باتىرلىق – قانىمىزعا سىڭگەن قاسيەت
مەملەكەت باسشىسى وتان قورعاۋشى كۇنىنە ارنالعان سالتاناتتى جيىندا ءسوز سويلەپ، ساردارلار مەن ساربازداردى، ارداگەرلەردى مەرەكەمەن قۇتتىقتادى، دەپ حابارلايدى Almaty-akshamy.kz.
«وسىدان وتىز جىل بۇرىن تۇڭعىش پرەزيدەنت نۇرسۇلتان ءابىش ۇلى نازاربايەۆتىڭ جارلىعىمەن قازاقستاننىڭ قارۋلى كۇشتەرى قۇرىلدى. بۇل مەملەكەتتىگىمىزدى نىعايتۋ جولىنداعى ماڭىزدى قادام بولدى»، – دەدى قاسىم-جومارت توقايەۆ.
پرەزيدەنت ەگەمەندىك العان كەزدە اسكەري الەۋەتى مىقتى ارميا جاساقتاۋعا باسا ءمان بەرگەنىمىزدى، وتانشىل ءارى كاسىبي مامانداردىڭ ارقاسىندا بۇل مىندەت ويداعىداي اتقارىلعانىن اتاپ ءوتتى.
«قورعانىس سالاسىنداعى نەگىزگى ماسەلەلەر دەر كەزىندە شەشىمىن تاپتى. وسى ماڭىزدى جۇمىسقا ەلىمىزدىڭ تۇڭعىش قورعانىس ءمينيسترى، حالىق قاھارمانى ساعادات نۇرماعامبەتوۆ ولشەۋسىز ۇلەس قوستى. ونىڭ مول تاجىريبەسى قارۋلى كۇشتەرىمىزدىڭ نەگىزىن قالاۋعا زور سەپتىگىن تيگىزدى. بۇگىندە «جاس ۇلان» اسكەري مەكتەبىنە جانە قۇرلىق اسكەرلەرىنىڭ اسكەري ينستيتۋتىنا ساعادات نۇرماعامبەتوۆتىڭ ەسىمى بەرىلگەن»، – دەدى پرەزيدەنت.
مەملەكەت باسشىسى ايبىندى ارميامىز تاۋەلسىزدىگىمىزدىڭ قورعانى، جاڭا قازاقستاننىڭ تىرەگى ەكەنىن ايتىپ، وتانشىل ءارى قايسار ساربازدارىمىز ەل قاۋىپسىزدىگىن سەنىمدى قورعاپ تۇرعانىنا توقتالدى.
«ولار باتىر بابالاردىڭ داڭقتى جولىن لايىقتى جالعاستىرىپ كەلەدى. قازاق ءۇشىن ەلدىك پەن ەرلىك – ەگىز ۇعىمدار. باتىرلىق – قانىمىزعا سىڭگەن قاسيەت. قازىبەك بي ايتقانداي، «ءبىز – جەرىمىزگە جاۋ تيمەسىن دەپ، نايزاعا ۇكى تاققان ەلمىز». ۇلى دالا ۇلاندارى قاشاندا اق بىلەكتىڭ كۇشىمەن، اق نايزانىڭ ۇشىمەن اتامەكەنىن قورعاي بىلگەن. التايدان اتىراۋعا دەيىنگى كەڭ بايتاق جەرىن ۇرپاققا ميراس ەتكەن. ءبىز اماناتقا ادال بولىپ، ەلىمىزدىڭ تۇتاستىعى مەن تىنىشتىعىن ساقتاۋ ءۇشىن ءبارىن جاسايمىز. بۇل – قازاقستاننىڭ ءاربىر ازاماتىنىڭ قاسيەتتى بورىشى»، – دەدى قاسىم-جومارت توقايەۆ.
پرەزيدەنت ەلىمىزدىڭ اسكەري دوكتريناسى تەك قورعانىسقا باعىتتالعانىن، ۇلتتىق مۇددەلەردى قورعاۋ ماسەلەسىندە ديپلوماتياعا سۇيەنەتىنىمىزگە ەرەكشە ءمان بەردى. قاسىم-جومارت توقايەۆتىڭ ايتۋىنشا، ءبىزدىڭ سىرتقى ساياساتىمىز سىندارلى، سالماقتى، ەلدىڭ ۇلتتىق مۇددەسىن قورعاۋعا باعىتتالعاندىقتان، مەملەكەتتەردىڭ بارىمەن دوستىق قارىم-قاتىناس ورناتىپ كەلەمىز.
