پرەزيدەنت ۇقشۇ ۇجىمدىق قاۋىپسىزدىك كەڭەسىنىڭ كەزەكتەن تىس سەسسياسىنا قاتىستى

بۇگىن ەلىمىزدە قالىپتاسقان جاعدايعا بايلانىستى قازاقستان پرەزيدەنتىنىڭ باستاماسىمەن شاقىرىلعان ۇجىمدىق قاۋىپسىزدىك شارت ۇيىمى ۇجىمدىق قاۋىپسىزدىك كەڭەسىنىڭ كەزەكتەن تىس سەسسياسى بەينەبايلانىس رەجيمىندە ءوتتى

جيىنعا قاسىم-جومارت توقايەۆپەن قاتار ارمەنيانىڭ پرەمەر-مينيسترى نيكول پاشينيان، بەلارۋس پرەزيدەنتى الەكساندر لۋكاشەنكو، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون، قىرعىزستان مينيسترلەر كابينەتىنىڭ ءتوراعاسى –  پرەزيدەنت اكىمشىلىگىنىڭ باسشىسى اقىلبەك جاپاروۆ جانە ۇقشۇ باس حاتشىسى ستانيسلاۆ زاس قاتىستى، دەپ حابارلايدى Almaty-akshamy.kz اkorda.kz-كە سىلتەمە جاساپ

قازاقستان پرەزيدەنتى سەسسيا قاتىسۋشىلارىنا ەلىمىزدە قالىپتاسقان احۋال مەن ونى تۇراقتاندىرۋ ءۇشىن قابىلدانىپ جاتقان شارالار تۋرالى مالىمەت بەردى. مەملەكەت باسشىسى ۇقشۇ بويىنشا ارىپتەستەرىنە كورسەتكەن كومەكتەرى ءۇشىن ريزاشىلىعىن ءبىلدىردى.

– شىن مانىندە، ۇقشۇ-عا مۇشە مەملەكەتتەردىڭ ءبىرىنىڭ قاۋىپسىزدىگىن، تۇراقتىلىعى مەن تۇتاستىعىن قامتاماسىز ەتۋ ءۇشىن ۇيىمنىڭ بىتىمگەرلىك كۇشتەرىنىڭ اۋقىمدى تۇردە جۇمىلدىرىلۋ جاعدايى ءبىرىنشى رەت بولىپ وتىر. ءبىز ءۇشىن ۇقشۇ بويىنشا ارىپتەستەرىمىزدىڭ اسكەري عانا ەمەس، مورالدىق قولداۋ كورسەتۋى دە اسا ماڭىزدى. ۇيىمعا مۇشە مەملەكەتتەردىڭ ءبارى ءبىرتۇتاس مايدان بولىپ، قازاقستاننىڭ ۇندەۋىن ءبىراۋىزدان قولدادى، – دەدى قاسىم-جومارت توقايەۆ.

پرەزيدەنت ۇيىمنىڭ بۇدان پايدالى ءارى جاقسى تاجىريبە الاتىنىن، وسال تۇستار تالدانىپ، ءتيىستى شەشىم شىعارىلاتىنىن، رەتتەۋشى قۇجاتقا تۇزەتۋلەر ەنگىزىلەتىنىن اتاپ ءوتتى.

– ۇقشۇ بەدەلدى اسكەري-ساياسي ۇيىم رەتىندە ءوزىنىڭ قاجەتتى ءارى ءتيىمدى ەكەنىن كورسەتتى. بۇل مەملەكەتتەرىمىزدىڭ تۇراقتىلىعى مەن قاۋىپسىزدىگىن قامتاماسىز ەتەتىن ناقتى مەحانيزم، – دەدى مەملەكەت باسشىسى.  

سامميت بارىسىندا ۇقشۇ-عا مۇشە مەملەكەتتەر باسشىلارى قازاقستان رەسپۋبليكاسىنداعى جاعداي جونىندە پىكىر الماسىپ، ەلىمىزدىڭ باسشىلىعى جاساپ جاتقان ىس-ارەكەتتەردى قولدايتىنىن ايتتى. سونداي-اق تۇراقتىلىق پەن كونستيتۋسيالىق ءتارتىپتى قالپىنا كەلتىرۋدىڭ ماڭىزدى ەكەنىنە نازار اۋداردى. ۇقشۇ باس حاتشىسى ستانيسلاۆ زاس بىرلەسە قابىلداعان شەشىمدەردىڭ جۇزەگە اسىرىلۋ بارىسى تۋرالى باياندادى.

مەملەكەتتەر باسشىلارى ۇقشۇ ۇجىمدىق بىتىمگەرلىك كۇشتەرىنىڭ قازاقستانداعى ميسسياسى اياقتالعانشا تۇراقتى بايلانىستا بولۋعا ۋاعدالاستى. 

قاسىم-جومارت توقايەۆتىڭ سويلەگەن ءسوزىنىڭ تولىق ماتىنىمەن مىنا سىلتەمە ارقىلى تانىسۋعا بولادى.