قاجىلىققا بارىپ قامالعاندار

جالعان ۆيزامەن قاجىلىققا بارىپ، قاماۋعا الىنعان 300-دەن استام قازاقستاندىق بوساتىلدى – ءسىم

قاجىلىققا بارعان جۇزدەگەن قازاقستاندىق قاماۋعا الىندى، ونىڭ سەبەبى ۆيزا جارامسىز بولعان. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz. 

«سىرتقى ىستەر مينيسترلىگىنىڭ دجيددا قالاسىنداعى باس كونسۋل اتىنا ءبىزدىڭ ازاماتتارىمىزدان ساۋد ارابياسىنداعى پوليسيا بولىمىندە قاماۋدا ەكەندىگى تۋرالى حابار ءتۇستى. ول بويىنشا كومەك كورسەتىلدى. ۇستالعان قاجىلاردىڭ بارلىعىندا قاجىلىققا جارامايتىن تۋريستىك ۆيزا بولعان. باس كونسۋل ءوز قىزمەتكەرلەرىمەن بىرگە دەرەۋ پوليسيا بولىمىنە بارىپ، ولاردى بوساتىپ، قوناق ۇيگە ورنالاستىرۋعا كومەكتەستى. كەيبىر مالىمەتتەرگە سايكەس، ساۋد ارابياسىنىڭ اۋماعىنا جالعان ۆيزامەن 300-دەن استام ازامات بارعان. بارلىق قاجىلاردىڭ ورنالاسقان جەرىن باقىلاۋ مۇمكىن ەمەس بولماي تۇر. سەبەبى، قاماۋدان بوساتىلعاننان كەيىن 100-دەن استام قاجى بىرنەشە اۆتوبۋسپەن ءوز بەتىنشە كەتىپ قالعان»، - دەدى ايبەك سمادياروۆ ۆەدومستۆودا وتكەن باسپا ءسوز ءماسليحاتىندا.

ەسكە سالساق، وسىدان بىرەر كۇن بۇرىن قاجىلىققا بارعان قازاقستاندىقتاردىڭ جالعان ۆيزامەن ۇستالىپ، قاماۋعا الىنعانى تۋرالى حابار تاراعان ەدى. بولعان جايتقا قاتىستى قازاقستان مۇسىلدارى ءدىني باسقارماسى تۇسىنىك بەردى.