ولارعا قارسى بۇلتارتپاۋ شاراسى باس بوستاندىعىنان ايىرماۋ شاراسىنا وزگەرتىلدى.
ءىىم قاڭتار وقيعاسى كەزىندە كامەلەتكە تولماعان 12 ادامنىڭ اۋىر قىلمىس جاساعانىن انىقتادى، دەپ حابارلايدى Almaty-akshamy.kz
ءماجىلىستىڭ جالپى وتىرىسىندا ءىىم مارات احمەتجانوۆ قاڭتار وقيعاسى كەزىندە جاعدايدى پايدالانعان شابۋىلشىلاردىڭ تاعى ءبىر بولىگى قالانىڭ ءار جەرىن توناۋعا كىرىسكەنىن ايتتى. ولار مەملەكەتتىك ورگانداردىڭ عيماراتتارىن باسىپ الىپ، قارجى ۇيىمدارىن، بانك تەرمينالدارىن، ايىرباستاۋ قۇرىلعىلارىن توناپ كەتكەن. سونىمەن قاتار قالا تۇرعىندارىنان تارتىپ الىنعان تەحنيكالار مەن كولىكتەردى پايدالانعان.
«1466 عيمارات، ونىڭ 1395ء-ى كاسىپكەرلىك نىسانى، 71ء-ى مەملەكەتتىك مەكەمەگە شابۋىل جاسالدى. 1700 ازامات زارداپ شەكتى. كاسىپكەرلىك سۋبەكتىلەرىنە كەلتىرىلگەن زالال – 100 ملرد. سول كۇننەن باستاپ (5 قاڭتار) ايماقتاردا توتەنشە جاعداي رەجيمدەرى مەن كومەندانتتىق ساعاتتار ەنگىزىلدى. 6 قاڭتاردا ساعات 00.00-دەن باستاپ تەرروريزمگە قارسى وپەراسيا رەجيمى جاريالاندى»، دەدى مينيستر.
ءمينيستردىڭ سوزىنشە، بۇل قىسقا مەرزىم، ياعني 6-7-8 قاڭتار ەلدەگى قۇقىقتىق ءتارتىپتى قالپىنا كەلتىرۋگە مۇمكىندىك بەردى. دەگەنمەن، وكىنىشكە قاراي، 19 قىزمەتكەر قازا تاپتى. 3 037 پوليسيا مەن اسكەري قىزمەتكەرلەر جاراقات الدى. 28-ىنە وق ءتيىپ، 177ء-نىڭ سۇيەكتەرى سىنعان. 111ء-نىڭ دەنەسى سۋىق قارۋمەن پىشاقتالعان. كوپتەگەن قىزمەتكەرلەر ءالى دە ەمدەلىپ جاتىر.
جالپى، پوليسيا قاڭتار وقيعالارى بويىنشا 4 623 قىلمىستىق ءىستى تەرگەدى. ولاردىڭ كوبى – ادام ءولتىرۋ (91)، ۇرلىق (2504)، قارۋ-جاراقتىڭ زاڭسىز اينالىمى (440)، بۇزاقىلىق (368)، بوتەن مۇلىكتى قاساقانا ءبۇلدىرۋ قىلمىستارى (188). 20 مىڭنان استام ازاماتتان جاۋاپ الىندى. 5 مىڭنان استام ساراپتاما تاعايىندالدى. ۇرلانعان مۇلىكتىڭ كوبى تاركىلەندى. قىلمىستىق ىستەر بويىنشا 983 ادام ۇستالدى. ونىڭ 502ء-سى ارنايى پروكۋرورلارعا بەرىلدى.
«مەملەكەت باسشىسىنىڭ تاپسىرماسى بويىنشا جەڭىلدەتەتىن ءمان-جايلاردىڭ بولۋىن ەسكەرە وتىرىپ، 255 ادام بوساتىلدى. بۇلار - سوتتىلىعى جوق جانە زالالدى ءوز ەركىمەن وتەگەن ازاماتتار. ادامداردىڭ كوپشىلىگىنە باس بوستاندىعىنان ايىرمايتىن بۇلتارتپاۋ شارالارى قولدانىلدى. توتەنشە جاعداي كەزىندە اۋىر قىلمىس جاساعانى ءۇشىن 12 كامەلەتكە تولماعاندار انىقتالىپ، ولارعا قارسى بۇلتارتپاۋ شاراسى باس بوستاندىعىنان ايىرماۋ شاراسىنا وزگەرتىلدى. جالپى، تەرگەۋ قىلمىستىق پروسەستىڭ ءۇش بۋىندى مودەلىنە سايكەس جۇرگىزىلىپ جاتىر، ياعني تەرگەۋشىلەردىڭ بارلىق نەگىزگى شەشىمى پروكۋروردىڭ قاداعالاۋى ارقىلى كەلىسىمىنەن جانە سوتتىڭ باقىلاۋمەن وتەدى»، - دەدى ىشكى ىستەر ءمينيسترى مارات احمەتجانوۆ.
مينيسترلىكتىڭ مالىمەتىنشە، بۇگىندە 631 ايىپتالۋشى سوتقا جولداندى. ولاردىڭ 132ء-سى – باس بوستاندىعىنان ايىرىلدى، ال قالعاندارىنا شەكتەۋ، قوعامدىق جۇمىستار مەن ايىپپۇلدار سالىندى. ءبىرقاتار كۇدىكتىلەر جابىرلەنۋشىلەرگە كەلتىرىلگەن زالالدى ءوز ەركىمەن وتەدى.