءبىز سۋم ساۋدا ورتالىعىنا باردىق. وندا ءبىز قۇلاققاپتى كورسەتىپ، ساتساق قانشا تۇراتىنىن سۇرادىق. ال ولار بىزگە مۇنىڭ جاساندى قۇرىلعى ەكەنىن 6-7 مىڭ تەڭگە تۇراتىنىن ايتتى. كەيىن قۇربىم OLX قولدانباسىنا كىرىپ باعاسىن كورگىسى كەلدى. وندا مۇنداي جالعان ءتۇپنۇسقالىق جاپسىرمالارى بار جاساندى قۇرىلعىلار وتە كوپ ەكەن. جانە ولاردىڭ باعاسى 65-70 مىڭ تەڭگەدەن تۇر. ساتىلىمدا تۇرعانداردىڭ كودتارىنىڭ ءبارى بىردەي ، بارىنە ءبىر جالعان جاپسىرمانى قولدانعان”، – دەپ قوستى ول.
تۇرعىن الماتىلىقتاردى ساق بولۋعا شاقىردى.
“بالكىم 95 پايىز ادام بۇل اقپاراتتى بىلمەۋى مۇمكىن. كوشەدەگى مۇنداي ادامدارعا سەنبەڭىزدەر! مۇنىڭ بارلىعى جالعان، الداۋ. جاپ-جاس، ادەمى قىزداردىڭ وسىلاي ادامداردى الداپ جۇرگەنى وكىنىشتى. ومىرىندەگى العاشقى قادامدارىن الاياقتىقپەن اينالىسىپ باستاپ وتىر. 40 مىڭ تەڭگە ارينە ۇلكەن سومما ەمەس. ءبىراق الداۋ دۇرىس ەمەس نارسە”، – دەپ قورىتتى ول.