بۇل سۇراقتى كوپشىلىك ءجيى قويادى، اسىرەسە سوڭعى ۋاقىتتا جەلىدە تاراعان جازبالار مەن اقپاراتتاردان كەيىن. اسىرەسە، بىرەۋدىڭ قارىزى ءۇشىن ءوزىڭىزدىڭ نەمەسە تۋىسىڭىزدىڭ ۇيىنە ارەست قويىلاتىنىن ەستىگەندەر ءۇشىن بۇل ماسەلە ماڭىزدى بولىپ وتىر، دەپ حابارلايدى aqshamnews.kz
تاياۋدا ماقسۇت تاڭجارىق ۇلىنىڭ الەۋمەتتىك جەلىدە جاريالاعان جازباسى قوعامدا ۇلكەن تالقىعا ءتۇستى. ول ءوزىنىڭ ۇيىندە «پروپيسكادا» تۇرعان ادام قارىزىن وتەمەسە، ۇيىنە ارەست قويىلاتىنىن ايتادى. مۇنداي سوزدەر، ارينە، ۇرەي تۋعىزادى. الايدا، بۇل اقپارات شىندىققا جاناسپايدى.
ۇلتتىق كوللەكتورلار پالاتاسىنىڭ بۇرىنعى ءتوراعاسى، قازىرگى ق ر ميكروقارجى ومبۋدسمانى نازگۇل ەستەۋسىزوۆا بۇل جاعدايدى تولىق تەرىسكە شىعارادى. ونىڭ ايتۋىنشا، «سوت ورىنداۋشى» رەتىندە حابارلاسقان ادام زاڭدى ارەكەت جاسامايدى. اتاپ ايتقاندا، بۇل جاعدايدا سوت ورىنداۋشىسى ەمەس، كوللەكتورلىق كومپانيانىڭ وكىلى بولۋى مۇمكىن، ويتكەنى قارىزدى ءوندىرىپ الۋ بويىنشا ولار كەيدە قارىز الۋشىلاردى قورقىتىپ-ۇركىتۋگە تىرىسادى.
نازگۇل ەستەۋسىزوۆا زاڭدى تۇرعىدان تۇسىنىك بەرىپ، ۇيىڭىزدە تىركەۋدە تۇرعان ادامنىڭ قارىزى ءۇشىن باسپانانى ارەستكە قويۋ مۇمكىن ەمەس ەكەنىن ايتادى. سوندىقتان، ەگەر سىزگە قارىز تۋرالى وسىنداي قورقىتۋ حابارلامالارى كەلسە، بۇل زاڭبۇزۋشىلىققا جاتادى. مۇنداي جاعدايدا سويلەسۋدىڭ دالەلىن ساقتاۋ ءۇشىن اڭگىمەلەردى اۋديو نەمەسە ۆيدەو ارقىلى تىركەپ، قارجى نارىعىن رەتتەۋ جانە دامىتۋ اگەنتتىگىنە شاعىمدانۋعا بولادى. بۇل اگەنتتىك تەكسەرىس جۇرگىزىپ، ەگەر زاڭبۇزۋشىلىق انىقتالسا، ءتيىستى ايىپپۇل سالا الادى.
بورىشكەردىڭ قارىزى تەك سوت شەشىمىمەن عانا مۇلكىمەن وتەلەتىنىن ۇمىتپاڭىز. ەگەر سوتتىڭ ۇكىمى بولسا، بورىشكەردىڭ قارىزى ءوز مۇلكىمەن قايتارىلۋى مۇمكىن. الايدا بۇل جاعدايدا دا ارەستتى تەك سوت ورىنداۋشىسى عانا قويۋى مۇمكىن.
ءۇيدىڭ ارەستتە تۇرعانىن تەكسەرۋ ءۇشىن ادىلەت مينيسترلىگىنىڭ ارنايى پورتالى بار، وندا اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسى ارقىلى تەكسەرۋگە بولادى.
ەگەر سىزگە ۇقساس جاعداي ورىن السا، قورىقپاي، زاڭدى تۇردە ارەكەت ەتىڭىز جانە زاڭسىز ارەكەتتەرگە جول بەرمەڭىز!