رەسەي مەن ورتالىق ازيا ەلدەرى اراسىندا ەنەرگەتيكالىق قاۋىپسىزدىك سالاسىنداعى ىنتىماقتاستىق نىعايىپ كەلە جاتىر
«ورتالىق ازيا – رەسەي» سامميتىندە ۆلاديمير پۋتين رەسەي مەن ورتالىق ازيا ەلدەرىنە بىرلەسكەن ەنەرگيا جۇيەسىن قۇرۋدى ۇسىندى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
«رەسەي ورتالىق ازيانىڭ تۇتاس بولعان ەنەرگيا جۇيەسىن قالپىنا كەلتىرۋگە كومەك كورسەتۋگە دايىن. بۇل ايماقتاعى بۇكىل مەملەكەتتەردىڭ ەنەرگەتيكالىق قاۋىپسىزدىگىن ارتتىرارى انىق. رەسەي مەن ورتالىق ازيا ەلدەرى اراسىندا ەنەرگەتيكالىق قاۋىپسىزدىك سالاسىنداعى ىنتىماقتاستىق نىعايىپ كەلە جاتىر. ءبىزدىڭ ەل ورتالىق ازيا ەلدەرىنىڭ ەكونوميكاسىنا جەتەكشى ينۆەستور. باتىس كومپانيالارى مەن وپەراتورلارىنىڭ قاجەتسىز قاتىسۋىن بولدىرمايتىن قارجىلىق ەسەپ ايىرىسۋ تەتىكتەرىن قايتا قۇرۋ جانە قايتا رەتتەۋ تەتىگى ىسكە قوسىلدى»، - دەدى ۆلاديمير پۋتين «ورتالىق ازيا – رەسەي» سامميتىندە.
ايتۋىنشا، SWIFTء-تىڭ ورنىنا ءقازىردىڭ وزىندە جاقسى قالىپتاسقان رەسەيلىك قارجىلىق حابارلاما بەرۋ جۇيەسىنە كوشۋگە بولادى.
«مۇناي تاسىمالداۋ جولدارىن كەڭەيتۋ، كاسپيي تەڭىزىندە ەنەرگيا رەسۋرستارىنىڭ قورىن بىرلەسىپ يگەرۋ، قولجەتىمدى جانە تازا گاز موتورلى وتىنمەن قامتاماسىز ەتۋدىڭ پەرسپەكتيۆاسى زور. سونداي-اق، قۇبىرلاردى سالۋ جانە كەڭەيتۋ، كومىر ساۋداسى مەن ونى ازيا نارىعىنا تاسىمالداۋ كولەمىن ۇلعايتۋ دا ماڭىزدى»، - دەيدى پۋتين.
سونىمەن قاتار رەسەي باسشىسىنىڭ مالىمدەۋىنشە، تىكەلەي ينۆەستيسيا كولەمى شامامەن - 5 ملرد دوللارعا جەتكەن.