ەلورداداعى قۇرىلىسى توقتاپ تۇرعان جوباعا پرەزيدەنت وسىنداي باعا بەردى.
مەملەكەت باسشىسى ءماجىلىس وتىرىسىندا ەلورداداعى لرت قۇرىلىسى تۋرالى دا ايتتى، دەپ حابارلايدى Almaty-akshamy.kz
«كوپشىلىكتى، اسىرەسە، ەلوردا تۇرعىندارىن اشۋلاندىراتىن تاعى ءبىر ماسەلە – لرت قۇرىلىسى بولىپ وتىر. ول كادىمگى ينفراقۇرىلىمدىق جوبادان ەلدىڭ ابىروي-بەدەلىنە نۇقسان كەلتىرەتىن كۇردەلى پروبلەماعا اينالدى. ءقازىردىڭ وزىندە وراسان زور قاراجات جۇمسالدى، قارىزدار تارتىلدى، شەتەلدىك ارىپتەستەر الدىندا اۋقىمدى كەلىسىمشارتتىق مىندەتتەمەلەر قابىلداندى. بۇل جوبا ءاۋ باستان-اق ۇلكەن قاتەلىك بولدى، ونى مويىنداۋ كەرەك. سونىمەن قاتار، سىبايلاس جەمقورلىقتىڭ ءيىسى مۇڭكىپ تۇرعان جوبا»، - دەدى ق. توقايەۆ. مەملەكەت باسشىسى ەندى وڭتايلى شەشىم قابىلداۋ قاجەتتىگىن ايتتى.
«سەبەبى ونى جاي عانا بۇزا سالۋ ۋاقىت پەن قارجىنى جوعالتۋدى بىلدىرەدى. دەمەك، وتاندىق جانە شەتەلدىك ساۋلەتشىلەر مەن ۋربانيستەردى شاقىرىپ، جوبانى ىسكە اسىرۋدىڭ ىقتيمال نۇسقالارىن انىقتاۋدان باسقا جول جوق»، - دەدى پرەزيدەنت.