بيىل ەڭ كوپ قولدان جاسالعان بانكنوتالار 2000 جانە 10 000 تەڭگەلىك بولىپ وتىر – ۇلتتىق بانك
قازاقستان ۇلتتىق بانكى (بۇدان ءارى – قۇب) مەن ەكىنشى دەڭگەيلى بانكتەر 2022 جىلدىڭ العاشقى 10 ايىندا 739 650 تەڭگەگە پاراپار قولدان جاسالعان 250 اقشا بەلگىسىن (247 بانكنوتا مەن 3 مونەتا) انىقتادى، دەپ حابارلايدى Almaty-akshamy.kz.
بۇل 2021 جىلدىڭ وسى كەزەڭىمەن سالىستىرعاندا 55%-عا از (457 جالعان اقشا بەلگىسى تاركىلەندى)، دەپ حابارلايدى قازاقپارات ق ر ۇلتتىق بانكى بانكنوتتار مەن مونەتالاردى ساراپتاۋ باسقارماسىنىڭ باستىعى اسقات مۇقامادييەۆتىڭ تۇسىندىرمەسىنە سىلتەمە جاساپ.
اتالعان قۇجاتتا بيىل نومينالى 2 000 تەڭگەلىك بانكنوتالار قولدان كوپ جاسالعانى (161 دانا) ايتىلعان. بۇل جالپى ساننىڭ 64%-ى. ودان كەيىنگى ورىنداردا نومينالى 10 000 تەڭگەلىك – 27 دانا (11%)، 5 000 تەڭگەلىك – 24 دانا (9%) جالعان بانكنوتالار تۇر، قالعان 16%-ى – باسقا نومينالدارعا تيەسىلى.
قولدان جاسالعان اقشالاردىڭ كوپ بولىگى الماتىدا تاركىلەندى – 126 دانا (50%)، شىعىس قازاقستان وبلىسىندا – 59، استانادا – 22 دانا.
قازاقستاندا جالعان بانكنوتالار كوپ جاعدايدا كومپيۋتەرلىك تەحنيكا مەن كادىمگى وفسەتتىك قاعازدا ءتۇرلى ءتۇستى پرينتەردىڭ كومەگىمەن جاسالادى. اقشانى قولدان جاساۋشىلار كورنەكى قورعانىش ەلەمەنتتەرىن ءتۇپنۇسقاعا مەيىلىنشە ۇقساتۋعا تىرىسادى.
قۇب ناقتى بانكنوتالاردى جالعان اقشادان كەز كەلگەن ادامعا ءوز بەتىنشە اجىراتۋعا كومەكتەسەتىن قاراپايىم ەرەجەسى بارىن ەسكە سالادى.
بارلىق بانكنوتادا كورۋ قابىلەتى ناشار ادامدارعا ارنالعان، قولمەن ۇستاعاندا جاقسى بىلىنەتىن شىعىڭقى جوعارى بەدەرلى ەلەمەنت تۇرىندە بەلگىلەر بار.
بانكنوتانىڭ ءتۇسى انىق ءارى ايقىن بولۋعا ءتيىس، سۋ تاڭباسى مەن نومينالدىڭ سيفرلىق بەينەسىن كورۋ ءۇشىن بانكنوتانى جارىققا ۇستاپ قاراعان دۇرىس.
بانكنوتا بەتىندەگى ۇزىك-ۇزىك تۇرىندە شىعاتىن جازبالارى بار جىپكە نازار اۋدارىڭىز، ونى جارىققا توسىپ قاراعاندا ءبىرتۇتاس ءجىپ بولىپ انىق كورىنەدى.
نومينالى 1 000، 2 000، 5 000، 10 000 جانە 20 000 تەڭگەلىك بانكنوتالاردا ءتۇرلى ءتۇستى بوياۋمەن سالىنعان سۋرەت تۇرىندەگى بەينەلەر بار ەكەنىن اتاپ وتكەن ءجون. بانكنوتانىڭ كولبەۋ بۇرىشىن وزگەرتكەن كەزدە بەينەلەر ءتۇسى جاسىل تۇستەن التىن تۇسكە دەيىن وزگەرەدى.
سونداي-اق، بارلىق بانكنوتادا بەدەر جاسايتىن ارنايى باسپا بار.
2022 جىلعى ۇلگىدەگى نومينالى 20 000 تەڭگەلىك بانكنوتادان جارتى تەرەزەدەگى گولوگرافيالىق جولاقتى كورۋگە بولادى. جولاقتىڭ ءتۇس الماسۋ جانە ديناميكالىق اسەرلەرى بار.
بانكنوتالاردى تەكسەرۋگە بىرنەشە مينۋت ۋاقىت كەتەدى، ەسەسىنە، كەز كەلگەن ادامعا اقشا بەلگىسىنىڭ قانشالىقتى ءتۇپنۇسقا ەكەنىن انىقتاۋعا كومەكتەسەدى. قولدان جاسالعان اقشانى ءتۇپنۇسقادان قالاي اجىراتۋعا بولاتىنى تۋرالى تولىعىراق مالىمەتپەن قۇب سايتىنان تانىسۋعا بولادى.
ايتا كەتەيىك، قازاقستاندىق تەڭگە الەمدە قولدان جاساۋدان ەرەكشە قورعالعان ۆاليۋتالاردىڭ ءبىرى. قۇب جاڭا بانكنوتالاردى شىعارۋ كەزىندە قورعاۋ ەلەمەنتتەرى سالاسىنداعى جاڭا ازىرلەمەلەردى جەتىلدىرۋ جانە پايدالانۋ تۇرعىسىنداعى جۇمىستاردى ۇدايىم جۇرگىزىپ وتىرادى.