اۋىر جانە اسا اۋىر قىلمىستار جاساعان ادامدارعا جازا مەرزىمى قىسقارتىلۋى مۇمكىن
باس پروكۋراتۋرا «راقىمشىلىق جاساۋ تۋرالى» زاڭ جوباسى بويىنشا رەتتەۋشىلىك ساياساتتىڭ كونسۋلتاتيۆتىك قۇجاتىن دايىندادى، دەپ حابارلايدى Almaty-akshamy.kz.
«قاڭتارداعى وقيعالار» بويىنشا ءىس جۇرگىزۋدە 391 قىلمىستىق ءىس بار (راقىمشىلىق جاساۋعا جاتاتىندار).
«ولار بويىنشا 383 كۇدىكتى، ايىپتالۋشى بولىپ وتۋدە. (بۇلتارتپاۋ شارالارى بويىنشا: ەشقايدا كەتپەۋ تۋرالى قولحات – 153، كۇزەتپەن ۇستاۋ – 147 ادام، ءۇيقاماققا الۋ – 24، كەپىل – 19، جەكە كەپىلگەرلىك – 2، بۇلتارتپاۋ شاراسى تاڭدالمادى – 28، ىزدەۋدە – 10). سوتتىڭ ءىس جۇرگىزۋىندە 102 ادامعا 36 ءىس بار. سوتتالعاندار-1 035، ونىڭ ىشىندە باس بوستاندىعىنان ايىرۋ ورىندارىندا جازاسىن وتەۋشىلەر-93؛ پروباسيادا-930؛ 3 ايىپپۇل تاعايىندالدى؛ قوعامدىق جۇمىستار-9؛ تۇزەۋ جۇمىستارى-0»، - دەلىنگەن قۇجاتتا.
قىلمىستىق تەرىس قىلىقتار جانە ونشا اۋىر ەمەس، اۋىرلىعى ورتاشا، اۋىر جانە اسا اۋىر قىلمىستار جاساعان ادامدارعا، ولاردىڭ سوتتىلىعىن الىپ تاستاپ، راقىمشىلىق جاساۋ كوزدەلگەن.
قىلمىستىق تەرىس قىلىقتار مەن ونشا اۋىر ەمەس جانە اۋىرلىعى ورتاشا قىلمىستار جاساعان ادامداردى قىلمىستىق جاۋاپتىلىقتان تولىق بوساتۋ ۇسىنىلادى. اۋىر جانە اسا اۋىر قىلمىستار جاساعان ادامدارعا جازا مەرزىمى قىسقارتىلۋى مۇمكىن.
«زاڭ جوباسىنىڭ كۇشى مەملەكەتكە وپاسىزدىق جاساۋعا بايلانىستى قىلمىستار جاساعان؛ جاپپاي تارتىپسىزدىكتەردى، سىبايلاس جەمقورلىق قىلمىستى، تەرروريستىك قىلمىستى، ەكسترەميستىك قىلمىستى، ازاپتاۋدى ۇيىمداستىرعان، سونداي-اق قىلمىستاردىڭ قايتالانۋى نەمەسە قىلمىستاردىڭ ءقاۋىپتى قايتالانۋى كەزىندە جازا تاعايىندالعان ادامدارعا قولدانىلمايدى»، - دەلىنگەن قۇجاتتا.
مەملەكەت باسشىسى جولداۋىندا ەرەۋىلگە قاتىسقاندار سوت ءادىل وتەتىنىنە ۇمىتتەنىپ وتىرعانىن ايتقان بولاتىن.
بىزگە ەل بىرلىگى اۋاداي قاجەت. ەرەۋىلگە قاتىسقاندار دا، كۇشتىك قۇرىلىم قىزمەتكەرلەرى دە – ءوز ازاماتتارىمىز. ولار سوت ءادىل وتەدى دەپ قانا ەمەس، قوعام كەشىرىمدى بولادى دەپ ۇمىتتەنىپ وتىر. مەملەكەت قاڭتار وقيعاسىنا قاتىسقان، ءبىراق اۋىر قىلمىس جاساماعان ازاماتتاردىڭ جازاسىن جەڭىلدەتتى. زاڭ بۇزعانداردىڭ ءبىرقاتارى كىناسىن ءتۇسىنىپ، وتكەن ىسكە وكىنىپ وتىر. ولارعا كەشىرىممەن قاراعان دۇرىس دەپ ويلايمىن.
«سوندىقتان، مەن قاڭتار وقيعاسىنا قاتىسۋشىلارعا ءبىر رەتتىك راقىمشىلىق جاريالاۋ تۋرالى شەشىم قابىلدادىم. راقىمشىلىق جاپپاي تارتىپسىزدىكتى ۇيىمداستىرۋعا قاتىسى بار ادامدارعا، سونداي-اق، مەملەكەتكە وپاسىزدىق جاساعانى جانە بيلىكتى كۇشپەن باسىپ الۋعا ارەكەتتەنگەنى ءۇشىن ايىپتالعاندارعا قولدانىلمايتىنى تۇسىنىكتى. سونداي-اق، لاڭكەستىك جانە ەكسترەميستىك قىلمىس جاساعاندارعا، رەسيديۆيستەرگە، جۇرتتى ازاپتاعاندارعا راقىمشىلىق بولمايدى. ءبىز ادامگەرشىلىك تانىتا وتىرىپ، وسى قايعىلى وقيعادان ءتيىستى قورىتىندى جاسايمىز. مۇنداي جاعداي ەندى ەشقاشان قايتالانبايدى. بۇعان جول بەرمەيمىز»، - دەگەن ەدى پرەزيدەنت.