«ءبىراق بۇرىن-سوڭدى بولماعان الەمدىك گەوستراتەگيالىق شيەلەنىس جاعدايىندا ەلىمىزدىڭ قورعانىس قابىلەتىن ارتتىرۋدىڭ ءمانى زور. اسكەري-تەحنيكالىق سالاداعى حالىقارالىق ىنتىماقتاستىقتى دامىتۋ – قازاقستان ءۇشىن ماڭىزدى. بىتىمگەرلىك قىزمەتىنىڭ ارقاسىندا قازاقستان ارمياسى الەمدىك دەڭگەيدە تانىلدى. 1990 جىلدارى ءبىز تاجىكستانعا العاش رەت بىتىمگەرلىك كۇش جىبەردىك. قازاقستاندىق اسكەريلەر بۇۇ مەن ەقىۇ ميسسيالارى اياسىندا تابىستى قىزمەت اتقاردى. بۇگىندە ءبىزدىڭ بىتىمگەرلىك كونتينگەنت ليۆان مەن باتىس ساحارادا ءجۇر»، – دەدى مەملەكەت باسشىسى.
پرەزيدەنتتىڭ پىكىرىنشە، مۇنىڭ ءبارى قازاقستاننىڭ بەيبىتشىلىك پەن تۇراقتىلىقتى ساقتاۋعا ەلەۋلى ۇلەس قوسا الاتىن سەنىمدى سەرىكتەس رەتىندەگى بەدەلىن نىعايتادى. سونىمەن قاتار قارۋلى كۇشتەردى جوعارى تەحنولوگيالىق قارۋ-جاراقپەن جانە تەحنيكامەن قامتاماسىز ەتۋگە ۇلكەن ءمان بەرەمىز. ناقتى ۇرىس قيمىلدارىندا تيىمدىلىگىن دالەلدەگەن قارۋ ۇلگىلەرىن ساتىپ الامىز جانە وتاندىق كاسىپورىنداردا شىعارامىز.
«بۇگىندە ارميامىز الەمدىك ستاندارتقا ساي جابدىقتالعان. سونىمەن قاتار جاڭا جاھاندىق سىن-قاتەرلەر قارۋلى كۇشتەرىمىزدىڭ جاۋىنگەرلىك قابىلەتىن ارتتىرۋ ءۇشىن وڭتايلى شەشىمدەر ىزدەۋدى تالاپ ەتەدى. سوندىقتان، مەنىڭ تاپسىرمام بويىنشا جوعارى ءموبيلدى جانە گيبريدتى سوعىستار جۇرگىزۋگە قابىلەتتى ارنايى وپەراسيالىق جاساقتار قۇرىلدى. الەمدەگى سوڭعى وقيعالاردىڭ تاجىريبەسىن ەسكەرە وتىرىپ، ءبىز اسكەري ءىس-قيمىلداردىڭ ستراتەگياسى مەن تاكتيكاسىن ۇنەمى جەتىلدىرىپ وتىرامىز. جەكە قۇرام جۇيەلى تۇردە جاۋىنگەرلىك دايىندىقتى پىسىقتايدى، اۋقىمدى وقۋ-جاتتىعۋلار وتكىزىلەدى. بولاشاق وفيسەرلەردى دايارلاۋدىڭ زاماناۋي جۇيەسى قۇرىلدى»، – دەدى قاسىم-جومارت توقايەۆ.
مەملەكەت باسشىسى اسكەري ءبىلىم بەرۋ سالاسىنا ارنايى توقتالدى. ونىڭ ايتۋىنشا، ۇل-قىزدارىمىز رەسپۋبليكالىق اسكەري مەكتەپتەردە وتان قورعاۋ ءىسىن مەڭگەرە باستايدى جانە ەلىمىزدە ۇزدىك اسكەري وقۋ ورىندارى بار.
