تەرروريزم اكتىسى مەن جاپپاي تارتىپسىزدىكتەردى تەرگەۋ جالعاسۋدا.
ەلىمىزدەگى جاپپاي تارتىپسىزدىكتەردى ۇيىمداستىرۋ كۇدىگىمەن 467 ادام قاماۋعا الىندى. بۇل تۋرالى ق ر باس پروكۋراتۋراسى ارنايى پروكۋرورلار قىزمەتىنىڭ باستىعى ريزابەك وجاروۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۆەدومستۆوارالىق جەدەل تەرگەۋ توبى تەرروريزم اكتىسى مەن جاپپاي تارتىپسىزدىكتەردى تەرگەۋدى جالعاستىرۋدا. جۇمىستار 8 ءوڭىر بويىنشا، الماتى، شىمكەنت قالالارىندا جانە الماتى، جامبىل، قىزىلوردا، شىعىس قازاقستان، اقتوبە جانە اتىراۋ وبلىستارىندا جۇرگىزىلۋدە. سەبەبى ءدال وسى ايماقتاردا كوپتەگەن ادام ءولىمى ورىن الدى. مەملەكەتتىك جانە جەكە نىساندار قيراتىلىپ، ورتەلدى»، - دەدى ريزابەك وجاروۆ ورتالىق كوممۋنيكاسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، ءبىر ايدىڭ ىشىندە ۆەدومستۆوارالىق توپ اۋقىمدى كولەمدە تەرگەۋ جۇمىستارىن اتقاردى.
«جاۋاپتار الىنۋدا، بەينەماتەريالدار زەردەلەنۋدە. ساراپتامالار تاعايىندالۋدا، ەكسگۋماسيالار، مايىتتەردى يدەنتيفيكاسيالاۋ جۇرگىزىلۋدە جانە ولاردىڭ قايتىس بولۋ سەبەپتەرى انىقتالۋدا. وسى رەتتە ازاماتتاردىڭ دالەلدەمەلەر جيناۋداعى بەلسەندى كومەگىن اتاپ وتكىم كەلەدى. ءبىزدىڭ «ستوپتەرروريزم» سايتىنا 1672 فايل جۇكتەلگەن»، - دەدى ول.
باس پروكۋراتۋرا وكىلىنىڭ دەرەگىنشە، ولار قاڭتار وقيعاسىنا قاتىستى ۆيدەو جانە فوتوسۋرەتتەردى قۇرايدى.
«بيزنەس وكىلدەرى دە كومەكتەسۋدە. ولار بەينەباقىلاۋ كامەرالارى مەن جازىلعان اقپاراتتاردى جىبەرۋدە. IT-تەحنولوگيالاردى پايدالانا وتىرىپ، وقيعالارعا قاتىسى بار بارلىق ادامداردى انىقتاۋدى جالعاستىرىپ جاتىرمىز. جاپپاي تارتىپسىزدىكتەردى ۇيىمداستىرۋ مەن وعان قاتىسۋ جانە تەرروريزم اكتىسىن جاساۋعا قاتىستى 467 ادام قاماۋعا الىندى. ءبىز ولاردىڭ جەكە باسىن، وتباسىلىق جاعدايىن، جاسىن، دەنساۋلىق جاعدايىن، قاتىسۋ دارەجەسىن، ءوز ىستەرىنە دەگەن كوزقاراسىن جانە باسقا دا سيپاتتايتىن دەرەكتەردى مۇقيات زەرتتەيمىز»، - دەپ اتاپ ءوتتى قاداعالاۋشى ورگان وكىلى.