بۇل - شارۋالاردى قولداۋ ءۇشىن قابىلدانعان شارا.
ق ر اۋىل شارۋاشىلىعى ءمينيسترىنىڭ ورىنباسارى ءابىلحايىر تامابەك كوكسۋ قانت زاۋىتىندا جەتىسۋ وبلىسىنىڭ فەرمەرلەرىمەن كەزدەسۋ وتكىزدى، دەپ حابارلايدى Almaty-akshamy.kz
ۆيسە-مينيستر وڭىرگە ەلدەگى قانتقا قاتىستى قالىپتاسقان جاعدايدى تالقىلاۋ، ونى تۇراقتاندىرۋ ءۇشىن ناقتى قادامدار جاساۋ جانە قانت سالاسىن دامىتۋ ماسەلەسىن وندىرۋشىلەرمەن بىرلەسىپ قاراستىرۋ ماقساتىندا كەلدى، دەپ حابارلايدى
شارۋالار مەن زاۋىت باسشىلىعى ۆەدومستۆو وكىلدەرىمەن سالاداعى قوردالانعان ماسەلەلەردى تالقىلاپ، ءوز ۇسىنىستارىن ايتىپ، سۇراقتارىن قويدى.
اتاپ ايتقاندا، كەزدەسۋگە قاتىسۋشىلار زاۋىتتىڭ قانت قىزىلشاسىنىڭ ءبىر كەلىسى ءۇشىن ساتىپ الۋ باعاسىنىڭ تومەن ەكەنىن ايتتى. جىل سايىن جينالعان ءونىم قانت زاۋىتتارىنا وڭدەۋگە تاپسىرىلادى.
زاۋىتتار تولەيتىن باعا قىزىلشا وسىرۋشىلەردىڭ جۇمسايتىن شىعىندارىنا سايكەس كەلمەيلى. 2021 جىلى زاۋىت پەن مەملەكەت ءبىر كەلى قىزىلشا ءۇشىن 20 تەڭگە تولەدى.
شارۋالاردى قولداۋ ماقساتىندا بيىل مەملەكەت قانت زاۋىتتارىنىڭ ساتىپ الۋ باعاسىن ۇلعايتتى: ەندى زاۋىت 15 تەڭگە، ال مەملەكەت سۋبسيديا رەتىندە 15 تەڭگە تولەيتىن بولادى. وسىلايشا، ءبىر توننا قانت قىزىلشاسى ءۇشىن شارۋالار 30 مىڭ تەڭگە الاتىن بولادى. ورتا ەسەپپەن وبلىستا فەرمەرلەر قانت قىزىلشاسىنان گەكتارىنان 350-دەن 400 سەنتنەرگە دەيىن ءونىم جينايدى، بيىلعى جىلعا جوسپار 200 مىڭ توننا.
سونداي-اق، كەزدەسۋگە قاتىسقان وندىرۋشىلەر قىزىلشا ەگەتىن ايماقتى سۋمەن قامتاماسىز ەتۋ، فەرمەرلەر مەن قايتا وڭدەۋ زاۋىتتارىن تەحنيكالىق جابدىقتاۋ ماسەلەلەرىن تالقىلادى.
وڭىردەگى ەڭ ءىرى قانت زاۋىتتارىنىڭ ءبىرى – «كوكسۋ قانت زاۋىتى» ج ش س تاۋلىگىنە 2000 تونناعا دەيىن قانت قىزىلشاسىن وڭدەيدى. كۇنىنە 200 توننادان استام دايىن ءونىم الادى. 2022 جىلدىڭ باسىنان كاسىپورىن 29 مىڭ توننا قانت ءوندىردى. زاۋىت جىلىنا 250 مىڭ توننا قانت وندىرەدى. سونداي-اق، قۇراق قانتىنىڭ جىلدىق قۋاتى 35 مىڭ توننا شيكىزاتتى قۇرايدى.
ايتا كەتەيىك، «كوكسۋ قانت زاۋىتى» 1932 جىلى قۇرىلدى. 2015 جىلى زاۋىت جوندەلىپ، ىسكە قوسىلدى. ونى جوندەۋگە شامامەن 4 ملرد تەڭگە سالىندى. 2017 جىلى 1،5 ملرد تەڭگە سوماسىنا زاۋىت جاڭعىرتىلىپ، ونىمدىلىگى جوعارى جاڭا جابدىقتار ورناتىلدى.
ۆيسە-مينيستر ءابىلحايىر تامابەك قاتىسۋشىلارعا جۇيەلى سيپاتتاعى پروبلەمالار مەن ۇسىنىستار ۇكىمەتتىك دەڭگەيدە قارالاتىنىن ايتتى.