قار بارىسىن اتىپ العان ازامات ونىڭ تەرىسىن ساتپاق بولعان

ۇستالعان ازامات ونى 4،5 مىڭ دوللارعا ساتپاق بولعان

بىشكەك بازارىندا قار بارىسىنىڭ باس سۇيەگى مەن تەرىسىن ۇستاپ جۇرگەن قىرعىزستاندىق ۇستالدى،  دەپ حابارلايدى Almaty-akshamy.kz BAQ.KZ-كە سىلتەمە جاساپ.

 بىشكەك پوليسياسى «قۇدايبەرگەن» بازارىنىڭ ماڭىندا بارىستىڭ باس سۇيەگى مەن تەرىسى بار قىرعىزستاندىقتى قولعا ءتۇسىردى.

ءتارتىپ ساقشىلارىنىڭ ايتۋىنشا، جەرگىلىكتى تۇرعىن تالاس وبلىسىنىڭ بيىك تاۋلى ايماعىندا قار بارىسىن اتىپ العان. ونىڭ ۇستىنەن جانۋارلار مەن وسىمدىكتەردى جويۋ بابى بويىنشا قىلمىستىق ءىس قوزعالدى. ءىس ماتەريالدارى تالاس وبلىستىق ىشكى ىستەر دەپارتامەنتىنە تاپسىرىلدى.

بەلگىلى بولعانداي، قىزىل كىتاپقا ەنگەن بارىستى ولتىرگەن 48 جاستاعى كۇدىكتى جانۋاردى قويلارىنا شابۋىل جاساۋ كەزىندە اتىپ العانىن ايتقان. وسىدان كەيىن ول جانۋاردىڭ ەتىن سويىپ، تەرىسى مەن باس سۇيەگىن ۇيىنە الىپ كەلگەن.

بىلتىر وشتا ۇلتتىق قاۋىپسىزدىك كوميتەتىنىڭ قىزمەتكەرلەرى ءۇش بارىستىڭ تەرىسىن ساتپاق بولعان قىرعىز ازاماتىن ۇستاعان بولاتىن. قاۋىپسىزدىك قىزمەتى ۇستالعان ازامات ونى 4،5 مىڭ دوللارعا ساتپاق بولعانىن مالىمدەدى.

قار بارىسى ورتالىق ازيا تاۋلارىندا مەكەندەيدى.

دۇنيەجۇزىلىك جابايى تابيعات قورىنىڭ مالىمەتى بويىنشا، پلانەتادا ءتورت مىڭعا جۋىق قار بارىسى قالعان. جانۋار مەكەندەيتىن 12 ەلدىڭ قىزىل كىتابىنا ەنگىزىلگەن. 2017 جىلى قىرعىزستاندا بارىستى اتىپ، اۋلاعانى ءۇشىن سالىناتىن ايىپپۇل 500 مىڭ سومنان 1،5 ميلليون سومعا دەيىن كوتەرىلدى.