اشىق سۋدا ۇزاق قاشىقتىقتا ءجۇزۋ بويىنشا وتەتىن ەڭ بۇقارالىق باسەكە بولادى.
شىلدەنىڭ 2-3 كۇندەرى ارالىعىندا كاپشاعاي سۋ قويماسىندا حالىقارالىق دەڭگەيدەگى ءجۇزۋ جارىستارى سەرياسىنىڭ Oceanman Kazakhstan سپورتتىق شاراسى وتەدى، دەپ حابارلايدى Almaty-akshamy.kz.
جارىسقا قازاقستان، قىرعىزستان، وزبەكستان، ۋكراينا، يتاليا، شۆەيساريا جانە تۇركيا ەلدەرىنەن 1200 ادام قاتىسادى. بۇل اۋەسقوي جانە كاسىبي سپورتشىلاردىڭ باسىن قوساتىن قازاقستان تاريحىندا اشىق سۋدا ۇزاق قاشىقتىقتا ءجۇزۋ بويىنشا وتەتىن ەڭ بۇقارالىق باسەكە بولماق.
Oceanman – چەمپيوناتقا بىرىكتىرىلگەن الەمنىڭ بىرنەشە جەرىندە وتەتىن جارىستار توبى. بۇل شارا 2015 جىلى يسپانيادان باستاۋ العان، سول ساتتەن بەرى جاھاننىڭ ەڭ ادەمى جەرلەرىندە – يتاليا، مالايزيا، مەكسيكا، تۇركيا، رەسەي، گرەسيا، فرانسيا، ۋكراينا، شۆەيساريا، تايلاند، كيپر جانە كولۋمبيادا ءوتىپ كەلەدى. وسىلايشا، Oceanman جەر شارىن اينالعان ساياحاتقا اينالدى. ەندى قازاقستانعا دا جول ءتۇستى.
«Oceanman – Ironman قوزعالىسىنىڭ ءبىر ءتۇرى ىسپەتتەس. بۇل جارىستا قاتىسۋشىلار ءوز مۇمكىندىكتەرىن سۋ ستيحياسىندا، اشىق سۋ قويمالارىندا سىنايدى. بۇل چەمپيوناتتىڭ باستى ەرەكشەلىگى – ونىڭ اشىقتىعى. جارىس ءتۇرلى ەلدەر، ءتۇرلى جاستاعى، ءتۇرلى ماماندىقتاعى، فيزيكالىق دايىندىعى ءارتۇرلى، ءتۇرلى ماقساتتارى مەن موتيۆيسيالارى بار مىڭداعان ادامدى ءبىر ارناعا توعىستىرادى»، - دەيدى شارانى ۇيىمداستىرۋشىلار.
ۇيىمداستىرۋشىلاردىڭ ايتۋىنشا، قازاقستاندىقتار ءجۇزۋ جارىسىنا قاتىسۋعا قۋانا-قۋانا نيەت ءبىلدىردى جانە Oceanman Kazakhstan سوڭعى ءۇش جىلداعى ەڭ بۇقارالىق شاراعا اينالدى. بۇل – سالاۋاتتى ءومىر سالتى مەن بۇقارالىق سپورتتىڭ وتانداستارىمىز ءۇشىن بوس ءسوز ەمەس ەكەنىن راستايدى.