بۇلىك كەزىندە 114 ادام زارداپ شەككەن
بۇگىن الماتى وبلىسىنىڭ اكىمى قانات بوزىمبايەۆ تالدىقورعان قالالىق كوپ سالالى اۋرۋحاناعا بارىپ، بۇلىك كەزىندە زارداپ شەككەن ازاماتتاردىڭ دەنساۋلىق جاعدايىن ءبىلدى، - دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
قانات بوزىمبايەۆ جارالانعان قاراپايىم ازاماتتارمەن جانە كۇشتىك قۇرىلىمدار وكىلدەرىمەن تىلدەستى. قىزمەتتىك مىندەتتەرىن ادال ورىنداپ، قايسارلىق پەن باتىرلىقتىڭ ۇلگىسىن كورسەتكەندەرى ءۇشىن اسكەري ماماندارعا العىس ءبىلدىردى. ولاردىڭ وتباسىلارىنا بارلىق قاجەتتى كومەك كورسەتىلەتىنىن ايتتى.
«ەڭ باستىسى - دەنساۋلىق. سىزدەردىڭ اياقتان تۇرىپ كەتۋلەرىڭىزگە بارلىق جاعدايدى جاساۋدامىز. قاجەت بولسا باسقا قالالاردان ءتيىستى مامانداردى شاقىرتامىز. ءتيىستى ەم شارالارىن تولىق قابىلداپ، تەزىرەك ساۋىعىپ شىعۋلارىڭىزعا تىلەكتەسپىن»، - دەدى قانات بوزىمبايەۆ.
تالدىقورعان قالالىق كوپ سالالى اۋرۋحانانىڭ ديرەكتورى جۇماحان مولداعۇلوۆتىڭ ايتۋىنشا، بۇل مەكەمەگە زارداپ شەككەن 114 ادام جۇگىنىپ، ونىڭ 25ء-ى اۋرۋحاناعا جاتقىزىلعان. قالعاندارىنا ءتيىستى امبۋلاتوريالىق ەم جاسالعان. كۇردەلى كەزەڭدە اۋرۋحانادا دارىگەرلەردىڭ كۇشەيتىلگەن بريگاداسى جۇمىس ىستەپ، زارداپ شەككەندەرگە جوعارى دەڭگەيدە مەديسينالىق كومەك كورسەتىلدى.
«بۇگىنگى كۇنى اۋرۋحاناعا تۇسكەن 25 ادامنىڭ 15ء-ى جازىلىپ شىقتى. وپەراسيا جاسالعان 10 ادام وڭالتۋ ەم شارالارىن قابىلداۋدا. ولاردىڭ دەنساۋلىعى بىرتە-بىرتە تۇزەلىپ كەلەدى»، - دەدى ج.مولداعۇلوۆ.