مەرەيتويعا وراي سالتاناتتى جيىن ءوتتى.
سولتۇستىك قازاقستان وبلىسىنىڭ قۇرمەتتى ازاماتى، مايدانگەر، ولكەتانۋشى ءارى جازۋشى سەرگەي پرەسنياكوۆ 100 جاسقا كەلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پەتروپاۆلدا ەكىنشى دۇنيەجۇزىلىك سوعىستىڭ ارداگەرى سەرگەي پرەسنياكوۆتىڭ مەرەيتويىنا وراي سالتاناتتى جيىن ءوتتى. مايدانگەرگە قۇرمەت كورسەتۋ كەزىندە سقو اكىمى قۇمار اقساقالوۆ ەل پرەزيدەنتىنىڭ العىس حاتىن وقىپ، توسبەلگىنى تابىس ەتتى.
«سەرگەي ءميحايلوۆيچتىڭ ەسىمى سولتۇستىك قازاقستان وبلىسىنىڭ تاريحىنا التىن ارىپتەرمەن جازىلعان. سەرگەي پرەسنياكوۆ – ءبىزدىڭ ەل تاريحىنداعى كوپتەگەن وقيعالاردىڭ كۋاگەرى جانە قاتىسۋشىسى. ول ماسكەۋ تۇبىندەگى شايقاستاردا سوعىسىپ، 38 اتقىشتار بريگاداسىندا قىزمەت ەتتى. سوعىستان كەيىن پارتيا ورگاندارىندا جۇمىس ىستەدى، ارداگەرلەر ۇيىمىن باسقاردى.ءومىرىنىڭ كوپ بولىگىن ءبىزدىڭ ايماقتىڭ تاريحىن زەرتتەۋگە ارنادى. سولتۇستىك قازاقستانداعى ولكەتانۋ ءىسىنىڭ دامۋىنا باعا جەتپەس ۇلەس قوستى. ستۋدەنتتەرگە ولكەتانۋ جانە تۋعان ولكە تاريحى كۋرستارىنان ساباق بەردى. ونىڭ اۆتورلىعىمەن جازىلعان كىتاپتار ارقىلى وقىرمان ەل تاريحىنان حاباردار بولادى»، - دەدى ءوڭىر باسشىسى.
سەرگەي پرەسنياكوۆ كوپتەگەن وردەن-مەدالداردىڭ يەگەرى، «قۇرمەت بەلگىسى» وردەنىن 4 رەت العان. رەسەيدىڭ سامارا وبلىسىنىڭ تۋماسى سقو-عا شامامەن 90 جىل بۇرىن كەلگەن ەكەن. ەڭبەك جولىن 1939 جىلى ومبى تەمىرجولى پەتروپاۆل ستانساسىندا ەكونوميست بولىپ باستايدى. كوپ ۇزاماي سوعىس باستالىپ، 19 جاسىندا سەرگەي پرەسنياكوۆ مايدانعا اتتانادى. باتىس، سولتۇستىك-باتىس مايداندارى مەن ماسكەۋ تۇبىندەگى شايقاستارعا قاتىسادى.
سوعىستان كەيىن ءارتۇرلى سالادا جۇمىس ىستەدى. زەينەت دەمالىسىنا شىققاسىن دا قىزمەتتەن قول ۇزبەي، پەتروپاۆل جوعارى وقۋ ورنىندا تۋعان ولكە مەن قازاقستان تاريحىنان ساباق بەرەدى. ولكە تاريحىن زەرتتەۋدەن دە قول ۇزبەيدى. سەرگەي پرەسنياكوۆ 10-نان استام كىتاپتىڭ اۆتورى. سونىڭ ىشىندە 300-دەن استام ماقالا كىرگەن «سولتۇستىك قازاقستان وبلىسى» ەنسيكلوپەدياسى دا بار.
1980 جىلدارى سەرگەي پرەسنياكوۆ سقو ارداگەرلەر كەڭەسىنىڭ ءتوراعاسى بولعان تۇستا ونىڭ باستاماسىمەن پەتروپاۆلدا جەڭىس ساياباعى پايدا بولدى.
