ازاپتالعان جابىرلەنۋشىلەردىڭ قۇقىقتارى قالپىنا كەلتىرىلدى.
تالدىقورعان قالالىق سوتىندا جابىرلەنۋشى دەپ تانىلعان 24 ادامدى ازاپتاۋ فاكتىسى بويىنشا پوليسيا قىزمەتكەرلەرىنە قاتىستى قىلمىستىق ءىس قارالىپ جاتىر، دەپ حابارلايدى Almaty-akshamy.kz
جابىرلەنۋشىلەردىڭ وكىلدەرى ادام قۇقىقتارى جونىندەگى ۋاكىل ەلۆيرا ءازىموۆاعا ءتيىستى سوت تورەلىگىنە قول جەتكىزۋ بولىگىندە قۇقىقتارىنىڭ بۇزىلۋىنا بايلانىستى وتىنىشپەن جۇگىنگەن.
اتاپ ايتقاندا، ولار ءوز شاعىمىندا جابىرلەنۋشىلەردىڭ مۇددەلەرى وبەكتيۆتى جانە ساپالى تۇردە قارالۋىنا مۇمكىندىك جوق ەكەنىنە، جابىرلەنۋشىلەردىڭ ءوز وكىلدەرىمەن قۇپيا كەلىسسوز جۇرگىزۋ ءۇشىن جاعداي جاسالماعانىنا، قىلمىستىق پروسەسكە قاتىسۋشىلار سانىنىڭ كوپ ەكەنىن، ال سوت زالى تار ەكەنىن ايتقان.
جابىرلەنۋشىلەر مەن سوتتالۋشىلار ءبىر جەردە وتىرعاندىقتان، سوتتالۋشىلار مورالدىق جانە پسيحولوگيالىق قىسىم جاسايدى. سونداي-اق اۋدارماشىنىڭ جۇمىسىنا دا شاعىم ءتۇستى. جابىرلەنۋشىلەر سوت پروسەسىندە سينحروندى اۋدارما جاساۋدى بىرنەشە رەت وتىنگەنسە، ول ەسكەرۋسىز قالىپ وتىر.
سوت تالقىلاۋىنىڭ بارىسىن باقىلايتىن ادام قۇقىقتارى جونىندەگى ۇلتتىق ورتالىقتىڭ قىزمەتكەرلەرى قىلمىستىق ءىستى قاراۋ ءتارتىبىنىڭ جوق ەكەنىن دە اتاپ ءوتتى.
«قۇقىق قورعاۋ ورگاندارى قىزمەتكەرلەرىنىڭ كوپتەگەن ادامعا فيزيكالىق كۇش قولدانعانى تۋرالى قىلمىستىق ءىستىڭ ايرىقشا سيپاتىن ەسكەرە وتىرىپ، ەلۆيرا ءازىموۆا جوعارعى سوتقا ساپالى سوت تورەلىگىن قامتاماسىز ەتۋ بويىنشا شارا قولدانۋ تۋرالى حاتپەن جۇگىندى. ۋاكىلدىڭ ءوتىنىشىن قاراۋ ناتيجەسى بويىنشا قىلمىستىق ىستەر جونىندەگى سوت القاسىنىڭ ءتوراعاسىنان بارلىق كورسەتىلگەن زاڭبۇزۋشىلىقتاردىڭ شەشىلگەنى تۋرالى جاۋاپ كەلىپ ءتۇستى»، - دەلىنگەن حابارلامادا.
سوت ورگانىنىڭ جاۋابىنان سوت تالقىلاۋى ۇلكەن زالدا ءوتىپ جاتقانى، ءتيىستى اۋدارماشىمەن قامتاماسىز ەتۋ پروبلەمالارى جويىلعانى حابارلانادى.
بۇدان بولەك، سوتتالۋشىلارعا قاتىستى بۇلتارتپاۋ شاراسى بولىگىندە جابىرلەنۋشى تاراپتىڭ ادۆوكاتتارىنىڭ شاعىمى ءىشىنارا قاناعاتتاندىرىلدى.