№7 الماتى قالالىق كلينيكالىق اۋرۋحاناسىنىڭ 64 جاستاعى پاسيەنتى كەيىنگى بىرنەشە جىلدا ەپيگاستريا، تاماقتى ءسىڭىرۋ پروسەسىنىڭ بۇزىلۋى، ءجيى جۇرەك اينۋ، قۇسۋ، ءىش قاتۋ، سالماق جوعالتۋ اۋرۋلارىنان زارداپ شەككەن.
ناۋقاستىڭ جاعدايى «قابىنعان شەمەن» – كىندىگى سىرتقا شىعىپ تۇرعان ۇلكەن كولەمدى ءىش. ەر ادامعا ءتىپتى جاتۋ قيىن بولعان. سەبەبى، جاتقان كەزدە جۇرەك-وكپە جەتىسپەۋشىلىگى ۇدەي تۇسەدى.
وعان №7 قالالىق اۋرۋحانا ماماندارى «ۇيقى بەزىنىڭ جالعان جىلاۋىعى» دياگنوزىن قويدى. ءسويتىپ ءمامس شەڭبەرىندە «ەمدەۋگە جاتقىزۋ بيۋروسى» پورتالى بويىنشا جوسپارلى وپەراسيالىق ەمدەۋگە جىبەرىلدى، دەپ حابارلايدى Almaty-akshamy.kz.
ۇيقى بەزىنىڭ جالعان جىلاۋىعى – بۇل سۇيىقتىقتىڭ شەكتەۋلى جينالۋى، وندا پانكرەاتيكالىق فەرمەنتتەردىڭ، قاننىڭ ەداۋىر كوپ مولشەرى بار، سونداي-اق نەكروزدىق (ولگەن) تىندەر بولۋى مۇمكىن. ۇيقى بەزىنىڭ جالعان جىلاۋىعىنىڭ پايدا بولۋ سەبەبى – وتكەرىلگەن پانكرەاتيت نەمەسە پانكرەونەكروز، ول ءوت-تاس اۋرۋى، اسقازان-ىشەك جولدارىنىڭ ويىق جارا اۋرۋى، الكوگولدى قابىلداۋ، دۇرىس تاماقتانباۋ، ءىش جاراقاتى اياسىندا داميدى. ۇيقى بەزىنىڭ جالعان جىلاۋىعىنىڭ بەلگىلەرى ونىڭ كولەمى ۇلعايعان كەزدە اسقىنادى.
پاسيەنتكە وتا جاساعان كوپ جىلدىق تاجىريبەسى بار حيرۋرگ ماناس رامازانوۆ
بۇنداي ناۋقاستارعا وتاعا تىڭعىلىقتى دايىندىقتى قاجەت ەتەتىنىن اتاپ ءوتتى. ويتكەنى ولار تاماقتانۋدىڭ بۇزىلۋىنا جانە تاعامنىڭ قورىتىلۋىنا بايلانىستى اقۋىزدىق ەنەرگيا جەتىسپەۋشىلىگىن دامىتادى.
«الدىن الا دايىندىقتان كەيىن پاسيەنت وتاعا الىندى. كۇردەلى 4 ساعاتتىق وپەراسيا جاسالدى. ءبىز جىلاۋىق قۋىسىن اسقازانعا جالعادىق. ۇيقى بەزىنىڭ جالعان جىلاۋىعىنىڭ كەزىندە جىلاۋىقتى ءداستۇرلى الىپ تاستاۋمەن جويۋعا بولمايدى، ويتكەنى جىلاۋىق ۇيقى بەزىمەن قوسىلعان جانە ۇنەمى فەرمەنتتەر بولەدى. بۇل جاعدايدا ءبىز جىلاۋىقتى اسقازاننىڭ ارتقى قابىرعاسىمەن بايلانىستىردىق، وسىلايشا جىلاۋىقتا سۇيىقتىق جينالماي اسقازان-ىشەك جولىنا تۇسۋىنە مۇمكىندىك بەردىك. سونىمەن قاتار، ۇيقى بەزىنىڭ جالعان جىلاۋىعىنا بايلانىستى ناۋقاستا وپەراسيا كەزىندە قوسىمشا قيىندىقتار تۋدىراتىن قابىنعان شەمەن بار. بارلىق تەحنيكالىق قيىندىقتارعا جانە وزىندىك ەرەكشەلىگىنە قاراماستان، وتا جوسپار بويىنشا ءتيىستى دەڭگەيدە ورىندالدى»، – دەيدى پروفەسسور رامازانوۆ.