«ونىڭ كوش باسىندا تۇرعان ۇلتتىق قورعانىس ۋنيۆەرسيتەتى قاۋىپسىزدىك سالاسىنداعى ءىرى عىلىمي ورتالىققا اينالدى. مەملەكەت اسكەري قىزمەتشىلەردىڭ الەۋمەتتىك جاعدايىن جاقسارتۋعا باسا نازار اۋدارىپ كەلەدى. ولارعا باسپانا بەرىلەدى، باسقا دا جەڭىلدىكتەر ۇسىنىلادى، لايىقتى جالاقى تولەنەدى. جاستار ءۇشىن اسكەري بورىشىن وتەۋ جانە قارۋلى كۇشتەر قاتارىندا كەلىسىمشارتپەن قىزمەت ەتۋ – ابىرويلى مىندەت. شىن مانىندە، ارميا – ءومىر مەكتەبى عانا ەمەس. سونىمەن بىرگە ماقساتى ايقىن جانە وتانشىل جاستاردىڭ بولاشاعىنا جول اشادى. وسى ورايدا، اسىرەسە، باسشىلىق قۇرامعا زور جاۋاپكەرشىلىك جۇكتەلەدى. سىزدەردىڭ وتان الدىنداعى ادال قىزمەتتەرىڭىز جاستارعا ۇلگى-ونەگە بولىپ، ايرىقشا ەرىك-جىگەر بەرەدى»، – دەدى پرەزيدەنت.
قاسىم-جومارت توقايەۆ ۇلى جەڭىس قارساڭىندا وتان قورعاۋشى كۇنىن تويلاۋدىڭ سيمۆولدىق ءمانى زور ەكەنىن، ەكىنشى دۇنيەجۇزىلىك سوعىس ادامزات تاريحىندا وشپەس ءىز قالدىرعانىن اتاپ ءوتتى. پرەزيدەنتتىڭ ايتۋىنشا، سوعىس كەزىندە حالقىمىز كوزسىز ەرلىك پەن قايسارلىق كورسەتتى.
«رەسپۋبليكامىزدا سوعىسقا دەيىنگى جىلدارى قۇرىلعان زاۋىتتار مەن سوعىس كەزىندە كوشىرىلگەن كاسىپورىندار ارميانى قامتاماسىز ەتۋدە، جەڭىستى جاقىنداتۋدا زور ءرول اتقاردى. فاشيستىك باسقىنشىلارمەن شايقاستا جانقيارلىق ەرلىك كورسەتكەنى ءۇشىن قازاقستاننان شاقىرىلعان 500-دەن استام جاۋىنگەر كەڭەس وداعىنىڭ باتىرى اتاعىن الدى. قان مايداندا قازاقتىڭ ارۋلارى دا ەرلىكپەن شايقاستى. قاھارمان قىزدارىمىز ءاليا مولداعۇلوۆا مەن مانشۇك مامەتوۆانىڭ اتى اڭىزعا اينالدى. بيىل حيۋاز دوسپانوۆانىڭ تۋعانىنا 100 جىل تولادى. ول – 300-دەن استام اۋە جورىعىن جاساعان. ەلىمىز تاۋەلسىزدىك العاننان كەيىن ايگىلى ۇشقىشقا «حالىق قاھارمانى» اتاعى بەرىلدى. ءبىراق ءالى دە كوپتەگەن وتانداسىمىزدىڭ باتىرلىعى لايىقتى باعالانباي كەلەدى. سوندىقتان تاريحي ادىلدىك ورناتۋ – وتان الدىنداعى قاستەرلى مىندەتىمىز»، – دەدى قازاقستان پرەزيدەنتى.
مەملەكەت باسشىسى سول سەبەپتى، بۇگىن سۇراپىل سوعىستاعى ەرلىگى ەلەنبەي قالعان باتىرلارىمىزعا «حالىق قاھارمانى» اتاعىن بەرۋ تۋرالى جارلىققا قول قويعانىن ايتىپ، اتاقتى مەرگەندەر تولەۋعالي ابدىبەكوۆ پەن ىبىرايىم سۇلەيمەنوۆ جانە اتقىشتار باتالونىنىڭ كومانديرى الەكساندر نەسميانوۆتىڭ ەسىمدەرىن اتاپ ءوتتى.
«وسى قاھارماندارىمىزعا ءتيىستى اتاقتارىن بەرۋ – تاريحي ادىلدىكتى ورناتۋ دەگەن ءسوز. ءبىز داڭقتى ەرلەرىمىزدىڭ رۋحىنا تاعزىم ەتەمىز. مايدانگەرلەر مەن تىل ەڭبەككەرلەرىنىڭ ەرلىگىن جادىمىزدا جاڭعىرتۋ – پەرزەنتتىك پارىزىمىز. ولاردىڭ ءومىر جولى ۇرپاققا ۇلگى-ونەگە بولا بەرەدى»، – دەدى قاسىم-جومارت توقايەۆ.
پرەزيدەنت ءسوزىنىڭ سوڭىندا جيىنعا قاتىسۋشىلاردى وتان قورعاۋشى كۇنىمەن جانە جەڭىس مەيرامىمەن قۇتتىقتاپ، مەرەكەلىك كونسەرتتى تاماشالادى.