تاۋ ءتۋريزمى بۇكىل الەمدە تانىمال ءارى تابىستى سانالادى
الماتى تاۋ كلاستەرىن دامىتۋ ماسەلەلەرى بويىنشا ءتيىستى مينيسترلىكتەر جەتەكشىلەرى، وبلىس جانە قالا باسشىلىعى، ءىرى تاۋ-شاڭعى كۋرورتتارىنىڭ يەلەرى «دوڭگەلەك ۇستەل» باسىنا جينالدى. الماتى وبلىسىنىڭ اكىمى قانات بوزىمبايەۆتىڭ باستاماسىمەن ۇيىمداستىرىلعان شارادا الماتى تاۋ كلاستەرىنىڭ الەۋەتى، باسىمدىق بەرىلەتىن لوكاسيالارى، وزەكتى ماسەلەلەرى كەڭىنەن تالقىلاندى. جيىن قورىتىندىسىندا ءۇش جاقتى بىرلەسكەن ماستەر-جوسپار ازىرلەنەتىن بولادى، بۇل قۇجات الماتى وبلىسى مەن الماتى قالاسى جانە بيزنەس قاۋىمداستىقتىڭ الماتى اگلومەراسياسى اۋماعىندا باسەكەگە قابىلەتتى تۋريستىك ورتا قالىپتاستىرۋعا باعىتتالعان ءۇش جاقتى ءىس-شارالارىن ۇيلەستىرەتىن بولادى، - دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەزدەسۋدە الماتى وبلىسىنىڭ اكىمى قانات بوزىمبايەۆ جەتىسۋ ايماعىندا تابيعي-رەكرەاسيالىق، تاريحي-مادەني رەسۋرستاردىڭ مول بولۋى ءتۋريزمنىڭ بارلىق تۇرلەرىن، سونىڭ ىشىندە تاۋ ءتۋريزمىن دامىتۋعا زور مۇمكىندىك بەرىپ وتىرعانىن اتاپ ءوتتى.
«تاۋ ءتۋريزمى بۇكىل الەمدە تانىمال ءارى تابىستى سانالادى. بۇگىنگى كۇنى تاۋ ءتۋريزمى مەن قىسقى سپورت تۇرلەرىن جاڭا دەڭگەيدە دامىتۋ قاجەتتىلىگى تۋىنداپ وتىر. سوندىقتان الماتى تاۋ كلاستەرىن وركەندەتۋ ماسەلەلەرىن جۇيەلى شەشۋ ءۇشىن ءبىرىنشى كەزەكتە وسى سالادا جۇمىس ىستەپ جۇرگەن بيزنەس وكىلدەرىنىڭ پىكىرىن تىڭداۋ ءبىز ءۇشىن اسا ماڭىزدى. بۇگىنگى جيىندى وسى ماقساتتا وتكىزىپ وتىرمىز»، - دەدى قانات بوزىمبايەۆ.
مادەنيەت جانە سپورت ءمينيسترى داۋرەن ابايەۆ تۋريستىك سالاعا مەملەكەت تاراپىنان جاسالىپ وتىرعان قولداۋلار مەن ىنتالاندىرۋ شارالارى تۋرالى ايتىپ بەردى:
«تاۋ-شاڭعى قۇرال-جابدىقتارى مەن تەحنيكاسىن ساتىپ الۋ شىعىنىنىڭ 25% مەملەكەت تاراپىنان وتەلەدى. ءقازىر بۇل تەحنيكالاردىڭ ءتىزىمىن كەڭەيتۋ ماسەلەسى قارالۋدا. سول سياقتى تۋريستىك نىساندى، ياعني ورنالاستىرۋ ورىندارى، تۋريستەر كەلەتىن ورتالىقتار جانە باسقا دا وبەكتىلەردى سالۋ مەن قايتا جاڭعىرتۋ شىعىندارىنىڭ 10% وتەلەدى. ءبىز كاسىپكەرلىك كودەكسى شەڭبەرىندە باسىم دەپ تانىلۋى ءۇشىن ينۆەستيسيالىق جوبالار قۇنىنىڭ ەڭ تومەنگى شەگىن 2 ملن. ايلىق ەسەپتىك كورسەتكىشتەن 200 مىڭ اەك-كە دەيىن تومەندەتتىك»، - دەدى د.ابايەۆ. ول مينيسترلىك بۇل سالانى قولداۋ شارالارىن جالعاستىراتىنىن جانە ءوڭىر بيزنەسىن دامىتۋعا قاتىستى ۇسىنىستاردى قاراستىرۋعا دايىن ەكەندىگىن ايتتى.
ءوز سوزىندە ەكولوگيا، گەولوگيا جانەن تابيعي رەسۋرستار ءمينيسترىنىڭ ورىنباسارى ءاليا شالابەكوۆا تۇرمىستىق قاتتى قالدىقتاردى شىعارۋ مەن كارىز جۇيەلەرىنە قاتىستى ماسەلەلەردىڭ ورتاق جۇيەلى شەشىمى بولۋى كەرەكتىگىنە توقتالدى. بۇل رەتتە تۋريستەر ءۇشىن ەكولوگيالىق تازا ءارى قولايلى كليمات قالىپتاستىرۋدا بيزنەس وكىلدەرىمەن بىرلەسىپ جۇمىس ىستەۋگە دايىنبىز دەدى.
