تازالىق پەن تارتىمدىلىق ەگىز ۇعىم. تازالىق بار جەردە ادام كوزىنە جاعاتىن تارتىمدىلىق تا بولادى. ال الماتى سىندى الىپ مەگاپوليستە كۇندەلىكتى تازالاۋ جۇمىستارىن جۇرگىزۋ ءتىپتى ماڭىزدى. قالامىزعا ءوز جۇمىسىمەن كورىك بەرىپ، قىستا قاردان، جازدا قوقىستان تازارتىپ جۇرگەن جاۋاپتى مەردىگەر ۇيىمداردىڭ ءبىرى – «التىن تازالىق» ج ش س.
2023 جىلدىڭ قاڭتارىندا قۇرىلعان كومپانيا جاس بولسا دا، باس بولىپ، وزىنە تاپسىرىلعان جۇمىستاردى جاۋاپكەرشىلىكپەن اتقارىپ وتىر. مەردىگەر كومپانيا 350 مىڭنان استام ادام تۇراتىن الاتاۋ اۋدانىندا ماگيسترالدىق كوشەلەردى، كولىك ايرىقتارى مەن شاعىناۋدانداردى كەشەندى سانيتارلىق تازالاۋمەن اينالىسادى. كومپانيا ديرەكتورى قايرات جۇمىربايەۆتىڭ ايتۋىنشا، «التىن تازالىق» قاراماعىندا بۇگىنگى كۇنى 50 ارنايى تەحنيكا بار. سونداي-اق، ماشينا جۇرگىزۋشىلەرىن مەن وزگە قىزمەتكەرلەردى قوسپاعاندا اۋدان تازالىعىن قامتاماسىز ەتەتىن 130 جۇمىسشى جۇمىس ىستەيدى.
– وتكەن جىلى بىزگە تاپسىرىلعان بارلىق جۇمىستاردى جوعارى دەڭگەيدە ورىندادىق. كۇندەلىكتى مىندەتىمىزگە – ماگيسترالدىق جانە اۋدان كوشەلەرىن كۇتىپ ۇستاۋ جۇمىستارى كىرەدى. ناقتى ايتقاندا، جازعى ۋاقىتتا: كوشەلەردى جۋۋ، ولاردى تازالىقتا ۇستاۋ، كوگالداعى شوپتەردى كەسۋ، تروتۋارلاردى سانيتارلىق تازالاۋ جانە ت.ب. ال قىسقى ۋاقىتتا ايتىلعان مىندەتتەرگە كوشەلەردى قاردان تازالاۋ جانە ونى شىعارۋ، سونداي-اق كوكتايعاققا قارسى ماتەريالداردى سەبۋ جۇمىستارى قوسىلادى. بيىل مىندەتتەرىمىز ارتىپ، گابيون (وزەن جاعالاۋىندا تاس ۇستىنەن قويىلعان تور) ارنالارىن جانە جەراستى وتكەلدەرىن كۇتىپ ۇستاۋ ءۇشىن جاۋاپكەرشىلىك الدىق، – دەدى «التىن تازالىق» جشس-ىنىڭ ديرەكتورى قايرات جۇمىربايەۆ.
- كومپانيا دەرەكتەرىنە سايكەس، «التىن تازالىق» قىزمەتكەرلەرى 2023 جىلدىڭ جازعى ماۋسىمىندا ۇزىندىعى – 528 132 م، ال اۋدانى – 4 185 133 م² بولاتىن ايماقتى تازالاعان. ال قىسقى كەزەڭدە بارلىعى 323 رەيس جاساپ، 5168 م³ قاردى قالا سىرتىنا شىعارعان. وعان قوسا، مەردىگەر ۇيىمنىڭ ارنايى تەحنيكالارى 7 مىڭ تونناعا جۋىق كوكتايعاققا قارسى ماتەريال پايدالانعان. بارلىعى الاتاۋ اۋدانىندا 11 ماگيسترالدىق داڭعىلدىڭ، 9 اۋداندىق ماڭىزى بار جانە 354 جەرگىلىكتى كوشەنىڭ تازالىعى مەن تارتىمدىلىعى ءۇشىن «التىن تازالىق» قىزمەتكەرلەرى جۇمىس ىستەگەن.
– جۇمىسىمىزدىڭ ەرەكشەلىگىنە قاراي ءبىز ءوز اۋماعىمىزدى تاۋلىك بويى باقىلاپ، كەزەكشىلىكتە بولامىز. توتەنشە جاعداي كەز كەلگەن ۋاقىتتا ورىن الۋى مۇمكىن. سوندىقتان تۇندە ەكى بريگادامىز دايىن وتىرادى. قىستا قار قالىڭ جاۋعان كۇندەرى جۇمىسشىلارىمىزدىڭ وسىندا قونىپ قالعان كۇندەرى دە بولدى. ءبىز ولارعا ارنايى جاتىن ورىن دايىنداپ، اس-اۋقاتپەن قامتاماسىز ەتتىك. ال كۇندەلىكتى 100-دەن استام قىزمەتكەرىمىز وزىنە تاپسىرىلعان اۋماقتى تازالاۋعا شىعادى. بيىل جۇمىسشىلار سانى 15%-عا كوبەيدى، – دەدى قايرات ەرمەكقالي ۇلى.
