قاڭتار وقيعالارىنىڭ بارلىق جاعدايلارىن تەرگەۋ بەلگىلى ءبىر ۋاقىتتى الادى

 وبەكتيۆتى باعالاۋ ءۇشىن 1 300 استام سوت ساراپتاماسى تاعايىندالدى

قۇقىق قورعاۋ ورگاندارى قاڭتارداعى وقيعالاردىڭ بارلىق ءمان-جايلارىن انىقتاۋ ءۇشىن كوپ ۋاقىتتى تالاپ ەتەتىن ۇلكەن جۇمىس اتقارۋدا. بۇگىنگى كۇندە 1 307 مەديسينالىق، بالليستيكالىق جانە باسقا سوت-ساراپتامالىق زەرتتەۋلەر تاعايىندالدى. بۇل تۋرالى ورتالىق كوممۋنيكاسيالار قىزمەتى الاڭىندا باس پروكۋراتۋرانىڭ 1 قىزمەت باستىعىنىڭ ورىنباسارى ەلدوس قيلىمجانوۆ مالىمدەدى. 

«تەرگەۋشىلەر 1 500 جۋىق وقيعا بولعان ورىنداردى قاراپ شىقتى، 10 000 استام تەرگەۋ امالدارى جۇرگىزىلدى. 1 279 تۇلعا جابىرلەنۋشى بولىپ تانىلدى. اتقارىلاتىن جۇمىس اۋقىمى وتە كوپ، سول ءۇشىن تەرگەۋ ناتيجەلەرىن كۇتىپ، سابىر ساقتاۋ قاجەت. تەرگەۋ امالدارىنىڭ، ساراپتامالاردىڭ ناتيجەلەرى نەگىزىندە عانا ءار كۇدىكتىنىڭ ىس-ارەكەتىنە قۇقىقتىق باعا بەرىلەتىن بولادى. ال تۇپكىلىكتى، ياعني، كىنانىڭ بار-جوعى، جازانىڭ مولشەرى تۋرالى شەشىمدى تەك سوت قابىلدايدى. سوندىقتان ازاماتتاردان جۇرگىزىلىپ جاتقان جۇمىستارعا تۇسىنىستىكپەن قاراپ، تەك رەسمي مالىمەتتەرگە سەنۋگە جانە جالعان اقپاراتتاردى تاراتپاۋعا شاقىرامىن»،- دەدى پروكۋرور قازاقستاندىقتارعا قاراتىپ ايتقان سوزىندە.