جالپى، 5 300 قىلمىستىق ءىس قوزعالعان.
باس پروكۋرور بەرىك اسىلوۆ قاڭتارداعى تارتىپسىزدىكتەن كەيىن قانشا ادام سوتتالعانىن ايتتى، دەپ حابارلايدى Almaty-akshamy.kz
اسىلوۆ قاڭتاردا جاسالعان قىلمىستار بويىنشا جالپى 5 300 قىلمىستىق ءىس قوزعالعانىن اتاپ ءوتتى. باسىم بولىگىن ىشكى ىستەر مينيسترلىگى تەرگەگەن (4 623) ادام ءولتىرۋ، ۇرلىق، قاراقشىلىق، قارۋ-جاراق ۇرلاۋ سياقتى قىلمىستار.
«ۇلتتىق قاۋىپسىزدىك كوميتەتى مەملەكەتكە وپاسىزدىق جاساۋ، بيلىكتى باسىپ الۋ، اسا ءىرى كولەمدە پارا الۋ فاكتىلەرىن تەرگەدى. ارنايى پروكۋرورلار 720 قىلمىستىق ءىستى تەرگەدى. بۇل ىستەر بويىنشا تىيىم سالىنعان ەكسترەميستىك توپتاردىڭ 25 مۇشەسى ۇستالدى. ۇيىمداسقان قىلمىستىق توپتاردىڭ 42 مۇشەسى قاماۋعا الىندى. ودان بولەك، كۇدىكتىلەردىڭ اراسىندا دەسترۋكتيۆتى ءدىني اعىمداردىڭ 8 جاقتاۋشىسى بار. 126 ادام كىسى ءولتىرۋ، ۇرلىق، توناۋ جانە قاراقشىلىق جاساعاندارى ءۇشىن بۇرىن سوتتالعان»، دەدى بەرىك اسىلوۆ.
ونىڭ ايتۋىنشا، جاپپاي تارتىپسىزدىككە قاتىسۋشىلاردىڭ كوبى – 35 -كە دەيىنگى جاستار.
«بۇدان بولەك، شەتەلدىك ازاماتتار جاپپاي تارتىپسىزدىككە قاتىسۋعا جانە باسقا قىلمىستار بويىنشا كۇدىكتى بولىپ تانىلدى. ونىڭ ىشىندە وزبەكستان، رەسەي، قىرعىزستان جانە تاجىكستان ازاماتتارى بار. بۇگىندە ءبىزدىڭ ىستەر بويىنشا 573 ادام سوتتالدى. ونىڭ ىشىندە ەكى ءىس – تەراكت جاساۋ فاكتىسى بويىنشا. قازىرگى تاڭدا جاپپاي تارتىپسىزدىكتى ۇيىمداستىرۋشىلار رەتىندە 18 ادام انىقتالدى. ولاردىڭ 13-ىنە قاتىستى ءىس سوتتا قارالىپ جاتىر»، دەدى باس پروكۋرور.
سونداي اق سول كەزدە كۇشتىك ورگانداردىڭ ءبىرقاتار قىزمەتكەرى ۇستالعاندارعا قاتىگەزدىك تانىتقانىن ايتتى.
«بۇل جاعدايدى ەش نارسەمەن اقتاۋعا بولمايدى. پرەزيدەنت تاپسىرعانداي، ازاپتاۋ قولدانعان قىزمەتكەرلەر شەنىنە قاراماستان ءتيىستى جازاسىن الادى جانە الىپ تا جاتىر. ازاپتاۋلار تۋرالى شاعىمدار بويىنشا بارلىعى 329 قىلمىستىق ءىس قوزعالدى. ولاردىڭ باسىم بولىگى سىبايلاس جەمقورلىققا قارسى ءىس-قيمىل قىزمەتىندە بولدى. ارنايى پروكۋرورلار پوليسيا مەن ۇلتتىق قاۋىپسىزدىك كوميتەتىنىڭ 34 قىزمەتكەرىنە قاتىستى ءىستى تەرگەدى. الماتى وبلىسىنىڭ پوليسيا عيماراتىندا 24 ادامدى ازاپتاۋ فاكتىلەرى تۋرالى ىستەر سوتقا جولداندى»، - دەدى ول.
بەرىك اسىلوۆ كەلتىرگەن مالىمەتكە سۇيەنسەك، قاڭتار وقيعاسى بويىنشا سوتتار 1 221 ادامنىڭ ۇستىنەن قوزعالعان ىستەردى قارادى، ولاردىڭ ىشىندە 1 205 ادام سوتتالدى. ءقازىر 315 ادامعا قاتىستى 127 قىلمىستىق ءىس تەرگەلىپ جاتىر. ولار بويىنشا جەدەل تەرگەۋ ءىس-شارالارى ءجۇرىپ جاتىر.
«مەملەكەت باسشىسى جولداۋىندا راقىمشىلىق جاساۋ قاجەت ەكەنىن اتاپ ءوتتى. سوندىقتان «راقىمشىلىق جاساۋ تۋرالى» زاڭ قابىلداندى. زاڭ اياسىندا ارانداتۋشىلاردىڭ ايتقانىنا كونىپ، جاپپاي تارتىپسىزدىك كەزىندە قىلمىس جاساعاندار جازادان بوساتىلدى. راقىمشىلىق 1 095 ادامعا قولدانىلدى. اتاپ ايتقاندا، سوت اۋىر قىلمىستار ءۇشىن سوتتالعان 1 001 ادامنىڭ جازا مەرزىمىن قىسقارتتى»، - دەدى بەرىك اسىلوۆ.
بۇعان قوسا باس پروكۋرور جوعارعى باسشىلىعىن اۋىستىرۋعا باعىتتالعان وپەراسيانىڭ تىڭعىلىقتى جوسپارلانعانعانىن مالىمدەدى.