ەندى جەكە ءۇي يەلەرى مەن مۇلىك يەلەرى تابيعي گازعا قوسىلۋ ءۇشىن تەحنيكالىق شارتتاردى ونلاين الۋعا مۇمكىندىك الادى — eGov Mobile قوسىمشاسى ارقىلى. بۇل قىزمەت «QazaqGaz Aimaq» اق تۇتىنۋشىلارى ءۇشىن قولجەتىمدى جانە جەكە تۇلعالارعا تەگىن ۇسىنىلادى، دەپ حابارلايدى aqshamnews.kz
تەحنيكالىق شارتتار – بۇل وبەكتىنى گاز تاراتۋ جۇيەسىنە قوسۋعا مۇمكىندىك بەرەتىن قۇجات.
وسى قىزمەتتى تەك مۇلىك يەلەرى پايدالانا الادى. قىزمەتكە ءوتىنىش بەرۋ ءۇشىن پايدالانۋشى قوسىمشادا كورسەتىلگەن بارلىق مىندەتتى ورىستەردى تولتىرىپ، مۇلىككە تىركەلگەن قۇقىقتار تۋرالى اقپاراتتى راستاۋى قاجەت.
قىزمەتتى الۋ ءۇشىن نە ىستەۋ كەرەك؟
-
eGov Mobile قوسىمشاسىنا كىرۋ:
- قوسىمشاعا اۆتوريزاسيادان ءوتىپ، «قىزمەتتەر» ءبولىمىن اشىڭىز.
- «مۇلىك جانە تكش» ءبولىمىن تاڭداپ، «گاز تاراتۋ جۇيەلەرىنە قوسىلۋعا تەحنيكالىق شارتتار بەرۋ» قىزمەتىن تاڭداڭىز.
-
ءوتىنىشتى تولتىرۋ:
- وبەكتىنىڭ ءتۇرىن كورسەتىپ، قوسىلۋعا قاجەتتى مۇلىكتى تاڭداڭىز.
- وبەكتىنىڭ تەحنيكالىق پاسپورتىن جۇكتەڭىز.
- تەحنيكالىق شارتتىڭ ءتۇرىن، گاز جۇيەسىنە قوسىلۋ سەبەبىن جانە گاز تۇتىنۋ كولەمىن كورسەتىڭىز.
- گاز جابدىقتارىنىڭ ءتۇرىن تاڭداپ، سانى مەن كولەمىن ەنگىزىڭىز.
-
ءوتىنىشتى راستاۋ:
- ءوتىنىشتى Face ID نەمەسە Touch ID ارقىلى قول قويىڭىز.
ءوتىنىش دۇرىس تولتىرىلسا، «QazaqGaz Aimaq» اق گاز تاراتۋ ۇيىمى تەحنيكالىق شارتتاردى بەرەدى نەمەسە نەگىزدەلگەن باس تارتۋدى حابارلايدى.
تەحنيكالىق شارتتاردى بەرۋدەن باس تارتۋ سەبەپتەرى:
- قولجەتىمدى قۋات، سىيىمدىلىق نەمەسە گاز تاراتۋ جۇيەسىنىڭ وتكىزۋ قابىلەتىنىڭ جەتىسپەۋشىلىگى.
- گاز تاراتۋ جۇيەلەرى نەمەسە قاجەتتى مۇلىك جوقتىعى.
قىزمەت كورسەتۋ مەرزىمى:
- تەحنيكالىق قيىندىقتارى از وبەكتىلەر ءۇشىن — 5 جۇمىس كۇنى.
- كۇردەلى وبەكتىلەر ءۇشىن — 10 جۇمىس كۇنى.
eGov Mobile قوسىمشاسى ارقىلى گازعا قوسىلۋ ءوتىنىشىن بەرۋ — بۇل ۋاقىتتى ۇنەمدەپ، گازعا قوسىلۋ پروسەسىن جەڭىلدەتەتىن ىڭعايلى جانە جىلدام ءادىس.