رەفەرەندۋمعا دايىندىقتىڭ العاشقى كۇندەرىنەن باستاپ پروكۋراتۋرا ورگاندارى قوعامدىق پىكىردى سۇراۋ تالاپتارىن بۇزۋ فاكتىلەرىن تىركەگەن.
باس پروكۋراتۋرانىڭ مالىمەتىنە سۇيەنسەك، بۇگىنگى تاڭدا رەسپۋبليكالىق رەفەرەندۋمعا قاتىستى زاڭسىز قوعامدىق پىكىر سۇراۋدىڭ 8 فاكتىسى انىقتالعان.
«التى جاعدايدا مۇنداي ساۋالنامالاردى جەكە تۇلعالار، ال ەكى جاعدايدا زاڭدى تۇلعالار ورتالىق رەفەرەندۋم كوميسسياسىن الدىن الا ەسكەرتپەستەن جۇرگىزگەن. اتالعان فاكتىلەر بويىنشا پروكۋراتۋرا ورگاندارى ءتورت ازامات پەن ەكى زاڭدى تۇلعانى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 120-بابىنىڭ 3-بولىگىنە سايكەس جاۋاپقا تارتتى، ولارعا ايىپپۇل سالىندى. قالعاندارىنا قاتىستى زاڭدى جاۋاپكەرشىلىككە تارتۋ بويىنشا جۇمىس جۇرگىزىلىپ جاتىر»، – دەلىنگەن حابارلامادا.
قاداعالاۋ ورگانى سونداي-اق ازاماتتار مەن قوعامدىق بىرلەستىكتەردىڭ رەفەرەندۋمعا شىعارىلعان ماسەلە بويىنشا ءوز پىكىرلەرىن جينالىستاردا، ميتينگتەردە، ازاماتتاردىڭ جيىندارىندا، بۇقارالىق اقپارات قۇرالدارىندا ۇگىت جۇرگىزۋ كەزىندە بىلدىرۋگە قۇقىلى ەكەنىن ەسكەرتتى (ق ر كونستيتۋسيالىق زاڭىنىڭ 7-بابى، «رەسپۋبليكالىق رەفەرەندۋم تۋرالى»).
جينالىستار مەن ميتينگتەر قازاقستان رەسپۋبليكاسىنداعى بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭ شەڭبەرىندە ۇيىمداستىرىلىپ، وتكىزىلۋى كەرەك.
بەيبىت جينالىستاردى وتكىزۋ تالاپتارىن ساقتاماۋ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 488-بابى بويىنشا اكىمشىلىك جاۋاپكەرشىلىككە اكەلەدى.
«ۇگىت-ناسيحات كەزەڭى 2024 جىلعى 3 قىركۇيەكتە باستالىپ، 4 قازانعا دەيىن (ساعات 24:00-گە دەيىن) جالعاسادى. ال رەفەرەندۋم الدىنداعى جانە رەفەرەندۋم كۇنى، ياعني 5 جانە 6 قازاندا ۇگىت-ناسيحاتقا تىيىم سالىنادى. كونستيتۋسيالىق زاڭعا سايكەس (ق ر «رەسپۋبليكالىق رەفەرەندۋم تۋرالى» كونستيتۋسيالىق زاڭىنىڭ 7-بابىنىڭ 2، 3، 4-تارماقتارى) بارلىق ۇگىتتىك باسپا ماتەريالدارىندا ولاردى شىعارعان ۇيىم، باسىلعان جەرى جانە تارالىمى، سونداي-اق شىعارۋعا جاۋاپتى ادامدار تۋرالى اقپارات بولۋى كەرەك. انونيمدىك ۇگىت ماتەريالدارىن تاراتۋعا تىيىم سالىنادى. ۇگىتتىك ماتەريالداردى ەسكەرتكىشتەرگە، وبەليسكتەرگە، تاريحي، مادەني نەمەسە ساۋلەت قۇندىلىعى بار عيماراتتار مەن قۇرىلىستارعا، سونداي-اق داۋىس بەرۋ ورىندارىنا ىلۋگە بولمايدى»، – دەپ ءتۇسىندىردى باس پروكۋراتۋرا.