قازاقستان مەن قىرعىزستاننىڭ ەرەكشە قورعالاتىن تابيعي اۋماقتارىندا قار بارىسىن ساقتاۋ جونىندەگى ىنتىماقتاستىق تۋرالى مەموراندۋمعا قول قويىلدى.
ىنتىماقتاستىقتىڭ ماقساتى ەكى ەلدىڭ ءتورت ەرەكشە قورعالاتىن تابيعي اۋماعى (ەقتا): قازاقستان رەسپۋبليكاسىنىڭ «كولساي كولدەرى» مەملەكەتتىك ۇلتتىق پاركى، الماتى مەملەكەتتىك تابيعي قورىعى، ىلە-الاتاۋ مەملەكەتتىك ۇلتتىق پاركى جانە قىرعىز رەسپۋبليكاسىنىڭ «چون كەمين» مەملەكەتتىك تابيعي پاركى شەكاراسىندا سولتۇستىك تيان-شان تاۋلارىنداعى قار بارىسىن جانە ونىڭ مەكەندەيتىن جەرلەرىن ساقتاۋ بولىپ تابىلادى، دەپ حابارلايدى aqshamnews.kz.
مەموراندۋم ەكى مەملەكەتتىڭ ەقتا-نا بىرلەسكەن ءىس-قيمىلداردى ۇيلەستىرۋگە جانە قار بارىسىن زەرتتەۋ، ونى قورعاۋدى جانە باقىلاۋدى كۇشەيتۋ، سونداي-اق جىرتقىشتىڭ پوپۋلياسياسىن قالپىنا كەلتىرۋ جانە ونى تۇراقتى قالپىندا ۇستاپ تۇرۋ بويىنشا تاجىريبە الماسۋعا مۇمكىندىك بەرەدى.
«بۇگىنگى تاڭدا قازاقستاندا قار بارىسىنىڭ كوبەيۋ ءۇردىسى بايقالادى. قار بارىسىن زەرتتەۋ مەن قورعاۋعا باعىتتالعان بىرلەسكەن ءىس-شارالاردىڭ ارقاسىندا 2019 جىلدان بەرى ونىڭ ەلدەگى سانى 20 پايىزدان استام ءوسىپ، 152-189 باستى قۇرادى. بۇل مەموراندۋم جاھاندىق ماڭىزى بار جىرتقىش ءتۇرىن ساقتاۋ ءۇشىن رەسپۋبليكالارىمىز اراسىنداعى بايلانىستى نىعايتۋعا مۇمكىندىك بەرەدى. ءبىز سونداي-اق قورشاعان ورتانى قورعاۋ جۇمىستارىن كۇشەيتۋ، تاجىريبە جانە عىلىمي بىلىممەن الماسۋ سالاسىندا ءبىرقاتار باستامالاردى جۇزەگە اسىرۋدى جوسپارلاپ وتىرمىز»، دەپ ءبولىستى قازاقستان رەسپۋبليكاسىنىڭ ەكولوگيا جانە تابيعي رەسۋرستار ۆيسە-مينيسترى نۇركەن شاربييەۆ.
الداعى بەس جىلدا تاراپتار قار بارىسىنا، ونىڭ مەكەندەيتىن جەرلەرىنە جانە ازىق قورىنا مونيتورينگ جۇرگىزۋ، ترانسشەكارالىق جانە حالىقارالىق ىنتىماقتاستىقتى دامىتۋدى ىلگەرى باستىرۋ، سونىمەن قاتار جۇرتشىلىقتىڭ حاباردارلىعىن جانە قار بارىسىن ساقتاۋ باعدارلامالارىنا قاتىسۋىن ارتتىرۋ بويىنشا ءبىرقاتار باستامالاردى ازىرلەپ، جۇزەگە اسىرادى دەپ كۇتىلەدى.
«قىرعىز رەسپۋبليكاسى جابايى تابيعاتتى ساقتاۋ جونىندەگى جاھاندىق باعدارلامالاردىڭ بەلسەندى قاتىسۋشىسى بولىپ تابىلادى. قازىرگى ۋاقىتتا رەسپۋبليكامىزدىڭ اۋماعىن 400-دەن استام قار بارىسى مەكەندەيدى. سونىمەن بىرگە، ءبارىمىز بىلەتىندەي، ۇنەمى قونىس اۋداراتىن ءتۇر بولعاندىقتان، ونىڭ مەكەندەۋ ورتاسى رەسپۋبليكا اۋماعىمەن عانا شەكتەلمەيدى. قار بارىسىن جانە ونىڭ مەكەندەيتىن ورتاسىن زەرتتەۋ جانە ساقتاۋ، براكونەرلىك، ادامنىڭ ىس-ارەكەتى سالدارىنان ازىق قورىنىڭ ازايۋى جانە مەكەندەۋ ورتاسىنىڭ تارىلۋى سياقتى ەلەۋلى قاۋىپ-قاتەرلەرگە ۇشىراۋىن بولدىرماۋ ءۇشىن مۇددەلى تاراپتاردىڭ ءوزارا ءىس-قيمىلى قاجەت، مىنە، قازاقستان مەن قىرعىزستاننىڭ ەقتا اراسىندا قول قويىلعان مەموراندۋم اياسىنداعى ءىس-شارالاردى جۇزەگە اسىرۋ سوعان بارىنشا ىقپال ەتەتىن بولادى»، دەپ اتاپ ءوتتى قىرعىز رەسپۋبليكاسىنىڭ تابيعي رەسۋرستار، ەكولوگيا جانە تەحنيكالىق قاداعالاۋ ءمينيسترىنىڭ ورىنباسارى ميرسلاۆ امانكۋلوۆ.
اتالعان بەس جىلدىق كەلىسىم قازاقستانداعى بىرىككەن ۇلتتار ۇيىمىنىڭ دامۋ باعدارلاماسىنىڭ (بۇۇدب) باستاماسىمەن جاھاندىق ەكولوگيالىق قوردىڭ (جەق) قولداۋىمەن ورمان ەكوجۇيەلەرى مەن بيوالۋانتۇرلىلىكتى، سونىڭ ىشىندە قازاقستانداعى قار بارىسىن ساقتاۋ جونىندەگى التى جىلدىق (2018-2024 جج.) جوبانىڭ اياسىندا جاسالىپ وتىر.
مەموراندۋمعا جىرتقىش مەكەندەيتىن 12 ەلدىڭ بارلىعىن بىرىكتىرەتىن جانە الەمدىك قوعامداستىقتىڭ الەمدە سيرەك كەزدەسەتىن ءتۇردى قورعاۋ مەن قالپىنا كەلتىرۋگە كوبىرەك كوڭىل بولۋىنە كومەكتەسەتىن قار بارىسى مەن ونىڭ ەكوجۇيەلەرىن ساقتاۋ جونىندەگى جاھاندىق باعدارلاماسىنىڭ (GSLEP) قاتىسۋىمەن قول قويىلدى.