قاۋلى 2024 جىلعى 30 شىلدەدەن باستاپ كۇشىنە ەنەدى.
2024 جىلعى 5 شىلدەدەگى ۇلتتىق بانكتىڭ قاۋلىسىمەن ق ر ۇلتتىق ۆاليۋتاسىنىڭ بانكنوتتارى مەن مونەتالارىنىڭ تولەمدىلىگىن انىقتاۋ قاعيدالارىنا وزگەرىستەر مەن تولىقتىرۋلار ەنگىزىلدى، دەپ حابارلايدى Almaty-akshamy.kz
قۇجاتقا سايكەس، كەلەسى زاقىمدارى بار بانكنوتتار ەسكىرگەن بولىپ سانالادى:
بوياعىش زاتتارمەن بويالعان؛
بوگدە جازۋلارى بار، سونىڭ ىشىندە:
ۋلتراكۇلگىن ساۋلەمەن كورىنەتىن ارنايى حيميالىق ۇنتاقپەن وڭدەلگەن؛
ماشينامەن وقىلاتىن بەلگىلەردى جاۋىپ تۇرعان؛
جىرتىلعان بانكنوتتار، جەلىمدەلگەن نەمەسە جەلىمدەلمەگەن بولىكتەرى ءسوزسىز ءبىر بانكنوتقا تيەسىلى جانە بىرگە ۇلتتىق بانك بەلگىلەگەن بانكنوت ولشەمىنىڭ كەمىندە 70% قۇرايتىن؛
بۇرىشىنان نەمەسە شەتىنەن اۋدانىنىڭ 1%-دان استامىن جوعالتقان، ءبىراق ۇلتتىق بانك بەلگىلەگەن بانكنوت ولشەمىنىڭ كەمىندە 70% ساقتاعان؛
جىرتىقتارى بار، ءمولدىر جابىسقاق تاسپامەن جەلىمدەلگەن؛
ديامەترى 3 مم جانە ودان دا كوپ تەسىكتەرى، ويىقتارى بار، بانكنوتتاعى تەسىكتەردىڭ بولۋى ونىڭ وتەلگەنىن كورسەتەتىن جاعدايلاردى قوسپاعاندا؛
بانكنوت بەينەسىنىڭ جوعالۋىنا اكەلگەن ۇيكەلىستەرى بار؛
كۇيگەن جانە كۇيدىرىلگەن، ءبىراق ۇلتتىق بانك بەلگىلەگەن بانكنوت ولشەمىنىڭ كەمىندە 70% ساقتاعان؛
بەتكى نەمەسە ارتقى جاعىنىڭ لاستانۋى بار، بۇل بانكنوتتىڭ بەينەسى مەن جارىقتىعىنىڭ تومەندەۋىنە اكەلگەن. لاستانۋ دەپ شاڭنىڭ، كىردىڭ، مايلاردىڭ جانە باسقا دا لاستاۋشى زاتتاردىڭ بولۋى سالدارىنان بانكنوت بەتىنىڭ قارايۋىمەن سيپاتتالاتىن بانكنوتتاردىڭ جاعدايى تۇسىنىلەدى؛
قاعازى بورپىلداعان جانە قاتتىلىعىن جوعالتقان؛
بانكنوتتاردى ساقتاۋ جانە ءقاۋىپسىز تاسىمالداۋ قۇرىلعىلارىندا قولدانىلاتىن ارنايى بوياۋلارمەن بويالعان.
ۇلتتىق بانك بەلگىلەگەن ولشەمنىڭ 50% جانە ودان دا كوپ پايىزىن جوعالتقان بانكنوتتار، "ۇلگى"، "وبرازەس"، "SPECIMEN"، "مۋلياج" دەگەن جازۋى بار بانكنوتتار، سونداي-اق شىنايى بانكنوتتاردىڭ فراگمەنتتەرى بار جانە كەسىلگەن بانكنوتتار تولەم قابىلەتى جوق دەپ سانالادى.