قالا تۇرعىندارى ءۇشىن قالانىڭ باس گازەتتەرىن تەگىن تاراتۋ اكسياسىن باستادى.
“Alatay aqparat” مەدياحولدينگى وتكەن اپتادان باستاپ قالا تۇرعىندارى ءۇشىن قالانىڭ باس گازەتتەرىن تەگىن تاراتۋ اكسياسىن باستادى. بۇگىنگى شارا اۋەزوۆ اۋدانىنىڭ حالىققا قىزمەت كورسەتۋ ورتالىعى مەن №1 قالالىق كلينيكالىق اۋرۋحاناسىندا ۇيىمداستىرىلدى، دەپ حابارلايدى Almaty-akshamy.kz.
- انام “Almaty aqshamy” گازەتىنىڭ بىردە-بىر ءنومىرىن جىبەرمەي وقيدى. ەلدەگى، اسىرەسە، قالاداعى سوڭعى جاڭالىقتاردى وسى گازەتتەن وقىپ، بىزگە ايتىپ وتىرادى، - دەيدى گۇلجان ەسىمدى اۋەزوۆ اۋدانىنىڭ تۇرعىنى.
كۇلاش، زەينەتكەر:
- گازەتتى ءۇي جاقتاعى دۇڭگىرشەكتەن ارنايى بارىپ ساتىپ الامىن. بارۋعا مۇمكىندىك بولماي قالسا، ساتۋشى قىزعا حابارلاسىپ: «ماعان گازەتتىڭ جاڭا ءنومىرىن الىپ قوي» دەپ ايتامىن. ايتپەسە، دۇڭگىرشەككە گازەت كەلگەن بويدا بىردەن ءوتىپ كەتەدى. وتە ۇنايدى، جاقسى گازەت. ءوزىمىزدىڭ انا تىلىمىزدە ەلدەگى جاڭالىقتار مەن جاقسى جاعىمدى ماقالالاردى وقىپ تۇرامىن. گازەت شىققالى تۇراقتى وقىرمانىمىن. قازاق تىلىندە وسى گازەتتى وقيمىن. جاقسى جاڭالىقتاردى ءجيى جازسىن دەگەن تىلەگىم بار.
- “ Almaty aqshamy”، “ۆەچەرنيي الماتى” گازەتتەرى - مەنىڭ جاستىق شاعىمنان كەلە جاتقان باسىلىمدار. ءقازىر ءبىز بارلىق اقپاراتتى الەۋمەتتىك جەلىلەر ارقىلى وقيمىز. ءبىراق گازەت قالاداعى اقپاراتتىڭ قاينار كوزى بولىپ قالا بەرەدى. كەيدە ءبىز گازەتتەگى اقپاراتتى، وقىلىمدى ماقالالاردى الەۋمەتتىك جەلىدەن كورمەيمىز. ەگدە جاستاعى ادامدار ۇيالى تەلەفون، الەۋمەتتىك جەلىنى پايدالانا بەرمەيدى، ۇناتپايدى. ولار گازەت-جۋرنالداردى كوبىرەك وقۋعا داعدىلانعان. گازەت بەتتەرىندە الماتى قالاسىنىڭ ءومىرى تۋرالى وڭ پىكىرلەر مەن جاقسى جاڭالىقتار كوپ بولسىن. جاقسىلىقتىڭ جارشىسىنا اينالسىن، - دەدى Smart Health University City سەنىمگەرلىك باسقارۋىنداعى الماتى قالاسىنىڭ №1 قالالىق كلينيكالىق اۋرۋحاناسىنىڭ باسقارما ءتوراعاسى ەرنەست قالييەۆ.
ۇستاز-زەينەتكەر اسىلايىم تەمىرالييەۆا گازەتتىڭ ءبىزدىڭ قوعامعا وتە قاجەت ەكەنىن اتاپ ءوتتى.
- گازەت ارقىلى جاڭالىقتاردان حاباردار بولىپ وتىرامىز. قاراپايىم حالىقتىڭ جاعدايى، اۋىلدار مەن شەتكى ايماقتاردىڭ ءومىرى تۋرالى جازۋ قاجەت دەپ سانايمىن. مەن اۋا رايى، كينو، ساياسات ت.ب. تۋرالى جاڭالىقتاردى وقيمىن. باسىلىمداردان باس تارتپاۋ كەرەك – بۇل مادەنيەت پەن ينتەللەكتتى قالىپتاستىرادى، - دەدى 85 جاستاعى اسىلايىم تەمىرالييەۆا.
