ءمامس: الماتىدا ساقتاندىرۋ ەسەبىنەن ەڭ كوپ قولدانىلاتىن كونسۋلتاتيۆتىك-دياگنوستيكالىق قىزمەتتەر قانداي؟
2024 جىلى الماتىلىقتار ءمامس ەسەبىنەن 1156 كونسۋلتاتيۆتىك-دياگنوستيكالىق قىزمەت ءتۇرىن پايدالانعان. وسى جىلدىڭ 9 ايىندا مەديسينالىق ساقتاندىرۋ قورى اتالعان قىزمەتتەرگە 18،1 ملرد تەڭگە جۇمسادى، دەپ حابارلايدى مسق الماتى قالالىق فيليالىنىڭ باسپا ءسوز قىزمەتى.
حابارلاماعا سۇيەنسەك، وڭتۇستىك استانادا جۇرتشىلىق اراسىندا اكۋشەر-گينەكولوگتارعا دەگەن سۇرانىس جوعارى. جۇگىنگەن حالىق سانىنا شاققاندا ودان كەيىنگى ورىندارعا وفتالمولوگ، نيەۆراپوتولوگ، حيرۋرگ، وتورينولارينگولوگ جانە ەندوكرينولوگ ماماندار جايعاسقان.
ءمامس پاكەتىندە تيرەوتروپتى گورمون (تتگ)، D دارۋمەنى، ەركىن تيروكسين (T4)، جاتىر موينىنان الىنعان ماتەريالدى سيتولوگيالىق تەكسەرۋ (پاپ-تەست جانە گەموكۋلت-تەست) سىندى زەرتتەۋلەرگە دەگەن سۇرانىس جوعارى.
ال، ەڭ قىمبات اناليز – گەننىڭ مۋتاسياعا ۇشىراۋ دەڭگەيىن انىقتايتىن KRAS ءاناليزى. پسر ادىسىمەن جاسالاتىن اناليز ىسىك پايدا بولعان تىننەن الىنادى. تەست ورگانيزمدە گليۋكوزاعا تولەرانتتىلىقتىڭ قانشالىقتى بۇزىلعانىن انىقتاپ، قانت ديابەتىن كلينيكالىق بەلگىلەر بايقالماي تۇرىپ ەرتە انىقتاۋعا كومەكتەسەدى. ءمامس پاكەتىندە بۇل اناليز شامامەن 108 مىڭ تەڭگە تۇرادى.
كونسۋلتاتيۆتىك-دياگنوستيكالىق قىزمەتتەر اراسىندا ەڭ قىمباتى – MARS جاساندى باۋىر اپپاراتى ارقىلى جاسالاتىن ءالبۋميندى دياليز، قۇنى 2،1 ملن تەڭگە. مەديسينالىق كومەكتىڭ بۇل ءتۇرى باۋىر جەتكىلىكسىزدىگىمەن اۋىراتىن ناۋقاستارعا كورسەتىلەدى.
كومپيۋتەرلىك دياگنوستيكا اراسىنداعى ەڭ قىمباتى – ءبىر فوتوندى ەميسسيوندى كومپيۋتەرلىك توموگرافيا، قۇنى 87 مىڭ تەڭگە.
فيليال ساراپشىلارىنىڭ سوزىنە سۇيەنسەك، ساقتاندىرۋ ەنگىزىلگەلى بەرى كت مەن مرت-عا دەگەن سۇرانىس ارتقان. 2024 جىلدىڭ 9 ايىندا 35 مىڭ كومپيۋتەرلىك توموگرافيا جاسالعان، وعان قور 594،8 ملن تەڭگە تولەدى. سونىمەن قاتار، 48 مىڭ مرت قىزمەتى ءۇشىن 686،8 ملن تەڭگە تولەنگەن.
ۇسىنىلىپ وتىرعان مالىمەتتەر مسق اناليتيكا ورتالىعىنان الىندى. ورتالىق مەديسينا سالاسىنداعى اۋقىمدى مالىمەتتەردى جيناقتاپ، اناليز جاساۋعا، ءتيىمدى شەشىمدەر قابىلداۋعا مۇمكىندىك بەرەدى. بۇگىنگى كۇنى اناليتيكا ورتالىعى ارقىلى 500-گە جۋىق اۋقىمدى كورسەتكىش ۆيزۋاليزاسيالاندى. Power BI، Superset، QlikSense باعدارلامالارىنىڭ كومەگىمەن 18 بازادان مالىمەت جيناقتالادى. بۇل مەديسينا سالاسىندا تۋىنداعان قاۋىپ-قاتەرلەردى سارالاپ، مەديسينالىق قىزمەت ساپاسىن جاقسارتۋعا مۇمكىندىك بەرەدى.