«راكۋرس كونسالتينگ» كومپانياسىنىڭ سەرىكتەس باسقارۋشىسى دوسىم قىدىربايەۆ مودەراتورلىق ەتكەن باسقوسۋدا الماتى تاۋ كلاستەرىن دامىتۋدىڭ ءتيىمدى جولدارى تۋرالى كاسىپكەرلەر پىكىرىلەرىن ءبىلدىردى. سولاردىڭ قاتارىندا «وي-قاراعاي لەسنايا سكازكا»، «اقبۇلاق»، «شىمبۇلاق»، «تاباعان رەسورت»، «كوك تاۋ» تاۋ-شاڭعى كۋرورتتارىنىڭ جانە «پيونەر» وتباسىلىق كۋرورتىنىڭ باسشىلارى دا سالانى دامىتۋ جولدارى تۋرالى ۇسىنىستارىمەن، جوسپارلارىمەن ءبولىستى. ايتىلعان پىكىرلەر نەگىزىنەن سەرۆيس ساپاسىن كوتەرۋ ءۇشىن ارنايى ماماندار دايارلاۋ، تۋريزم نىساندارىنا قوعامدىق كولىك قاتىناسىن جانە قوقىس وڭدەۋ ءىسىن ۇيىمداستىرۋ، جاساندى قار جاساۋ قۇرالىن ساتىپ الۋعا قارجىلاي قولداۋ كورسەتۋ، بالالاردىڭ تاۋدا تەگىن شاڭعى تەبۋىن مەكتەپ باعدارلاماسىنا ەنگىزۋ، ينجەنەرلىك ينفراقۇرىلىممەن قامتۋعا مەملەكەتتىك قولداۋ كورسەتۋ ماسەلەلەرىنە قاتىستى ايتىلدى. ماسەلەلەردى تالقىلاي كەلە كاسىپكەرلەر تاۋ كلاستەرىن دامىتۋ يدەياسى تەك بىرلەسە ارەكەت ەتكەندە عانا ىسكە اساتىنىن جەتكىزدى.
«ەشكىم دە تۋريستىك سالانى جەكە دارا دامىتا المايدى. تابىستى ناتيجەگە قول جەتكىزۋ ءۇشىن بۇل رەتتە مەملەكەت پەن بيزنەستىڭ كۇش-جىگەرىن بىرىكتىرۋىمىز كەرەك»، - دەدى «وي-قاراعاي لەسنايا سكازكا» تاۋ كۋرورتىنىڭ پرەزيدەنتى ەرلىك بالفانبايەۆ.
جيىندى وبلىس اكىمى قانات بوزىمبايەۆ قورىتىندىلادى:
«ەڭ الدىمەن كەزدەسۋگە قاتىسقان بارشالارىڭىزعا راحمەت ايتامىن. بۇگىنگى وتىرىس نەگىزىندە حاتتاما دايىندالىپ، وعان وسى ايتىلعان ۇسىنىس-پىكىرلەردىڭ بارلىعى ەنگىزىلەدى جانە جاۋاپتى ورگاندار بەلگىلەنەدى. 2019 جىلى قۇرىلىپ، جۇمىسى ءتيىمسىز ەكەنىن كورسەتكەن الماتى تاۋ كلاستەرى جوبالىق كەڭسەنىڭ قۇرامى مەن قۇرىلىمىن جانە جۇمىس ىستەۋ ءادىسىن قايتا قاراۋدى ۇسىنامىن. ونىڭ ورنىنا بيزنەس وكىلدەرىنىڭ قاتىسۋىمەن باسقارۋ كومپانياسىن قۇرۋ كەرەك. كلاستەردى دامىتۋعا باعىتتالعان بارلىق قۇجاتتاردى وزەكتەندىرۋ قاجەت. سونىمەن بىرگە ءىس-شارالارىمىزدى ۇيلەستىرەتىن تاۋ ءتۋريزمى كەڭەسىن قۇرۋىمىز كەرەك. ونىڭ قۇرامىنا بيزنەس وكىلدەرى، ءتيىستى سالالىق مينيسترلەردىڭ ورىنباسارلارى، وبلىس پەن قالا اكىمدەرىنىڭ تۋريزمگە جەتەكشىلىك ەتەتىن ورىنباسارلارى، باسقارما باسشىلارى كىرگەنى ءجون. كەڭەس توقسان سايىن وتىرىسىن وتكىزىپ، اعىمداعى ماسەلەلەردىڭ شەشىمىن جەدەل قاراستىرىپ، كەزەڭ-كەزەڭىمەن جاسالاتىن قادامداردى تالقىلاۋى ءتيىس. بارلىق دايىندالعان قۇجاتتار قايتا جانداندىرىلادى. ول ءۇشىن ءبىز الماتى تاۋ كلاستەرىن دامىتۋ بويىنشا ءۇش جاقتى بىرلەسكەن ماستەر-جوسپار ازىرلەۋىمىز كەرەك. وعان ەنگىزىلگەن جوبالار كوممەرسيالىق جاعىنان ءتيىمدى بولۋعا ءتيىس. ون كۇن ىشىندە سىزدەردەن ىسكە تەجەۋ بولىپ وتىرعان زاڭنامالار مەن نورماتيۆتىك قۇقىقتىق اكتىلەرگە قاتىستى وزگەرىستەر مەن تولىقتىرۋلار بويىنشا ناقتى ۇسىنىستار كۇتەمىز. ءبىز ماسەلەنى ابستراكتىلى تالقىلاۋدان ناقتى قادامعا كوشۋىمىز كەرەك. الماتى وبلىسىنىڭ ەكونوميكاسى ءۇشىن تۋريزم باسىمدىق بەرىلەتىن شەشۋشى سالانىڭ ءبىرى. سوندىقتان بۇل ماسەلەلەر ەرەكشە باقىلاۋىمدا بولادى»، - دەدى قانات بوزىمبايەۆ.