«Qazaq Airan» YouTube ارناسىنا بەرگەن سۇحباتىندا بىرنەشە جىل بۇرىن وزبەكستاننان قازاقستانعا قونىس اۋدارعان تاريحشى ءارى جۋرناليست جۇمامۇرات ءشامشى ەلگە العاش كەلگەن جىلدارى توي-تومالاقتىڭ تىم كوپتىگىنە تاڭعالعانىن ايتتى، – دەپ حابارلايدى aqshamnews.kz
ونىڭ ايتۋىنشا، وزبەكستاندا جىل ىشىندە بار بولعانى بىرنەشە نەگىزگى مەرەكە عانا اتاپ وتىلەدى. ال قازاقستاندا مەرەكەلەر مەن ءتۇرلى اتاۋلى كۇندەر جىل بويى ۇزدىكسىز تويلاناتىنىن كورىپ، العاشىندا قاتتى تاڭعالعان. ونىڭ سوزىنشە، جاڭا جىل مەن ەسكى جاڭا جىل، ءتۇرلى حالىقارالىق جانە بەيرەسمي مەرەكەلەر، سونداي-اق تۋعان كۇندەردى كەڭ كولەمدە اتاپ ءوتۋ قالىپتى جاعدايعا اينالعان. قوعام بەلسەندىسى مۇنداي تويشىلدىقتىڭ بيۋدجەتكە دە سالماق سالىپ وتىرعانىن اتاپ ءوتتى.
سونداي-اق ول ءتىل ماسەلەسىنە دە توقتالىپ، قازاق كوپ شوعىرلانعان وڭىرلەردىڭ وزىندە انا ءتىلىنىڭ شۇبارلانىپ، ورىسشا جانە اعىلشىنشا سوزدەردىڭ ارالاسىپ كەتكەنىن سىنعا الدى. ءوزىنىڭ وسكەن ورتاسىندا قازاقى بولمىس پەن ءتىل تازالىعى ساقتالعانىن ايتىپ، قازىرگى جاعدايعا الاڭداۋشىلىق ءبىلدىردى.
قازىرگى تويلاردى قاتاڭ سىنعا العان جۇمامۇرات ءشامشى قازاق داستۇرىندە بۇگىنگىدەي استا-توك قىز ۇزاتۋ تويىنىڭ بولماعانىن دا تىلگە تيەك ەتتى. ونىڭ ايتۋىنشا، بۇرىن قىز ۇزاتۋ شاعىن، قاراپايىم تۇردە، ەڭ جاقىن تۋىستاردىڭ قاتىسۋىمەن عانا وتكەن، ال قازىرگى فورماتتاعى داڭعازالى تويلار كەيىنگى جىلدارى، اسىرەسە 2000-جىلداردان بەرى كۇرت كوبەيگەن. ول مۇنى باسەكەلەستىك پەن ورىنسىز ماقتاننىڭ سالدارى دەپ باعالاپ، توي مادەنيەتىن رەتتەيتىن مەملەكەتتىك دەڭگەيدەگى شارالار قاجەت ەكەنىن جەتكىزدى.