COVID-19 قارسى قازاقستاندىق ەكپە سىن تەزىنەن لايىقتى ءوتتى. بۇل تۋرالى دۋشانبەدەگى شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىندا قازاقستان پرەزيدەنتى قاسىم-جومارت توقايەۆ ءمالىم ەتتى، دەپ حابارلايدى Almaty-akshamy.kz قازاقپارات سىلتەمە جاساپ.
«كوروناۆيرۋسپەن كۇرەس ءبىزدىڭ كۇن تارتىبىمىزدەگى وزەكتى تاقىرىپتاردىڭ ءبىرى بولىپ قالىپ وتىر. پاندەميانىڭ ەڭ قيىن كەزەڭىندە شىۇ بويىنشا ارىپتەستەر شىندىعىندا ىنتىماقتاستىقتىڭ «شانحاي رۋحىن» تانىتقانىن زور قۋانىشپەن اتاپ وتەمىن. وسى رەتتە ءوزارا گۋمانيتارلىق كومەك كورسەتىلدى. پاندەمياعا قارسى ءىس-قيمىلدار، باتىل بەتبۇرىس حالىقتى جاپپاي يممۋنداۋعا ۇيلەستىرىلگەن قادام جاعدايىندا عانا مۇمكىن بولادى»، - دەپ توقتالدى قازاقستان پرەزيدەنتى.
وسى ورايدا مەملەكەت باسشىسى كومەككە مۇقتاج تاراپتاردى ەلەۋسىز قالدىرۋعا بولمايتىنىن قاداپ ايتتى. بۇل تۇرعىدا قازاقستاننىڭ سالماقتى ۇسىنىستارى بار.
«QazVac ۆاكسينامىز سىن تەزىنەن لايىقتى ءوتتى. كلينيكالىق سىناقتار ونىڭ تيىمدىلىگىن دالەلدەدى. ءبىز پرەپاراتتى گۋمانيتارلىق كومەك رەتىندە كورشىلەس ەلدەرگە جەتكىزە باستادىق»، - دەدى قاسىم-جومارت توقايەۆ.
وسى ورايدا پرەزيدەنت قازاقستاندىق تاعى ەكى عىلىمي ازىرلەمەلەر، ياعني NARUVAX C-19 پەن NARUVAX C-19 NANO كوروناۆيرۋسقا قارسى كانديدات ۆاكسينا رەتىندە دۇنيەجۇزىلىك دەنساۋلىق ساقتاۋ ۇيىمىنىڭ رەەسترىنە ەنگىزىلگەنىن ايتتى.
سونىمەن قاتار مەملەكەت باسشىسى شىۇ ەلدەرىندە ۆاكسينالاۋ پاسپورتتارىن ءوزارا تانۋ راسىمدەرىنىڭ جىلدامداتىلۋى مەملەكەتتەر تاپ بولعان قيىندىقتار مەن قاتەرلەردى ەڭسەرۋگە ىقپال ەتەتىنىنە سەنىمدى ەكەنىن اتاپ ءوتتى.