التىن جۇرەكتى جاندار ماراپاتتالدى
قايىرىمدىلىق قانىندا بار قازاق حالقى سوڭعى جىلدارى بۇل باعىتتاعى جۇمىستاردى ءتىپتى ۇدەتە ءتۇستى. قوعامىمىزدا جەكەلەگەن قايىرىمدى جانداردىڭ قولداۋىمەن ءۇيلى بولعان، ەمىنە قاراجات جينالعان نەمەسە مۇقتاجدىعىنا قايىرىمدىلىق ارقىلى قولى جەتكەن ازاماتتار كوبەيە ءتۇستى. ءوز كەزەگىندە مەملەكەت تاراپىنان دا ءتۇرلى جۇمىستار قولعا الىنىپ ونلاين ساداقا بەرۋ جولدارى جەتىلدىرىلىپ، ەلىمىزدە ەرىكتىلەر جىلىنىڭ جاريالانۋى، قايىرىمدىلىق تۋرالى زاڭ جوباسى قولعا الىنىپ، ەرىكتىلەر سانىنىڭ ەسەلەپ ءوسۋى، قايىرىمدىلىق جاساعىسى كەلەتىندەردىڭ سانىنىڭ وسۋىنە دە ىقپال ەتتى. ارينە مۇنداي جاعدايدا ولاردى ىنتالاندىرىپ، قوعام تاراپىنان قولداپ تا وتىرۋ قاجەت. وسىنى ماقسات ەتكەن ۇلت جاناشىرى دينارا بەردىمۇرات وتكەن اپتادا ءبىر توپ قايىرىمدى ازاماتتاردى «التىن جۇرەك» نوميناسياسىمەن ماراپاتتادى.
ماراپاتتالعانداردىڭ بارلىعى قالتاسى قالىڭ بولماسا دا قايىرىمدىلىق جاساۋدى ماقسات ەتكەن قاراپايىم جاندار. سول ماقساتتارىنىڭ ارقاسىندا كوپ بولىپ بىرىگىپ، تامشىدان قۇرالعان تەڭىزدەي مەيىرىمىنىڭ ارقاسىندا تالاي مۇقتاجدىڭ كادەسىنە جاراپ وتىر.
شارانىڭ اشىلۋىنا ءسوز العان ەل جاناشىرى، جاقىندا عانا مەملەكەت باسشىسى قاسىم-جومارت كەمەل ۇلى توقايەۆتىڭ العىس حاتىمەن ماراپاتتالعان، "نامىس"، "باتىر شاپاعاتى" ءتوس بەلگىلەرىنىڭ يەگەرى جۇماعالي گۇلنار ءىزىمعالي قىزى مۇنداي شارالاردىڭ ماڭىزى زور ەكەنىن اتاپ ءوتتى.
«التىن جۇرەك» شاراسىن ۇيىمداستىرۋشى دينارا بەردىمۇرات حانى:
«مەملەكەت باسشىسى قاسىم-جومارت توقايەۆ قازاقستاندا قايىرىمدى ازاماتتاردىڭ ءتىزىمى جاسالۋى قاجەت ەكەنىن اتاپ وتكەن بولاتىن. «سونىمەن قاتار، بىزگە الەۋمەتتىك باعىتتالعان قىزمەتتى ىنتالاندىرۋ مەن ىنتالاندىرۋدىڭ ناقتى جانە ءتيىمدى قۇقىقتىق تەتىكتەرى قاجەت» دەگەن ەدى. وسى باعىتتا «التىن جۇرەك» شاراسىن ۇيىمداستىرىپ قايىرىمدى جانداردىڭ ارەكەتتەرى قوعامنىڭ قولداۋىنا يە ەكەنىن، مىنا الەم مەيىرىمدى ازاماتتارمەن ادەمى ەكەنىن سەزىندىرگىم كەلدى. ۇلتىمىزدا قالىپتاسقان ءداستۇر بويىنشا كوپ ادام قايىرىمدى ىس-ارەكەتىن جاسىرۋعا تىرىسادى. جاسىرىن قالايىن دەپ جاتادى. بۇل دۇرىس تا شىعار. ءبىراق ولاردىڭ ارەكەتىن باسقالارعا ۇلگى بولۋى كەرەك. دامىعان ەلدەردە قايىرىمدىلىق شارالارى دۇرىس جولعا قويىلعان. الاياقتار ارالاسىپ كەتۋى نەمەسە قايىرىمدىلىق نيەتتەرىنىڭ جولدان باسقاعا بۇرىلىپ كەتۋىنە جول جوق. قازىرگى تاڭدا ەلىمىزدە قولعا الىنعان شارالاردىڭ ارقاسىندا مۇنداي كەلەڭسىزدىكتەر تىيىلارىنا سەنەم. مەملەكەت باسشىسى دا «مەنىڭ تاپسىرمام بويىنشا قايىرىمدىلىق تۋرالى جاڭا زاڭ دايىندالۋدا، ول وسى سالاداعى بار ولقىلىقتاردى جويادى. قايىرىمدىلىق جانە ەرىكتىلەر ۇيىمدارى ولارعا جۇمىس جاساۋ ءۇشىن قاجەتتى جاعدايلاردى، ونىڭ ىشىندە مەملەكەتپەن جانە بيزنەسپەن قامتاماسىز ەتەتىن ناقتى قۇقىقتىق مارتەبەنى الۋى كەرەك» دەگەن بولاتىن. سوندىقتان مەنىڭ بۇگىنگى وتكىزىپ وتىرعان شارام مەملەكەت باسشىسىنىڭ وسى ويىن قولداۋ ماقساتىندا قولعا الىنعان ەدى» دەيدى «التىن جۇرەك» شاراسىن ۇيىمداستىرۋشى دينارا بەردىمۇرات.