ايتا كەتكەن ءجون، مەردىگەر ۇيىم الاتاۋ اۋدانى اكىمىنىڭ تىكەلەي باقىلاۋىندا كورىكتەندىرۋ ءبولىمىنىڭ ماماندارىمەن ءاردايىم بايلانىستا جۇمىس ىستەيدى. ءوزارا بىرىككەن جۇمىس اۋدان تازالىعىن قامتاماسىز ەتۋگە مۇمكىندىك بەرەدى.
ادال ىسكە ايىپ سالۋ دۇرىس پا؟
الماتىلىقتاردىڭ قولايلىعى مەن تازالىعى ءۇشىن قىزمەت اتقاراتىن جاس ۇيىمنىڭ العاشقى جىلى الدىنان شىققان قيىندىقتارى دا جوق ەمەس. ونىڭ ەڭ ۇلكەنى – ايىپپۇل. ءبىراق وزگەلەرگە سەكىلدى ءتارتىپ بۇزعانى ءۇشىن ەمەس، بۇگىنگە دەيىن «التىن تازالىق» جشس-ىنا تىكەلەي ءوز مىندەتىن اتقارعانى ءۇشىن ايىپپۇل سالىنىپ كەلەدى. اتاپ ايتقاندا، كومپانيانىڭ ارنايى تەحنيكالارى كوشەنىڭ تروتۋارمەن تەڭەسەتىن شەتىن تازالاۋى ءۇشىن اۆتوبۋس جولاعىمەن جۇرگەندە، ورناتىلعان كامەرالار مەردىگەر ۇيىمنىڭ ماشينالارىنا ورىنسىز ايىپپۇل جازىپ جىبەرەدى ەكەن. بۇل ماسەلەمەن جاس كومپانيا ءارتۇرلى جاۋاپتى باسقارمالار مەن پوليسيا دەپارتامەنتىنە جۇگىنسە دە، ايتىلعان سۇراق ءوز شەشىمىن تاپپاي كەلەدى. الداعى ۋاقىتتا ادال ىسكە سالىنعان ايىپ الىنىپ، كومپانيا كولىكتەرى ەش قيىندىقسىز ءوز جۇمىسىن جالعاستىرا بەرەدى دەپ سەنەمىز.
ال «التىن تازالىق» كومپانياسىنىڭ باسشىسى قايرات جۇمىربايەۆ قالا تۇرعىندارى مەن قوناقتارىن سۇيىكتى قالامىز – الماتىنى ايالاپ، تازالىقتا ۇستاۋعا شاقىردى.
– كەي ازاماتتار كولىكتەرىن رۇقسات ەتىلمەگەن كوشە شەتىنە تاستاپ كەتەدى. ونىڭ كەسىرى ءبىزدىڭ جۇمىسىمىزعا تيەدى. تەحنيكامىز وزىنە جۇكتەلگەن ايماقتى تازالاي الماي، جۇمىسى بايالاۋلايدى. بۇل ماسەلە، اسىرەسە، كوشەلەرى تار شاعىناۋدانداردا قاتتى سەزىلەدى. سونداي-اق، تۇرعىندار تۇرمىستىق قاتتى قالدىقتاردى رۇقسات ەتىلمەگەن جەرگە تاستاي سالادى. ول جەردە قوقىس جينالا بەرىپ، ەرتەڭ ءوزىمىزدىڭ قالامىزعا زيان كەلەدى. سوندىقتان الماتىلىقتاردى، ونىڭ ىشىندە الاتاۋ اۋدانىنىڭ تۇرعىندارىن ازاماتتىق جاۋاپكەرشىلىك تانىتىپ، قورشاعان ورتامىزدى تازا ۇستاۋعا شاقىرامىن. مادەنيەت تازالىقتان باستالادى. كىشكەنتاي كەزىنەن بالالارىمىزدىڭ اراسىندا وسىنداي تازالىقتىڭ مادەنيەتىن بىرگە قالىپتاستىرايىق، – دەدى «التىن تازالىق» باسشىسى.
جەڭىس مامىتوۆ، جۇمىسشى:
- بۇل كومپانيادا جۇمىس ىستەگەنىمە 1 جىل بولدى. مەنىڭ جۇمىس كولىكتەرىن جوندەۋمەن اينالىسامىن. بۇل جاۋاپتى جۇمىس. ويتكەنى كولىك جول ۇستىندە بۇزىلىپ قالسا، بارلىعى توقتاپ قالادى.
كوبەگەن كوكەييەۆ، جۇمىسشى:
- جاس 68-دە. ءومىر قوزعالىس دەگەندەي، بۇل جۇمىسپەن ءبىز دە ءبىر ورىندا تۇرمايمىز. كۇندەلىكتى قالامىزدى كوركەيتىپ، تازالىعىن ساقتاۋعا ءوز ۇلەسىمىزدى قوسامىز. جۇمىس ىستەپ، قوزعالىستا بولۋ ءوز دەنساۋلىعىم دا جاقسى. جۇمىس بارىسىندا جاڭبىرعا دا، سۋىق پەن قارعا دا قاراماي جۇمىس ىستەيتىن كۇندەرىمىز بولادى.
