بيىل ەڭبەك دەمالىسىن الۋعا ەڭ قولايلى ۋاقىت قاشان؟ Aqshamnews.kz ءتىلشىسى ەڭبەك دەمالىسىن قاي ايدا العان دۇرىس ەكەنىن ەسەپتەپ كوردى.
ەڭبەك دەمالىسى ءۇشىن تولەم مولشەرى ءارقاشان ءارتۇرلى تۇسەتىنىن بايقاعان بولارسىز. ويتكەنى دەمالىس مولشەرى ايداعى جۇمىس كۇندەرىنىڭ سانىنا بايلانىستى: جۇمىس كۇندەرى نەعۇرلىم كوپ بولسا، تولەم مولشەرى سوعۇرلىم جوعارى بولادى.
سونىمەن:
2025 جىلى ەڭبەك دەمالىسىنا شىعۋ ءۇشىن ەڭ ءتيىمدى ايلار - ءساۋىر، شىلدە، قازان جانە جەلتوقسان. وسى ايلاردا 22 جۇمىس كۇنى بار، سونداي-اق تامىز جانە قىركۇيەكتە 21 جۇمىس كۇنى بار.
سارى ءتۇس – جۇمىس كۇندەر؛
جاسىل ءتۇس – مەرەكە كۇندەر؛
قىزىل – دەمالىس كۇندەر.
ال ەگەر ءسىز ۇزاعىراق دەمالعىڭىز كەلسە، وندا ەڭبەك دەمالىسىن قاڭتار، ناۋرىز نەمەسە مامىردا، دەمالىس مەرەكە كۇندەرىنە تۇسەتىندەي ەتىپ الۋ قاجەت. سوندا ءسىز كوبىرەك دەمالاسىز، ءبىراق ادەتتەگىدەن از اقشا الاسىز. تىزىمدە جوق قالعان ايلاردا ەرەكشە ايىرماشىلىق جوق.
ەسكەرتۋ! تولەم مولشەرىنە اۋرۋحانا، دەمالىس جانە تاعى باسقا فاكتورلار اسەر ەتۋى مۇمكىن.
ەڭبەك دەمالىسىنا قاشان شىعۋعا بولادى؟
جۇمىسقا ورنالاسقاننان كەيىن التى اي جۇمىس ىستەگەن كەز كەلگەن قىزمەتكەردىڭ ەڭبەك دەمالىسىنا شىعۋعا قۇقىعى بار. بۇل مەرزىم اياقتالعان سوڭ، باسشىلىققا ەكى اپتا بۇرىن ەسكەرتىپ، دەمالىسقا سۇرانۋعا بولادى.
الايدا ەگەر ءسىز رەسمي ەڭبەك شارتىسىز، ياعني جالاقىنى «كونۆەرتپەن» الىپ جۇمىس ىستەپ جۇرسەڭىز، دەمالىس ماسەلەسى قيىنعا سوعۋى مۇمكىن. سەبەبى زاڭ جۇزىندە جۇمىس بەرۋشى ءسىزدىڭ دەمالىسىڭىزدى راسىمدەۋگە مىندەتتى ەمەس.
دەمالىس قانشا كۇنگە سوزىلادى؟
قازاقستاننىڭ ەڭبەك كودەكسى بويىنشا، قىزمەتكەر جىل سايىن 24 كۇنتىزبەلىك كۇن دەمالىس الۋعا قۇقىلى. بۇل كۇندەردى ءبولىپ الۋعا بولادى، ءبىراق كەم دەگەندە ءبىر بولىگى 14 كۇننەن از بولماۋى قاجەت. كەيبىر مەكەمەلەردە ەڭبەك شارتىنا سايكەس بۇدان دا كوپ كۇن دەمالىس قاراستىرىلۋى مۇمكىن.
ەگەر ەڭبەك شارتى توقتاعان بولسا، ال ءسىز ەڭبەك دەمالىسىنا بەرىلەتىن كۇندەردى پايدالانباعان بولساڭىز، جۇمىس بەرۋشى سىزگە وتەماقى بەرۋگە ءتيىس.
قاي ايدا دەمالعان ءتيىمدى؟
دەمالىس ۋاقىتىنا تولەنەتىن قاراجات كەيدە ءبىر ايلىق تابىسىڭىزدان كوپ نە از بولۋى مۇمكىن. سوندىقتان دەمالىسقا قاي كەزدە شىعۋ ءتيىمدى ەكەنىن بىلگەن ءجون.
ايتا كەتۋ كەرەك، دەمالىس كۇندەرى جۇمىس كۇندەرىمەن ەمەس، كۇنتىزبەلىك كۇندەرمەن ەسەپتەلەدى. ياعني، دەمالىسقا شىققاندا وعان دەمالىس كۇندەرى دە كىرەدى، ءبىراق ول كۇندەرگە قوسىمشا اقى تولەنبەيدى. ال مەملەكەتتىك مەرەكەلەر دەمالىس ۋاقىتىنا كىرمەيدى، سوندىقتان دەمالىس مەرزىمى ۇزارادى.
ەڭبەك دەمالىسىن الاردا ۇزاعىراق دەمالعىڭىز كەلە مە نەمەسە كوبىرەك اقشا العىڭىز كەلە مە، شەشىپ الىڭىز. شەشىمىڭىزگە قاراي ەڭبەك دەمالىسىنا شىعۋ كەرەك ايدا وزگەرەدى.