قاڭتار وقيعاسىندا تارتىپسىزدىككە قاتىسقان بەس ادامعا قاتىستى سوت ۇكىمى شىقتى

بوستاندىق اۋدانىنىڭ №2 سوتىندا جاپپاي تارتىپسىزدىككە قاتىسىپ، شابۋىل جاساۋ فاكتىسى بويىنشا بەس ادامعا قاتىستى قىلمىستىق ءىس قارالدى.

سوت ك، ا، ك، ۆ جانە ت ەسىمدى ازاماتتاردىڭ 2022 جىلى 4-5 قاڭتار ارالىعىندا جاپپاي تارتىپسىزدىككە قاتىسىپ، عيماراتتار مەن قۇرىلىستارعا شابۋىل جاساعانىن انىقتادى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

سونداي-اق بەس سوتتالۋشى دا تارتىپسىزدىككە قاتىسۋ كەزىندە قازا تاپقان.

قازاقستان رەسپۋبليكاسى قىلمىستىق كودەكسىنىڭ 272-بابىنىڭ 2-بولىگى بويىنشا 3 جىلدان 8 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان، 269-باپتىڭ 2-بولىگى بويىنشا 7 جىلدان 12 جىلعا دەيىن سوتتاپ، مۇلكىن تاركىلەۋ جازاسى كوزدەلگەن.

«سوتتالۋشىلاردىڭ كىناسى الىنعان بەينەجازبالارمەن، كۋاگەرلەر مەن تۋىستارىنىڭ تانۋ تۋرالى حاتتاماسىمەن، جۇرگىزىلگەن سوت-مەديسينالىق ساراپتاما جانە ۇيالى تەلەفونداردىڭ ورنالاسقان جەرى تۋرالى مالىمەتتەر ارقىلى دالەلدەندى. ولار الماتى قالاسى اكىمدىگىنە جانە پرەزيدەنت رەزيدەنسياسىنا شابۋىل جاساعان كەزدە كۇزەت قىزمەتى اتىس قارۋىن قولدانعانى راستالدى. بەسەۋى دە سول اتىس كەزىندە قازا تاپتى»،- دەپ حابارلادى قالالىق سوتتان.

ۆەدومستۆو مالىمەتىنشە، اتالعان قىلمىستىق ءىستىڭ قاراستىرىلۋىنىڭ سەبەبى - سوتتالۋشىلاردىڭ زاڭدى وكىلدەرى قىلمىستىق ءىستى ق ر قپك 35-بابى 1-بولىگى 11-تارماعى بويىنشا قىسقارتۋعا قارسى بولعان.

«سوتتالۋشىلار كىنالى دەپ تانىلىپ، قىلمىستىق-پروسەستىك كودەكستىڭ 35-بابى 1-بولىگى 11-تارماعى نەگىزىندە قىلمىستىق جاۋاپكەرشىلىكتەن بوساتىلدى»،- دەپ اتاپ ءوتتى سوت وكىلدەرى.

سوت ۇكىمى زاڭدى كۇشىنە ەنگەن جوق.