قانداستاردى قامتاماسىز ەتۋ مەملەكەت تاراپىنان ەمەس، جەرگىلىكتى وڭىرلەردە قاراستىرلادى

ەگەر قانداستارىمىز ەلگە كەلەمىز دەيتىن بولسا، ەسىگىمىز اركەز اشىق  - مينيستر.

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەلىمىزگە كوشىپ كەلەتىن قانداستارعا قانداي جاعداي جاسالاتىنىن ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.

ءمينيستردىڭ ايتۋىنشا، قانداستارىمىز ەلگە كەلەتىن بولسا، ولارعا جۇمىس قاراستىرىلىپ وتىر. 

«ەكىنشىدەن، ولاردا باسپانالى بولۋ مۇمكىنشىلىگى بولۋى كەرەك. جۇمىس ورنى جونىندە ءبىزدىڭ كوميتەتىمىز قابىلدايتىن 7 وڭىرىمىزدە ارناۋلى  باعدارلاما جاساپ جاتىر. ياعني، كەلگەن كەزدە ازاماتتار ءار ءوڭىردىڭ وزىنە ساي ماماندىقتار مەن سالالارى بار ەكەنىن ءبىلۋى كەرەك. ماسەلەن، سولتۇستىك قازاقستان وبلىسىندا كوبىنە اۋىل شارۋشىلىعى بار، ول جەردە قانداي ماماندىقتار كەرەك، قانداي سالا باسىم سول سياقتى مەملەكەتتىك مەكەمەلەردە دارىگەرلەر، پەداگوگتاردى دا جۇمىسقا تارتۋ قارالادى. سول سەبەپتى ءاربىر وبلىس جەلتوقسان ايىنا دەيىن ءوزىنىڭ باعدارلاماسىن جاساپ شىعادى»، - دەدى مينيستر ورتالىق كوممۋنيكاسيالار الاڭىندا ءوتىپ جاتقان بريفينگتە.

سونداي-اق دۇيسەنوۆانىڭ ايتۋىنشا، قانداستارىمىزدى قامتاماسىز ەتۋ تەك مەملەكەت تاراپىنان ەمەس، جەرگىلىكتى وڭىرلەردە قاراستىرىلادى.

«ەكىنشى باۋىرلارىمىز ەلگە ورالعىسى كەلەتىن بولسا، ماماندىعى سايكەس كەلىپ تۇرسا، تۇرعىلىقتى جەرىندە تۇرىپ-اق ارىز جازا الادى. وعان قانداس مارتەبەسىن بەرىلەتىن. كەيىن ەلىمىزگە كەلگەننەن كەيىن جۇمىسقا تۇرۋى كەرەك. سونىمەن بىرگە قولىنا سەرتيفيكات بەرەمىز. ول قانداستارىمىز 50 پايىز جەڭىلدىكپەن ءۇي ساتىپ الۋعا نەمەسە وتباسى بانكىنە قارجىسىن قۇيىپ ءارى قاراي باسقا دا مۇمكىندىك الا الادى»، - دەيدى تامارا دۇيسەنوۆا.