كەمبريدج جانە وكسفورد ۋنيۆەرسيتەتتەرىنىڭ پسيحولوگتارى، نيەۆرولوگتارى مەن باسقا دا ماماندارى 10-21 جاس ارالىعىنداعى 17 مىڭنان استام (بالا، ءجاسوسپىرىم جانە جاس) ادامدىڭ دەرەگىن نەگىزگە الا وتىرىپ، تالداۋ جاساعان.
بۇل عالىمداردى Nature Communications جۋرنالىندا جاريالانعان ماقالاداعى جاسوسپىرىمدەردىڭ الەۋمەتتىك جەلىنى پايدالانۋ دەڭگەيى مەن ءوز ومىرىنە قاناعاتتانۋ دارەجەسى اراسىنداعى تىكەلەي بايلانىس قىزىقتىرعان.
زەرتتەۋ ناتيجەسىندە، ماماندار جاسوسپىرىمدەردىڭ الەۋمەتتىك جەلىلەردىڭ جاعىمسىز اسپەكتىلەرىنە اسىرەسە سەزىمتال بولاتىن جاسىن انىقتادى. وسى كەزەڭدەردە ءجاسوسپىرىم الەۋمەتتىك جەلىدە كوبىرەك ۋاقىتىن وتكىزسە، ءبىر جىلدان كەيىن ونىڭ ءوز ومىرىنە كوڭىلى تولمايتىن بولادى. ال، كەرىسىنشە، بالا وسى جاسىندا الەۋمەتتىك جەلىنى نەعۇرلىم ازىراق پايدالانسا، ونىڭ ءوز ومىرىنە دەگەن ءبىر جىلدان كەيىنگى كوزقاراسى دۇرىس بولادى.
عالىمدار قىزدار ءۇشىن بۇل ءقاۋىپتى كەزەڭ 11 جاستان 13 جاسقا دەيىن، ال ۇلدار ءۇشىن 14 جاستان 15 جاسقا دەيىن دەگەن تۇجىرىمعا كەلدى. ماماندار بۇل ايىرماشىلىق ءار ءتۇرلى جىنىس وكىلدەرىنىڭ مي قۇرىلىمدارىنىڭ دامۋىمەن، سونداي-اق ۇلداردىڭ قىزدارعا قاراعاندا جىنىستىق جاعىنان كەش جەتىلۋىمەن بايلانىستى بولۋى مۇمكىن دەپ بولجايدى.
زەرتتەۋشىلەر بۇعان قوسا الەۋمەتتىك جەلىلەردى پايدالانۋدىڭ تاعى ءبىر ءقاۋىپتى كەزەڭىن انىقتادى، بۇل قىزدارعا دا، ۇلدارعا دا بىردەي – 19 جاس. بۇل كەزەڭدەگى جاستىڭ ومىرىندە بولاتىن – ءوز بەتىنشە ءومىر سۇرە باستاۋ، ستۋدەنتتىك شاق نەمەسە جۇمىس ىستەۋ سياقتى وزگەرىستەرگە بايلانىستى الەۋمەتتىك جەلىلەرگە اسىرەسە سەزىمتال بولادى ەكەن.