الماتىنىڭ كوممۋنالدىق قىزمەتى نوسەر جاڭبىرعا بايلانىستى كۇشەيتىلگەن جۇمىس رەجيمىنە اۋىستىرىلدى، - دەپ حابارلايدى aqshamnews.kz.
«قازگيدرومەت» رمك مالىمەتىنشە، الماتىدا 20 ماۋسىم كۇنى ساعات 15:00-دەن باستاپ 21 ماۋسىم ساعات 02:00-گە دەيىن جاڭبىر جاۋادى، كەي جەرلەردە 20 مم-گە دەيىن قاتتى جاۋىن-شاشىن، نايزاعاي، بۇرشاق جاۋۋى مۇمكىن. مەتەورولوگتار بىرنەشە ساعات ىشىندە ماۋسىم ايىنا ءتان جاۋىن-شاشىننىڭ ۇشتەن بىرىنەن استامى جاۋۋى مۇمكىن ەكەنىن بولجاپ وتىر (ماۋسىم ايىنىڭ نورماسى – 59 مم). جەل وڭتۇستىك-شىعىستان سولتۇستىك-باتىسقا اۋىسىپ، جىلدامدىعى 3-8 م/س، ەكپىنى 15-20 م/س-كە دەيىن جەتەدى. كۇندىز اۋا تەمپەراتۋراسى +28…+30 °س بولادى.
20-نان 21 ماۋسىمعا قاراعان ءتۇنى وتكىنشى جاڭبىر مەن نايزاعاي جاۋادى، كۇندىز جاۋىن-شاشىن بولمايدى. اۋا تەمپەراتۋراسى تۇندە +17…+19 °س، كۇندىز +31…+33 °س.
22 ماۋسىم كۇنى – كوشپەلى بۇلت شىعادى، كۇندىز وتكىنشى جاڭبىر مەن نايزاعاي بولۋى مۇمكىن. تۇندە اۋا تەمپەراتۋراسى +20…+22 °س، كۇندىز +28…+30 °س.
سۋ باسۋ ءقاۋپىنىڭ الدىن الۋ ماقساتىندا 52 ءموبيلدى جەدەل بريگادا كەزەكشىلىككە قويىلدى. ولار موتوپومپا جانە قۇرال-جابدىقپەن جابدىقتالعان.
اۋدان اكىمدىكتەرىندە اتقارىلىپ جاتقان جۇمىستاردى باقىلاۋ ماقساتىندا تاۋلىك بويى كەزەكشىلىك ۇيىمداستىرىلادى.
كۇندىزگى ۋاقىتتا 426 ارنايى تەحنيكا، 26 موتوپومپا جانە 895 جۇمىسشى جۇمىلدىرىلعان.
«الماتى قالاسىنىڭ قۇتقارۋ قىزمەتى» شجق مكك تاراپىنان 12 تەحنيكا جانە 55 قىزمەتكەر، تجد تاراپىنان 58 تەحنيكا جانە 245 ادام جۇمىلدىرىلدى.
بۇعان دەيىن كوممۋنالدىق قىزمەتتەر سۋ كەدەرگىسىز اعۋى ءۇشىن ارىق جۇيەلەرىن، وتكەلدەردى جانە قوقىستى ءسۇزىپ الىپ قالاتىن قۇرال ارقىلى تازالاۋ جۇمىستارىن جۇرگىزگەن.
قالا تۇرعىندارى مەن قوناقتارىنا ۇسىنىستار:
* اۋا رايىنىڭ قولايسىزدىعىنا بايلانىستى تاۋعا بارماڭىز.
* اعاشتار قۇلاپ، ەلەكتر جەلىلەرى ءۇزىلۋى مۇمكىن بولعاندىقتان كولىكتى جول جيەگىنە قويماڭىز.
ارىقتاردى، جاڭبىر سۋى اعىندارىن جانە سۋ اعاتىن ارنالارعا تۇرمىستىق قالدىقتار مەن قوقىس تاستاماۋدى وتىنەمىز.
ەرەجەنى بۇزۋشىلار قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 505-بابى – «قالالار مەن ەلدi مەكەندەردiڭ اۋماقتارىن كوركەيتۋ قاعيدالارىن بۇزۋ، سونداي-اق قالالار مەن ەلدى مەكەندەر ينفراقۇرىلىمى نىساندارىن بۇزۋ، جاسىل ەكپەلەرىن جويۋ جانە ءبۇلدىرۋ» بويىنشا اكىمشىلىك جاۋاپكەرشىلىككە تارتىلادى.