ماراپاتتالعان جاندار دا ەلىمىزدىڭ ءار قيىرىنان جينالعان. ياعني شارا ۇيىمداستىرۋشىلارى ماراپاتقا لايىق جانداردى رەسپۋبليكا بويىنشا ىزدەستىرگەن.
ماسەلەن تىلەۋباي قىزى راۋشان قىزىلوردا قالاسىنان. «ونداسىن ي ك» جاۋاپكەرشىلىگى شەكتەۋلى سەرىكتەستىكتىڭ باسشىسى ءارى قۇرىلتايشىسى. قازىرگى تاڭدا 60 شاقتى ايەل انالاردى جۇمىسپەن قامتىپ وتىر. ءتىپتى ءبىراز قىز-كەلىنشەكتەردى ءوز قاراجاتىمەن كۋرستار وقىتىپ اسپاز، كونديتەر ماماندىقتارىن الىپ بەرىپ، جۇمىسقا قوسىپ، ولاردىڭ وتباسىلىق ماسەلەلەرىن دە نازارىنان تىس قالدىرماعان. جىل سايىن رەسپۋبليكالىق «مەكتەپكە جول» شاراسىنا دا قولداۋ كورسەتەدى. وسىنداي ىستەرگە مۇرىندىق بولعانى ءۇشىن قىزىلوردا وبلىسى اكىمىنەن، قالالىق ءبىلىم بولىمىنەن «العىس حاتپەن، گراموتالارمەن» ماراپاتتالعان. تاعى ءبىرى جىل سايىن بالالاردى قورعاۋ كۇنىنە وراي بالالار ۇيىنە قوماقتى قايىرىمدىلىق شارالارىن جاساۋدى ادەتكە اينالدىرسا، تاعى ءبىرى جالعىز باستى انالاردى قولداپ، ۇنەمى ولاردى ءۇيلى، كاسىپتى ەتۋگە تىرىسىپ جۇرگەن ادامدار. ءدال وسىنداي ءجۇز شاقتى ازاماتتى «التىن جۇرەككە» لايىق كورگەن شارادا «امانات» پارتياسىنىڭ وكىلدەرى كەلىپ ماراپاتتارىن ءوز قولدارىمەن تاپسىردى.
"التىن جۇرەكتى" جاندارعا ماراپاتىن تاپسىرعان قارجىلىق ساۋاتتىلىق جانە بيزنەستى جۇيەلەۋ ساراپشىسى، ينۆەستور، كاسىپكەر، "نامىس" توسبەلگىسىنىڭ يەگەرى ەسەنگەلدين جەڭىس پەن كاسىپكەر، "نۇراريمان" بالاباقشاسىنىڭ جانە قۇرىلىس كومپانياسىنىڭ باسشىسى، ۇلت جاناشىرى شايعالييەۆا باقىت عالي قىزى ماراپاتتالعانداردىڭ بارلىعى قۇرمەتكە لايىق ەكەنىن اتاپ ءوتتى.
وسى ورايدا دينارا بەردىمۇرات «نەگىزى ەلىمىزدە قايىرىمدى جاندار كوپ. ولار كەيدە كومەكتەرىن ناقتى قايدا باعىتتارىن بىلمەي جاتادى. بىرنەشە رەت بالالار ۇيىنە نەمەسە دسپ-مەن اۋىراتىن بالالارعا ارناپ شارالار ۇيىمداستىرۋ كەزىندە وسىنى ءتۇسىندىم. سوندىقتان قايىرىمدىلىق ىستەرىنىڭ جۇيەلەنگەنى، قايىرىمدىلىقتىڭ ناعىز مۇقتاج جاندى تاۋىپ بارعانى ماڭىزدى. الداعى ۋاقىتتا قايىرىمدىلىق باعىتىنداعى ىستەردى كوبەيتىپ، مەسەناتتاردى ىنتالاندىرىپ وتىرۋ شارالارىن جالعاستىرا بەرۋىمىز كەرەك. ويتكەنى قايىرىمدىلىق جۇرەكتەردى جۇمسارتادى، قوعامىمىزدى قايىرىمدى ەتە تۇسەدى» دەيدى.