اللا تاعالا پەندەسىنىڭ كەيبىر ساۋاپتى امالدارىنىڭ دارەجەسىن قاجىلىقتىڭ ساۋابىمەن تەڭەستىرگەن. قاجىلىق – بەس پارىزدىڭ ءبىرى. سوندىقتان ءاربىر مۇسىلمان ومىرىندە ءبىر مارتە قاجىلىق پارىزىن وتەۋگە مىندەتتى. دەگەنمەن، دىنىمىزدە قاجىلىقتىڭ ساۋابىمەن تەڭ تۇسەتىن امالدار دا جوق ەمەس ەكەن. بۇل امال قاجىلىق پارىزىن الماستىرا الماسا دا، ساۋابى ۇشان-تەڭىز.
تازا نيەت
ەڭ اۋەلى نيەتتىڭ تازالىعى مۇسىلمان ادام ءۇشىن اسا ماڭىزدى. قيامەت كۇنى بولعاندا، ءاربىر پەندە ءوزىنىڭ امال داپتەرىن كورەدى، سوندا اراسىنان قاجىلىق، زەكەت، ءتىپتى ساداقانىڭ دا ساۋابىن كورەدى. «بالكىم، بۇل مەنىڭ امال داپتەرىم ەمەس شىعار. مەن بۇلاردى جاساعان جوق ەدىم عوي»، - دەيدى ەكەن پەندە. سوندا اللا تاعالا قۇلىنا: «بۇل سەنىڭ امال داپتەرىڭ»، – دەيدى. الگى ادام جاراتۋشىعا: «ۋا، جاراتۋشى يەم! مەن بۇل امالداردى جاساعان جوقپىن»، - دەيدى. حاق تاعالا بولسا: «سەنىڭ بۇل امالداردى جاساماعانىڭدى بىلەمىن. الايدا سەنىڭ نيەتىڭ: «ەگەر قاراجاتىم بولسا، مەشىت سالار ەدىم، مۇقتاجدارعا جاردەمدەسىپ، قاجىلىققا باراتىن ەدىم» دەپ تۇراتىن. نيەت-ىقىلاسىڭ شىنايى ءارى تەك مەنىڭ رازىلىعىما قول جەتكىزۋ بولعاندىقتان، نيەتىڭدەگى امالداردىڭ ساۋابى دا جازىلدى»، – دەيدى.
مەشىتكە دارەتپەن بارۋ
اللا ەلشىسى: «كىمدە-كىم دارەت الىپ، جاماعاتپەن ناماز وقۋ ءۇشىن مەشىتكە بارسا، يحرام كيىپ، قاجىلىق پارىزىن وتەگەندەي ساۋاپقا يە بولادى. ال ەگەر دۇحا نامازىن وقيتىن بولسا، كىشى قاجىلىقپەن تەڭ ساۋاپقا كەنەلەدى».
ءناپىل ناماز وقۋ
پايعامبارىمىز: «كىمدە-كىم تاڭ نامازىن مەشىتتە جاماعاتپەن وقىپ، كۇن شىققانشا زىكىر ەتىپ (اللانى ەسكە الۋ)، كۇن شىققاننان سوڭ ەكى باس ءناپىل ناماز وقىسا، ۇلكەن قاجىلىق پەن ۋمرانىڭ ساۋابىنداي ساۋاپقا كەنەلەدى»، – دەگەن.
مەشىتتە ءبىلىم بەرۋ نەمەسە ءبىلىم الۋ
«اللا ەلشىسى: «كىمدە-كىم ءبىلىم الۋ ءۇشىن نە بولماسا ءبىلىم ۇيرەتۋ ءۇشىن مەشىتكە باراتىن بولسا، قابىل بولعان قاجىلىقتىڭ ساۋابىنداي ساۋاپقا يە بولادى»، – دەگەن.
اتا-انانىڭ رازىلىعى
بىردە پايعامبارىمىزدان ءبىر ساحابا: «مەن اللا جولىندا قىزمەت ەتكىم كەلەدى، نە قىزمەت جاساۋعا بولادى؟» – دەپ سۇرايدى. ءاز ەلشى الگى ساحابادان: «اكە-شەشەڭ ءتىرى مە؟» – دەپ سۇراعاندا: «انام بار»، – دەپ جاۋاپ بەرەدى. سوندا اللا ەلشىسى: «ەندەشە، اناڭا قۇرمەت كورسەتىپ قال. اناڭنىڭ رازىلىعىنا قول جەتكىزۋدىڭ جولدارىن تاپ. سوندا قاجىلىق پەن ۋمرانىڭ ساباۋىنداي ساۋاپقا كەنەلەسىڭ»، – دەگەن ەكەن.
«اlmaty-akshamۋ»، №4 (6297) 12 قاڭتار، 2023 جىل