قاڭتار وقيعاسى بويىنشا ايىپتالعان ۇلتتىق قاۋىپسىزدىك كوميتەتىنىڭ 5-باسقارماسىنىڭ بۇرىنعى باسشىسى رۋسلان ىسقاقوۆ سوت وتىرىسىندا «قاڭتار وقيعاسى» كەزىندە نازاربايەۆتىڭ نەمەرە ءىنىسى سامات ءابىش بۇيرىق بەرگەنىن ايتتى، دەپ حابارلايدى Almaty-akshamy.kz Orda.kz-كە سىلتەمە جاساپ.
قىركۇيەكتىڭ 18ء-ى كۇنى الماتىداعى №72 تەرگەۋ اباقتىسىندا ديكيي ارماننىڭ ءىسى بويىنشا الدىن الا تىڭداۋلار ءوتتى. ونىمەن بىرگە تاعى 44 ادامنىڭ ءىسى قارالۋدا. ولاردىڭ اراسىندا الماتى قالاسى ءماسليحاتىنىڭ ەكس-دەپۋتاتى قايرات قۇدايبەرگەن مەن ۇلتتىق قاۋىپسىزدىك كوميتەتى 5ء-شى دەپارتامەنتىنىڭ بۇرىنعى باسشىسى رۋسلان ىسقاقوۆ تا بار. ولارعا جاپپاي تارتىپسىزدىكتەر ۇيىمداستىردى، اتىس قارۋىن ۇرلادى، سونداي-اق «قاڭتار وقيعاسى» كەزىندە 24 ادامدى ۇرلادى دەپ ايىپ تاعىلعان.
ولار مەنى ءابىشتىڭ بۇيرىعىن ورىنداعانىمدى ايتقىزباۋعا تىرىسىپ جاتىر
سوت وتىرىسىندا رۋسلان ىسقاقوۆ ءوزىنىڭ كىناسىز ەكەنىن، ءىستىڭ بۇرمالانعانىن مالىمدەدى. «قاڭتار وقيعاسى» كەزىندە وعان نازاربايەۆتىڭ نەمەرە ءىنىسى سامات ءابىش بۇيرىق بەرگەن كورىنەدى. ال پروكۋراتۋرا ەكس-پرەزيدەنتتىڭ تۋىسىنىڭ قاتىسى بارىن جاسىرعىسى كەلەدى.
«بۇل ءىستى ءبىر جىل بويى تەرگەگەن باس پروكۋراتۋرانىڭ، ىشكى ىستەر مينيسترلىگىنىڭ، قارجى مونيتورينگى اگەنتتىگى، انتيكور جانە ۇلتتىق قاۋىپسىزدىك كوميتەتىنىڭ 100-دەن استام تەرگەۋشىلەرى مەن جەدەل قىزمەتكەرلەرى انىقتالماعان جاعدايدا ماعان بەلگىسىز ۇسىنىس جاسادى، مەن ونى بەلگىسىز سەبەپتەرمەن قابىلدادىم. مەنىڭ بەرگەن تۇسىنىكتەمەلەرىمدى ەلەمەدى. جاۋاپ العاننان كەيىن اراعا ءبىر جىل سالىپ ولار قۇپيالاندى. وسىلايشا ولار ماعان ءابىشتىڭ بۇيرىعىن ورىنداعانىمدى ايتۋعا تىيىم سالماقشى»، - دەدى سوتتا سويلەگەن ۇقك-نىڭ 5-باسقارماسىنىڭ بۇرىنعى باسشىسى.
سامات ءابىش – ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ورىنباسارى، نۇرسۇلتان نازاربايەۆتىڭ نەمەرە ءىنىسى.
سونداي-اق ىسقاقوۆ «ديكيي ارمان» دەگەن اتپەن تانىمال ارمان جۇماگەلدييەۆتى قاماۋعا الۋ تۋرالى بۇيرىقتىڭ شەتەلدەن كەلگەنىن دە تىلگە تيەك ەتتى.
«ارمان جۇماگەلدييەۆتى ۇستاۋ تۋرالى بۇيرىقتىڭ شەتەلدەن كەلگەنىن بىلەمىن جانە دالەلدەيمىن. تەك تەلەفون قوڭىراۋى. ول كەزدە قانداي دالەل بولدى؟».
ىسقاقوۆ نۇسقاۋدىڭ ناقتى قايدان كەلگەنىن ايتپادى.
ۇقك-نىڭ 5-باسقارماسىنىڭ بۇرىنعى باسشىسىنىڭ قورعاۋشىسى وزىنە مۇمكىندىك بەرىلگەن كەزدە بۇلتارتپاۋ شاراسىن ءۇيقاماققا اۋىستىرۋدى تالاپ ەتكەن.
ءقازىر رۋسلان ىسقاقوۆ الماتى قالاسى ۇقك دەپارتامەنتىنىڭ تەرگەۋ يزولياتورىندا وتىر. پروكۋراتۋرا ونى جانە تاعى ءۇش ايىپتالۋشىنى (ارمان جۇماگەلدييەۆ، تالعات ماحاتوۆ جانە بەكزات ۇسەنوۆ) پروسەستىڭ قالعان قاتىسۋشىلارى ءۇشىن ءقاۋىپتى دەپ تانىعاندىقتان، ول سوت پروسەسىنە ونلاين قاتىسۋدا. ءبىراق ادۆوكاتتار مەملەكەتتىك ايىپتاۋ ۇكىمىنە شاعىمدانباق.