قانت قىزىلشاسىنا سۋبسيديا كوبەيەدى

شيكىزاتتى قابىلداۋ قۇنى 40 مىڭ تەڭگەگە جەتتى.

اۋىل شارۋاشىلىعى ۆيسە-مينيسترى ءابىلقايىر تامابەك قانت سالاسىنا مەملەكەتتىك قولداۋدى كۇشەيتۋ تۋرالى ايتتى، دەپ حابارلايدى Almaty-akshamy.kz ق ر اشم باسپا ءسوز قىزمەتىنە سىلتەمە جاساپ.

اتاپ ايتقاندا، شارۋاشىلىقتاردىڭ قانت قىزىلشاسىن وسىرۋگە جۇمساعان شىعىندارى جىل سايىن ءوسىپ وتىراتىنى جانە بيىلعى جىلى 1 گەكتارعا جۇمسالعان شىعىندار 900 مىڭنان 1 ملن تەڭگەگە دەيىن جەتكەنى اتاپ ءوتىلدى.

قىزىلشا وسىرۋشىلەردىڭ مەملەكەتتىك قولداۋ تاسىلدەرىن قايتا قاراۋ جونىندەگى وتىنىشتەرىن ەسكەرە وتىرىپ، اۋىل شارۋاشىلىعى مينيسترلىگى سۋبسيديالار نورمالارىن ۇلعايتتى. وسىلايشا شيكىزاتتى قابىلداۋ قۇنىن بۇرىنعى 30 مىڭ تەڭگەنىڭ ورنىنا 40 مىڭ تەڭگەگە جەتكىزدى. سونىڭ ارقاسىندا قانت قىزىلشاسىنىڭ رەنتابەلدىلىگى جۇگەرى، راپس جانە سويا سياقتى داقىلداردىڭ دەڭگەيىنە دەيىن تەڭەستىرىلەدى.

سونداي-اق اۋىل شارۋاشىلىعى ۆيسە-مينيسترى مەملەكەت قىزىلشا وسىرۋشىلەرگە قولداۋ كورسەتۋدى جالعاستىراتىنىن، قانت سالاسىن دامىتۋ جونىندەگى جوسپار ازىرلەنگەنىن اتاپ ءوتتى.

قايتا وڭدەۋگە تاپسىرىلعان قانت قىزىلشاسىن سۋبسيديالاۋدى ۇلعايتۋعا كەلەسى جىلى شامامەن 11،5 ملرد تەڭگە بيۋدجەت قاراجاتىن ءبولۋ جوسپارلانىپ وتىر.  سونداي-اق، بۇگىندە تۇقىم، گەربيسيدتەر، تىڭايتقىشتار قۇنىنىڭ 50%، تەحنيكا قۇنىنىڭ 25% سۋبسيديالانادى، بۇل رەتتە سۋبسيديالاۋدىڭ جاڭا قاعيدالارىندا تەحنيكانىڭ رۇقسات ەتىلگەن ەڭ جوعارى قۇنىنىڭ بەلگىلەنگەن ليميتتەرىن وزەكتەندىرۋ جوسپارلانىپ وتىر.

«بۇدان بولەك، مەملەكەتتىك قولداۋ شارالارىن جەتىلدىرۋ بويىنشا جۇمىس شەڭبەرىندە قىزىلشا جينايتىن كومباينداردى ساتىپ الۋعا وتەۋ ءنورماتيۆىن 50% دەيىن ۇلعايتۋ ماسەلەسى پىسىقتالىپ جاتىر. مەملەكەتتىك قولداۋدىڭ جاڭا ەرەجەلەرى 2023 جىلدان باستاپ كۇشىنە ەنەدى دەپ كۇتىلىپ وتىر»، - دەدى ءابىلقايىر تامابەك.

كەزدەسۋدە شارۋالار قانت سالاسىن دامىتۋ پەرسپەكتيۆالارى تۋرالى ءوز پىكىرلەرىمەن ءبولىسىپ، ءتۇسىمنىڭ، ياعني پايدانىڭ وسۋىنە تىكەلەي ىقپال ەتەتىن اگروتەحنولوگيالاردى ساقتاۋدىڭ ماڭىزدىلىعىن اتاپ ءوتتى.

قانت سالاسىن دامىتۋدىڭ 2026 جىلعا دەيىنگى كەشەندى جوسپارىن ىسكە اسىرۋ اياسىندا ەگىس القاپتارىن 38 مىڭ گەكتارعا دەيىن ۇلعايتۋ جوسپارلانىپ وتىر.