پروكۋراتۋرا ماماندارى قايتىس بولعاندار تىزىمىندە جۇرگەن الماتىلىقتىڭ قۇقىعىن قورعادى

پروكۋراتۋرانىڭ تالاپ-ارىزى بويىنشا الماتى قالاسى تۇرعىنىنىڭ قايتىس بولعانى تۋرالى اكتى جازباسىنىڭ كۇشى جويىلدى.

الماتى تۇرعىنى جالعان قۇجات سالدارىنان زارداپ شەگىپ كەلگەن. جالعان قۇجات جاسالۋ سالدارىنان ول قايتىس بولعاندار تىزىمىنە ەنىپ كەتكەن، ناتيجەسىندە كوپتەگەن قيىندىقتارعا تاپ بولعان، پروكۋراتۋرا ماماندارى ونىڭ قۇقىعىن قورعاپ بەرگەن، دەپ حابارلايدى Almaty-akshamy.kz.

الماتى قالالىق پروكۋراتۋراسىنىڭ مالىمەتىنشە، الماتى قالاسى تۇرعىنىنىڭ قايتىس بولعانى تۋرالى اكتى جازباسىنىڭ كۇشى جويىلدى.

پروكۋرورلار ا. ەسىمدى ازاماتشاعا تانىسى جەكە كۋالىگىن جاساپ بەرگەنىن، ءبىراق قۇجاتقا ءوزىنىڭ فوتوسۋرەتىن جاپسىرعانىن انىقتادى.

ياعني، انكەتالىق مالىمەتتەردە ازاماتشا ا. تۋرالى جازىلعان. ال فوتوسۋرەتتە ونىڭ قۇربىسى ازاماتشا ب. بولعان.

27.09.2021 جىلى ازاماتشا ب. اۋرۋحانادا قايتىس بولعان. سول كەزدە الماتى قالاسى تۇركسىب اۋداندىق احاج جالعان قۇجات نەگىزىندە ونىڭ قايتىس بولعانى تۋرالى اكتى جازعان. جالعان قۇجاتتىڭ كەسىرىنەن ا. ەسىمدى ايەل بارلىق ورگانداردا قايتىس بولعان ادام رەتىندە ەسەپتە تۇرعان.

ءمان-جايدى انىقتاعان تۇركسىب اۋدانىنىڭ پروكۋراتۋراسى ءوتىنىش بەرۋشىنىڭ مۇددەسى ءۇشىن قايتىس بولۋ تۋرالى اكتى جازباسىن كۇشىن جويۋ تۋرالى تالاپ-ارىز بەردى.

سوت قاداعالاۋ ورگانىنىڭ تالاپ-ارىزىن قاناعاتتاندىردى. اكتىنىڭ كۇشى جويىلدى.

وسىدان كەيىن رەسمي قۇجاتتى قولدان جاساۋ فاكتىسى بويىنشا پوليسيا قىلمىستىق ءىس قوزعادى.