سوچيدە تاۋلى قاراباقتاعى جاعدايدى تالقىلاۋ بويىنشا ءۇشجاقتى سامميت ءوتتى
رەسەي پرەزيدەنتى ۆلاديمير پۋتين، ءازىربايجان كوشباسشىسى يلحام الييەۆ جانە ارمەنيا پرەمەر-مينيسترى نيكول پاشينيان بىرلەسكەن مالىمدەمەسىندە باكۋ مەن ەريەۆان اراسىندا بەيبىت كەلىسىم جاساسۋعا بەلسەندى دايىندىقتىڭ ماڭىزدىلىعىن اتاپ ءوتتى. سوچيدەگى ءۇشجاقتى ءسامميتتىڭ قورىتىندىسى بويىنشا قۇجات كرەمل سايتىندا جاريالاندى، دەپ حابارلايدى Almaty-akshamy.kz azattyq-ruhy.kz-كە سىلتەمە جاساپ.
«قولدا بار ازىرلەمەلەر نەگىزىندە ءوزارا قولايلى ايىرباستاردى ىزدەۋدى جالعاستىرۋ شارتتى. رەسەي فەدەراسياسى بۇعان بارلىق كومەك كورسەتەدى»، - دەلىنگەن قۇجاتتا.
تاراپتار كۇش قولدانۋدان باس تارتۋعا، بارلىق پروبلەمالىق ماسەلەلەردى تەك ەگەمەندىكتى ءوزارا تانۋ نەگىزىندە تالقىلاۋعا جانە شەشۋگە كەلىستى.
سونىمەن قاتار، رەسەي بىتىمگەرلەرىنىڭ نەگىزگى ۇلەسى جانە ولاردىڭ كۇش-جىگەرىنە دەگەن سۇرانىس اتاپ ءوتىلدى. ءازىربايجان مەن ارمەنيا باسشىلارى رەسەي فەدەراسياسىنىڭ رەسپۋبليكالار اراسىنداعى قاتىناستاردى قالىپقا كەلتىرۋگە دايىن ەكەندىگىن قۇپتادى.
ايتا كەتەيىك، 31 قازاندا سوچيدە تاۋلى قاراباقتاعى جاعدايدى تالقىلاۋ بويىنشا رەسەي-ارمەنيا-ازىربايجان ءۇشجاقتى ءسامميتى ءوتتى. كەزدەسۋ ەكى ساعاتتان استام ۋاقىتقا سوزىلدى.
ەستەرىڭىزدە بولسا، ءارميان-ازىربايجان شەكاراسىنداعى جاعداي قىركۇيەك ايىندا كەزەكتى رەت ۋشىعىپ كەتكەن ەدى. تاراپتار ءبىر-بىرىن ايىپتادى، سونىمەن قاتار ءار تاراپتان قازا تاپقاندار تۋرالى حابارلادى.
ارمەنيا مەن ءازىربايجاننىڭ قارىم-قاتىناسى 1988 جىلى ءازىربايجان كسر-نىڭ قۇرامىنان شىققانىن مالىمدەگەن تاۋلى قاراباقتىڭ تيەسىلىلىگىنە قاتىستى داۋ-داماي اياسىندا شيەلەنىسە ءتۇستى. 1992-1994 جىلدارداعى اسكەري قاقتىعىس كەزىندە باكۋ قاراباقتى باقىلاۋدى جوعالتتى.
2020 جىلدىڭ قاراشاسىندا ارمەنيا مەن ءازىربايجان ماسكەۋدىڭ قاتىسۋىمەن تاۋلى قاراباقتا اسكەري قيمىلدارىن توقتاتۋ تۋرالى كەلىسىمگە قول قويدى.